គណបក្សប្រជាជនកម្ពុជា បដិសេធសំណើបែងចែកតួនាទីនៅព្រឹទ្ធសភា
លោក ជា ស៊ីម ប្រធានគណបក្សប្រជាជនកម្ពុជា បានសរសេរលិខិត ឆ្លើយតបនឹងលិខិតរបស់លោក គង់ គាំ ប្រធានស្តីទីគណបក្សសមរង្ស៊ី ចំពោះការស្នើសុំតួនាទីថ្នាក់ដឹកនាំព្រឹទ្ធសភា អាណត្តិទី៣។ លោក ជា ស៊ីម បានប្រើភាសាបែបការទូត ដោយទុកការសម្រេចបោះឆ្នោតជ្រើសតាំងថ្នាក់ដឹកនាំព្រឹទ្ធសភា ទៅឲ្យសមាជិកព្រឹទ្ធសភាម្នាក់ ជាអ្នកសម្រេច។ មានន័យថា គណបក្សប្រជាជនកម្ពុជា ដែលមានសំឡេងលើសលប់ នៅព្រឹទ្ធសភា បដិសេធមិនផ្តល់តួនាទីជាថ្នាក់ដឹកនាំព្រឹទ្ធសភា ស្របតាមការលើកឡើងរបស់គណបក្សសមរង្ស៊ី ក្នុងលិខិតនៅថ្ងៃ២៩កុម្ភៈឡើយ។
ចុះផ្សាយនៅថ្ងៃ៖
ស្តាប់ - ០៣:២៩
ក្នុងលិខិតចុះថ្ងៃទី១ ខែមីនា ឆ្នាំ២០១២ ប្រធានគណបក្សប្រជាជនកម្ពុជា លោក ជា ស៊ីម បានលើកឡើងថា ការរៀបចំក្បាលម៉ាស៊ីនដឹកនាំព្រឹទ្ធសភានីតិកាលទី៣ ខាងមុខនេះ យើងគួរអនុវត្តឲ្យបានពេញលេញតាមគោលការណ៍ នៃលទ្ធិប្រជាធិបតេយ្យ ដែលសមាជិកព្រឹទ្ធសភាម្នាក់ៗ មានសិទ្ធិសម្រេចទៅលើអ្វីៗ តាមបំណងប្រាថ្នារបស់គេរៀងៗខ្លួន។
ការលើកឡើងរបស់ប្រមុខដឹកនាំគណបក្សប្រជាជនកម្ពុជា ដែលយោងតាមស្មារតី នៃអង្គប្រជុំរបស់គណៈអចិន្ត្រៃយ៍ នៃគណៈកម្មាធិការកណ្ដាលគណបក្សប្រជាជនកម្ពុជា កាលពីថ្ងៃទី១ខែកុម្ភៈ ឆ្នាំ២០១២ យ៉ាងដូច្នេះ ជាការឆ្លើយតបទៅនឹងលិខិតរបស់លោក គង់ គាំ ប្រធានស្តីទីគណបក្សសមរង្ស៊ី កាលពីថ្ងៃទី២៩កុម្ភៈ។ លោក គង់ គាំ បានស្នើរូបមន្តរៀបចំយន្ដការថ្នាក់ដឹកនាំ ព្រឹទ្ធសភា នីតិកាលទី៣ គឺទី១-គណបក្សសមរង្ស៊ី ទទួលតួនាទី អនុប្រធានព្រឹទ្ធសភាចំនួន ១រូប។ ២-គណបក្សសមរង្ស៊ី ទទួលតួនាទី ប្រធានគណកម្មការចំនួន ៤រូប។ ៣-តួនាទី អនុប្រធាន លេខាធិការ និងសមាជិកគណៈកម្មការ នៅគណៈកម្មការ ដែលគ្មានប្រធានរបស់គណបក្សសមរង្ស៊ី និងទី៤-គណបក្សសមរង្ស៊ី ទទួលតួនាទី អគ្គលេខាធិការរងព្រឹទ្ធសភា ចំនួន ១រូប។
ក៏ប៉ុន្តែលោក ជា ស៊ីម បានបញ្ជាក់ទៅកាន់លោក គង់ គាំ ថា ទាំងគណបក្សប្រជាជនកម្ពុជា ទាំងគណបក្សសមរង្ស៊ី ទាំងសមាជិកព្រឹទ្ធសភាដែលបានតែងតាំងដោយព្រះមហាក្សត្រ និងទាំងសមាជិកព្រឹទ្ធសភា ដែលជ្រើសតាំងដោយរដ្ឋសភា មានសិទ្ធិក្នុងការលើកឡើងនូវបេក្ខភាពរបស់ខ្លួន សម្រាប់ឈរឈ្មោះ ជាថ្នាក់ដឹកនាំទាំងបី នៃព្រឹទ្ធសភា និងជាសមាជិកគណៈកម្មការនានា នៃព្រឹទ្ធសភា ដើម្បីឲ្យសម័យប្រជុំពេញអង្គព្រឹទ្ធសភា ធ្វើការបោះឆ្នោតជ្រើសរើស ហើយបន្ទាប់មកសមាជិក នៃគណៈកម្មការនីមួយៗ បន្តជ្រើសរើសថ្នាក់ដឹកនាំគណៈកម្មការរបស់ខ្លួន តាមនីតិវិធី នៃច្បាប់បន្តទៀត។
នៅក្នុងលិខិតដដែល លោកជាស៊ីម បានគូសបញ្ជាក់ថា ចំពោះអគ្គលេខាធិការ និងអគ្គលេខាធិការរងព្រឹទ្ធសភា ក៏ត្រូវតែងតាំង ដោយព្រះរាជក្រឹត្យ តាមសំណើរបស់ប្រធានព្រឹទ្ធសភា ក្រោយពីបានឯកភាពជាមួយអនុប្រធានទី១ និងអនុប្រធានទី២ ព្រឹទ្ធសភា។ ដូច្នេះ បញ្ហានេះ ក៏ត្រូវទុកលទ្ធភាព ជូនឲ្យថ្នាក់ដឹកនាំថ្មី នៃព្រឹទ្ធសភា ធ្វើការសម្រេច ទៅតាមនីតិវិធី និងការជាក់ស្ដែង។
នៅថ្ងៃនេះ លោក គង់ គាំ ប្រធានស្តីទីគណបក្សសមរង្ស៊ី បានលើកឡើងថា គណបក្សប្រជាជនកម្ពុជា កំពុងរៀបចំក្បាលម៉ាស៊ីនដឹកនាំនៅព្រឹទ្ធសភា ដែលកៀស មិនឲ្យគណបក្សសមរង្ស៊ី មានតួនាទីទទួលខុសត្រូវឡើយ។ ម្យ៉ាងទៀតការរៀបចំថ្នាក់ដឹកនាំនៅរដ្ឋសភា និងនៅព្រឹទ្ធសភារបស់គណបក្សប្រជាជនកម្ពុជា គឺចង់ឲ្យស៊ីគ្នាទៅនឹងប្រទេសវៀតណាម និងប្រទេសឡាវ ដែលជាប្រទេសកុម្មុយនីស្ត មានគណបក្សតែមួយ។
សម្រាប់សមាសភាពថ្នាក់ដឹកនាំថ្មី នៅព្រឹទ្ធសភា នីតិកាលទី៣ ដែលគ្រោងនឹងបើកកិច្ចប្រជុំលើកដំបូងនៅចុងខែមីនា ឆ្នាំ២០១២ គឺគណបក្សប្រជាជនកម្ពុជា គ្រោងនឹងជ្រើសតាំងលោកជាស៊ីម ជាប្រធានព្រឹទ្ធសភាបន្ត លោក សាយ ឈុំ អនុប្រធានទី១ និងលោក ទេព ងន អនុប្រធានទី២ ព្រឹទ្ធសភា។ ចំណែកប្រធាន និងអនុប្រធានគណៈកម្មការជំនាញព្រឹទ្ធសភាទាំង ៩ នឹងត្រូវដឹកនាំដោយសមាជិកព្រឹទ្ធសភារបស់គណបក្សប្រជាជនកម្ពុជា ដូចនៅរដ្ឋសភា បើទោះបីជានៅព្រឹទ្ធសភា អាណត្តិថ្មីនេះ មានតែគណបក្សប្រជាជន និងគណបក្សសមរង្ស៊ី ដែលជាប់ឆ្នោតក៏ដោយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ