សំណើសុំបង្កើតគណបក្សសង្គ្រោះជាតិទៅដល់ក្រសួងមហាផ្ទៃ
សំណើសុំបង្កើតគណបក្សសង្គ្រោះជាតិត្រូវបានដាក់ទៅដល់ក្រសួងមហាផ្ទៃហើយនៅព្រឹកថ្ងៃចន្ទនេះ។ គណបក្សថ្មីមួយនេះដែលកើតចេញពីគំនិតរួមគ្នារបស់គណបក្សសម រង្ស៊ីនិងគណបក្សសិទ្ធិមនុស្ស មានសមាភាពលោកសម រង្ស៊ីជាប្រធាន និងលោកប៉ុល ហំម ជាអនុប្រធានគណបក្ស។
ចុះផ្សាយនៅថ្ងៃ៖
ស្តាប់ - ០១:៤៦
ចាប់ពីថ្ងៃចន្ទទី២០សីហានេះ រហូតដល់១៥ថ្ងៃទៀត គឺជាពេលវេលាដែលក្រសួងមហាផ្ទៃត្រូវសម្រេចអនុញ្ញាត ឬមិនអនុញ្ញាតអោយបង្កើតគណបក្សសង្គ្រោះជាតិ។ នេះបើយោងតាមនីតិវិធី។ នៅព្រឹកថ្ងៃចន្ទនេះ សំណើបង្កើតគណបក្សថ្មីមួយនេះដែលជាផ្លែផ្កានៃការរួបរួមគ្នារវាងគណបក្សប្រឆាំងទាំងពីរ គឺគណបក្សសម រង្ស៊ី និងគណបក្សសិទ្ធមនុស្សនោះ ត្រូវបានយកទៅដល់ក្រសួងមហាផ្ទៃហើយ។
គ្មានទេការរំលាយគណបក្សសិទ្ធិមនុស្ស និងគណបក្សសម រង្ស៊ីនោះ ប៉ុន្តែសមាជិកជាន់ខ្ពស់ខ្លះនៃគណបក្សសម្ព័ន្ធមិត្តទាំងពីរនឹងទៅចូលរួមដឹកនាំគណបក្សថ្មី គណបក្សសង្គ្រោះជាតិនោះ។ សមាសភាពប្រធានគណបក្សសង្គ្រោះជាតិ ត្រូវបានគេដឹងថា គឺជាលោកសម រង្ស៊ីដែលកំពុងជាប់ពិរុទ្ធ។
លោកសុក សំអឿន ប្រធានក្រុមអ្នកច្បាប់ការពារសិទ្ធិកម្ពុជាបានពន្យល់អោយដឹងថា មិនមានច្បាប់ណាដែលហាម និងសរសេរថា ជនដែលមានពិរុទ្ធមិនអាចឈរធ្វើជាប្រធានគណបក្សនយោបាយនោះឡើយ។ ច្បាប់គ្រាន់តែបានហាមជនមានពិរុទ្ធមិនអោយឈរឈ្មោះអោយគេបោះឆ្នោត និងមិនអោយបោះឆ្នោតតែប៉ុណ្ណោះ។
ទោះយ៉ាងណាក៏ដោយ គេនៅរង់ចាំមើលវាសនានៃគណបក្សនយោបាយមួយនេះ ថាតើក្រសួងមហាផ្ទៃនឹងឆ្លើយតបយ៉ាងណា ខណៈអ្នកច្បាប់សុក សំអឿនអះអាងថា គួរតែគ្មានបញ្ហាអ្វីនោះ។
ក្រោយពីបានដាក់សំណើសុំបង្កើតគណបក្សទៅក្រសួងមហាផ្ទៃហើយ សមាជិកគណបក្សសង្គ្រោះជាតិបានរៀបចំសន្និសីទកាសែតកាលពីរសៀលថ្ងៃចន្ទនេះ ដើម្បីផ្សព្វផ្សាយអំពីដំណឹងនៃការសុំចុះឈ្មោះគណបក្ស និងបង្ហាញសមាសភាពថ្នាក់ដឹកនាំផងដែរ។ នៅក្នុងសន្និសីទកាសែតដែលត្រូវបានរៀបចំនៅគេហដ្ឋានរបស់អតីតតំណាងរាស្ត្រគណបក្សសម រង្សី គឺលោកសាម ស៊ុនឌឿននោះ មានសមាសភាពមកពីគណបក្សសម រង្ស៊ី និងគណបក្សសិទ្ធិមនុស្សដែលឈរឈ្មោះជាសមាសភាពនៃអ្នកដឹកនាំគណបក្សថ្មីនេះ។ ក្នុងនោះរួមមាន លោកប៉ុល ហំម លោកស៊ុន ចន្ទី លោក អ៊ូ ច័ន្ទរ័ត្ន លោកស្រីជា សុគន្ធានី និងលោកសាម ស៊ុនឌឿនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ