ការស្ទង់មតិ៖ ជនជាតិហ្វីលីពីនខ្លាចសង្គ្រាមប្រដាប់អាវុធនឹងចិនក្នុងជម្លោះដែនសមុទ្រ
ប្រជាជនហ្វីលីពីន៨នាក់ក្នុងចំណោម១០នាក់ព្រួយបារម្ភថាជម្លោះដែនទឹកក្នុងសមុទ្រចិនខាងត្បូងអាចនាំទៅដល់«សង្គ្រាមប្រដាប់អាវុធ»ទល់នឹងប្រទេសចិនដែលមានប្រជាជនច្រើនជាងគេបំផុត។ នេះជាលទ្ធផលនៃការស្ទង់មតិឯករាជ្យផ្សាយនៅថ្ងៃសុក្រនេះ។ ស្ថានីយ៍ស្រាវជ្រាវបរិយាកាសសង្គម (SWS)នៅទីក្រុងម៉ានីលនិយាយថា អារម្មណ៍នេះបានសណ្ឋិតក្នុងស្មារតីរបស់ប្រជាជនតាំងពីមានការប្រឈមមុខដ៏តឹងតែងជាមួយចិន ពាក់ព័ន្ធនឹងការត្រួតត្រាដែនទឹកពោរពេញដោយធនធានជលផលនៅជុំវិញប្រជុំកោះ ស្កាបូរោ សោល (Scarborough Shoal) ក្នុងឆ្នាំ២០១២។
ចុះផ្សាយនៅថ្ងៃ៖
ស្តាប់ - ០១:២៦
ការស្រាវជ្រាវបង្ហាញថា ៨៤ភាគរយនៃអ្នកឆ្លើយសំណួរចំនួន១២០០នាក់គឺ«បារម្ភ»អំពីជម្លោះប្រដាប់អាវុធទល់នឹងប្រទេសចិន ហើយប្រហែលពាក់កណ្តាល«បារម្ភខ្លាំងមែនទែន»នៅពេលដែលអ្នកឆ្លើយសំណួរច្រើនជាង១ភាគ៣និយាយថា«បារម្ភខ្លះៗដែរ»។
ការស្ទង់មតិដូចៗគ្នាត្រូវបានធ្វើជារៀងរាល់ឆ្នាំចាប់តាំងពីឆ្នាំ២០១២មក ហើយនៅក្នុងការស្រាវជ្រាវនីមួយៗ យ៉ាងហោចណាស់៨០ភាគរយនៃអ្នកឆ្លើយសំណួរព្រួយបារម្ភថា ទំនាស់ដែនសមុទ្រអាចផ្ទុះសង្រ្គាមពេញទំហឹងទល់នឹងប្រទេសចិនដែលជាអ្នកជិតខាងហ្វីលីពីន។
ស្ត្រីអ្នកនាំពាក្យឱ្យប្រធានាធិបតីហ្វីលីពីន អាប៊ីលហ្គេល វ៉ល់ (Abigail Valte) បានចេញប្រតិកម្មតបទៅនឹងរបាយការណ៍នោះថា៖ «វាជាធម្មជាតិសម្រាប់ពួកយើងហើយ ដែលបារម្ភអំពីសង្គ្រាមប្រដាប់អាវុធ ពីព្រោះវាជាការពិតដែលថាសង្គ្រាមមិនចំណេញចំពោះអ្នកណាឡើយ។ រឿងនេះគូសបញ្ជាក់អំពីមូលហេតុដែលយើងបានបន្តដោះស្រាយជម្លោះដោយសន្តិវិធី»។
សូមបញ្ជាក់ថា ការប្រឈមមុខនៅប្រជុំកោះស្កាបូរោស សោល បានចប់ទៅដោយទីក្រុងប៉េកាំងបានកាន់កាប់ដែននេសាទ ដែលនៅចម្ងាយ២២០គីឡូម៉ែត្រពីកោះ លូហ្សុង (Luzon)របស់ហ្វីលីពីន ហើយស្ថិតនៅចម្ងាយ៦៥០គីឡូម៉ែត្រពីកោះហៃណាន (Hainan) របស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ