ភូមាចុះហត្ថលេខាឈប់បាញ់គ្នាជាមួយចលនាឧទ្ទាមមន(Mon)
បន្ទាប់ពីបានសម្រេចកិច្ចព្រមព្រៀងឈប់បាញ់គ្នាជាច្រើនជាមួយចលនាឧទ្ទាមដែលជាជនជាតិភាគតិច នៅប៉ុន្មានខែចុងក្រោយនេះមក អាជ្ញាធរភូមាទើបបានចុះហត្ថលេខាលើកិច្ចព្រមព្រៀងសន្តិភាពជាមួយចលនាឧទ្ទាមជាតិពិន្ធុMon-នេះជាការជូនដំណឹងរបស់ទិនានុប្បវត្តិផ្លូវការភូមា New Light of Myanmar។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គណៈប្រតិភូភូមាមួយក្រុមដឹកនាំដោយលោក Aung Ming រដ្ឋមន្ត្រីក្រសួងអយស្ម័យយាន និងក្រុមអ្នកតំណាងគណបក្សថ្មីនៃរដ្ឋ មន(Mon) ដែលជាក្រុមចលនាឧទ្ទាម បានចុះហត្ថលេខាលើបទឈប់បាញ់គ្នាមួយ។ គោលដៅគឺដើម្បី ចាប់ផ្តើមកិច្ចចរចា នយោបាយមួយនិងធ្វើការរួមគ្នានៅលើវិស័យសិក្សាធិការនិងសុខាភិបាល-នេះជាការបញ្ជាក់របស់ទិនានុប្បវត្តិផ្លូវការភូមា New Light of Myanmar នៅថ្ងៃចន្ទទី២៧កុម្ភៈនេះ។
នៅឱកាសនោះ អាជ្ញាធរភូមា បានសន្យាថានឹងដោះលែងឲ្យមានសេរីភាពវិញសមាជិកនៃគណបក្សថ្មី នៃរដ្ឋមន( Mon) ដែលកំពុងជាប់ឃុំឃាំងក្នុងពន្ធនាគារ។ មិនតែប៉ុណ្ណោះ ភាគីទាំងពីរ បានបន្ថែមទៀតថានឹងមិនប្រើកម្លាំងពលកម្មណាមួយដោយចាប់បង្ខំឡើយ។
សូមបញ្ជាក់ថា កងទ័ពរំដោះជាតិ Mon ដែលជាសាខាមួយរបស់គណបក្សថ្មីនៃរដ្ឋមន( Mon) ជាក្រុមឧទ្ទាមមួយដ៏តូចជាងគេបំផុតដោយមានកម្លាំងទ័ព តែ១០០០នាក់ប៉ុណ្ណោះនៅភាគអាគ្នេយ៍នៃភូមា។
ក្រុមជនជាតិភាគតិចនៅភូមា តំណាង ឲ្យ ១/៣ នៃប្រជាជនភូមាទាំងអស់ ៦០លាននាក់។ ពួកគេ ពុំ ដែលរស់នៅដោយសុខសន្តិភាពឡើយនៅក្រោមការត្រួតត្រារបស់អាជ្ញាធរភូមា ចាប់តាំងពីប្រទេសនេះ បានទទួលឯករាជ្យនៅឆ្នាំ១៩៤៨ មក។ កត្តានេះ ហើយ បានជាបណ្តាលឲ្យសង្គ្រាមស៊ីវិលមួយផ្ទុះឡើង រវាងចលនាជនជាតិភាគតិចប្រដាប់អាវុធសំខាន់ខ្លះ ងើបតស៊ូប្រឆាំងនឹងកងទ័ពភូមាដើម្បី ទាមទារស្វ័យភាពតំបន់ខ្លួនឲ្យបានច្រើនជាងមុន។
ឆ្លើយតប ចំពោះ ការទាមទារដ៏ចម្បងរបស់សហគមន៍អន្តរជាតិ រដ្ឋាភិបាលស៊ីវិលភូមាថ្មី បានចាប់ផ្តើមចរចា ជាមួយចលនាឧទ្ទាមនានា ចាប់តាំងពីចុងឆ្នាំ២០១១ និងបានចុះហត្ថលេខាលើកិច្ចព្រមព្រៀងសន្តិភាពទៀតផង។
ក៏ប៉ុន្តែ ការវាយប្រយុទ្ធគ្នាយ៉ាងខ្លាំងបំផុតនៅតែបន្ត រវាងកងទ័ពភូមានិងជនជាតិភាគតិច Kachin ទាមទារឯករាជ្យ ដែលស្ថិតនៅភាគខាងជើងបំផុតនៃប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ