លិខិតឆ្លងដែននឹងមានសុពលភាព ១០ឆ្នាំចាប់ពីឆ្នាំ ២០១៤តទៅ
រដ្ឋាភិបាល អាណត្តិថ្មីនេះ គ្រោងបង្កើនសុពលភាពលិខិតឆ្លងដែន ឬ Passeport រហូតដល់ ១០ឆ្នាំ។ នេះជាផ្នែកមួយនៃកំណែទម្រង់សេវាសាធារណៈ ប៉ុន្តែ តម្លៃលិខិតឆ្លងដែនថ្មីនេះមិនត្រូវបានគេបញ្ជាក់ថា អាចចុះទាបជាងមុនឬនៅដដែលនោះទេ។ ហូតមកទល់ពេលនេះ លិខិតឆ្លងដែនមានតម្លៃ ១២០ ដុល្លារ និងមានសុពលភាព ៣ឆ្នាំ តែអាចពន្យារបានពីរដងដោយក្នុងម្តងៗមានរយៈពេល២ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ចាប់ពីដើមឆ្នាំ ២០១៤តទៅ រដ្ឋាភិបាលនឹងចាប់ផ្តើមចេញលិខិតឆ្លងដែនថ្មីជូនដល់ប្រជាពលរដ្ឋដែលមានសុពលភាពរហូតដល់១០ឆ្នាំ។ នេះតាមលោក វុធ ថាលី ប្រធាននាយកដ្ឋាននគរបាលស្ថិតិ និងលិខិតឆ្លងដែន ដែលបានប្រាប់វិទ្យុបារាំងអន្តរជាតិនៅថ្ងៃពុធនេះ។
រហូតមកទល់ពេលនេះ លិខិតឆ្លងដែនខ្មែរមានសុពលភាពត្រឹមតែ ៣ឆ្នាំ ប៉ុណ្ណោះ ប៉ុន្តែ គេអាចពន្យារបាន ២ដង ដោយក្នុងម្តងៗមានរយៈពេល ២ឆ្នាំ។ ដើម្បីធ្វើលិខិតឆ្លងដែនមួយ គេត្រូវចំណាយយ៉ាងតិច ១២៤ដុល្លារ និងត្រូវរង់ចាំរយៈពេលយ៉ាងតិចមួយខែទើបអាចទទួលបាន។ អ្នកដែលចង់បានលឿនជាងនេះត្រូវចំណាយប្រាក់បន្ថែមដល់អ្នកជួយរត់ការ។
លោក គាត ច័ន្ទថារិទ្ធិ អ្នកនាំពាក្យអគ្គស្នងការដ្ឋាននគរបាលជាតិបានពន្យល់ថា ការបង្កើនសុពលភាពនៃលិខិតឆ្លងដែននេះមានគោលដៅ ដើម្បីសម្រួលដល់អ្នកប្រើប្រាស់ពីព្រោះសុពលភាពត្រឹម ៣ឆ្នាំ ដូចបច្ចុប្បន្ននេះមានរយៈពេលខ្លីពេក។ បើតាមលោក គាត ច័ន្ទថារិទ្ធិ នេះជាផ្នែកមួយនៃកំណែទម្រង់សេវាសាធារណៈដែលរដ្ឋាភិបាលបានគិតគូរតាំងពីមួយឆ្នាំមុនម្ល៉េះ។
ក្រៅពីមានសុពលភាពយូរជាងមុន លិខិតឆ្លងដែនថ្មីនេះក៏នឹងមានកម្រាស់ក្រាសជាងមុនដែរដល់ទៅពីរដងពោលគឺមានរហូតដល់ ៦០ ទំព័រ។ យ៉ាងណាក៏ដោយ នៅមិនទាន់មានព័ត៌មានលម្អិតថា លិខិតឆ្លងដែនថ្មីនេះមានតម្លៃប៉ុន្មាននៅឡើយទេ។ ទាំងលោក វុធ ថាលី ទាំងលោក គាត ច័ន្ទថារិទ្ធ បានអះអាងថា មិនទាន់បានដឹងអំពីការកំណត់តម្លៃថ្មីនៅឡើយដែរ។
បច្ចុប្បន្ន ប្រជាពលរដ្ឋខ្មែរកាន់តែច្រើនឡើងត្រូវការកាន់លិខិតឆ្លងដែនដើម្បីធ្វើដំណើរទៅក្រៅប្រទេស។ កាលពីឆ្នាំ ២០១២ មានអ្នកទៅសុំលិខិតឆ្លងដែនចំនួនជាង
១៦០ ០០០នាក់ ខណៈដែលគិតត្រឹម ១០ ខែក្នុងឆ្នាំ ២០១៣ ចំនួននេះបានកើនដល់ទៅជាង ២១០ ០០០នាក់។ នេះបើយោងតាមតួលេខដែលផ្តល់ដោយនាយកដ្ឋាននគរបាលស្ថិតិនិងលិខិតឆ្លងដែន។
គួរកត់សម្គាល់ថា ការទទួលបានលិខិតឆ្លងដែនគឺជារឿងស្មុគស្មាញមួយសម្រាប់ប្រជាជនកម្ពុជា។ តម្លៃខ្ពស់ជាងប្រទេសជិតខាង សុពលភាពតិច ហើយរាល់ពេលពន្យារម្តងៗត្រូវការបង់ប្រាក់បន្ថែម និងត្រូវរង់ចាំយូរ សុទ្ធសឹងជាបញ្ហាដែលកើតមានឡើងជាប្រចាំ។ ការបង់ប្រាក់ក្រៅផ្លូវការក៏បានក្លាយជាទម្លាប់មួយទៅហើយដែរ។ ដូច្នេះ កំណែទម្រង់សេវាកម្មផ្តល់លិខិតឆ្លងដែនគឺជាដំណឹងល្អមួយសម្រាប់ប្រជាពលរដ្ឋកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ