អាជ្ញាធរមិនទាន់មានដំណោះស្រាយចំពោះការតវ៉ាបិទផ្លូវរបស់អ្នកស្រុកថ្មបាំង
១០ ថ្ងៃមកហើយគិតត្រឹមថ្ងៃអាទិត្យទី23 មីនានេះ ដែលអ្នកស្រុកថ្មបាំង ខេត្តកោះកុង រួមទាំងសកម្មជន និង អង្គការការពារធម្មជាតិមួយចំនួនផងបានបន្តតវ៉ាត្រៀមបិទផ្លូវចូលទៅកាន់តំបន់សាងសង់ទំនប់វារីអគ្គិសនីស្ទឹងអារ៉ែង។ ប៉ុន្តែមកទល់ពេលនេះ អាជ្ញាធរពាក់ព័ន្ធមិនទាន់មានដំណោះស្រាយណាមួយជាមួយក្រុមអ្នកតវ៉ាទាំងនោះនៅឡើយទេ។ នេះបើតាម ស្ថាបនិកមួយរូបរបស់អង្គការមាតាធម្មជាតិ លោក Alex Gonzalez Davison ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
គិតត្រឹមថ្ងៃអាទិត្យ ទី23 មីនា នេះ ជា ថ្ងៃទី10ហើយដែលអ្នកស្រុកថ្មបាំង ខេត្តកោះកុងបានតវ៉ាត្រៀមបិទផ្លូវចូលទៅកាន់តំបន់សាងសង់ទំនប់វារីអគ្គិសនីស្ទឹងអារ៉ែង។ក៏ប៉ុន្តែមិនទាន់មានដំណោះស្រាយណាមួយនៅឡើយទេ ពីសំណាក់អាជ្ញាធរពាក់ព័ន្ធ។
ថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះ លោក Alex Gonzalez Davison ស្ថាបនិកមួយរូបរបស់អង្គការមាតាធម្មជាតិបានឲ្យដឹងថា ការតវ៉ាអាចនឹងបន្តយូរទៅទៀតប្រសិនបើក្រុមអាជា្ញធរ និង ក្រុមហ៊ុនSinohydro មិនមានដំណោះស្រាយណាមួយជាមួយក្រុមអ្នកតវ៉ានោះ។យ៉ាងណាក៏ដោយ លោកក៏មានការព្រួយបារម្ភពីការបង្ក្រាបរបស់អាជ្ញាធរទៅលើក្រុមអ្នកតវ៉ាផងដែរ។បើទោះបីក្រុមហ៊ុនចិន Sinohydro បានដកគ្រឿងចក្ររបស់ខ្លួនត្រឡប់ទៅវិញក៏ដោយ ក៏អ្នកស្រុកថ្មបាំងនៅតែតវ៉ាត្រៀមបិទផ្លូវក្នុងគោលដៅឲ្យរដ្ឋាភិបាលលុបចោលគម្រោងសាងសង់ទំនប់វារីអគ្គិសនីស្ទឹងអារ៉ែងនេះតែម្តង។
លោក កែវ នីបូរា អភិបាលរងស្រុកថ្មបាំង ខេត្តកោះកុង មិនអាចទាក់ទងសុំបំភ្លឺបានទេនៅព្រឹកថ្ងៃអាទិត្យ ទី23 មីនានេះ។ ក៏ប៉ុន្តែលោក ធ្លាប់បានប្រាប់បណ្តាញសារពត៌មានកន្លងមកថា លោកមិនទាន់មានវិធានការណាមួយនៅឡើយនោះទេចំពោះការតវ៉ាបិទផ្លូវរបស់អ្នកស្រុកថ្មបាំងនេះ។មិនមានវិធានការ ដោយសារមិនចង់ឲ្យមានការប្រឈមមុខដាក់គ្នា រវាងសមត្ថកិច្ច និង ក្រុមអ្នកតវ៉ា។ទាក់ទងនឹងដំណោះស្រាយវិញ លោក កែវ នីបូរា បានបញ្ជាក់ថាសាលាខេត្តកោះកុងគ្រោងនឹងប្រជុំពិភាក្សាដោះស្រាយបញ្ហានេះនៅថ្ងៃច័ន្ទ ទី២៤ ស្អែកនេះ។
សូមបញ្ជាក់ថា កាលពីថ្ងៃសុក្រ ទី14 ចុងសប្តាហ៍មុន អ្នកស្រុកថ្មបាំង ខេត្តកោះកុង ប្រមាណជាង១០០នាក់ បាននាំគ្នាតវ៉ាត្រៀមបិទផ្លូវចូលទៅកាន់តំបន់សាងសង់ទំនប់វារីអគ្គិសនីស្ទឹងអារ៉ែង បន្ទាប់ពីក្រុមហ៊ុនចិន Sinohydro បានដឹកជញ្ជូនគ្រឿងចក្របម្រុងចូលទៅកាន់តំបន់នោះ។ក្រោយពីការតវ៉ា ក្រុមហ៊ុនចិនក៏បានដកថយមកវិញ ក៏ប៉ុន្តែដំណោះស្រាយចំពោះការតវ៉ានេះនៅមិនទាន់មានអាជ្ញាធរពាក់ព័ន្ធចេញមកដោះស្រាយជាផ្លូវការនៅឡើយនោះទេ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ