លោកPervez Musharrafប្រគល់ខ្លួនឲ្យអាជ្ញាធរ
នៅប្រទេសប៉ាគីស្ថាន អតីតយោធានិងជាអតីតប្រធានាធិបតី កាន់អំណាចដោយប្រើកម្លាំង ពីឆ្នាំ១៩៩៩ ដល់ឆ្នាំ ២០០៨ លោក Pervez Mousharraf ត្រូវបានតុលាការសម្រេចចេញបញ្ជាឱ្យ ចាប់ឃុំឃាំងក្នុងគេហដ្ឋាន យ៉ាងហោចណាស់ពីរថ្ងៃ ពីបទបានប្រព្រឹត្តកំហុស បណ្តេញចៅក្រមដោយខុសច្បាស់ ក្នុងពេលកាន់អំណាច។ ការសម្រេចចាប់ខ្លួននេះ ធ្វើឡើងប្រមាណតែមួយខែក្រោយការវិលត្រលប់ចូលមាតុប្រទេសប៉ុណ្ណោះ។ លោក មូស្ហារាហ្វ ដែលស្រមៃចង់វិលចូលឆាកនយោបាយ ឡើងកាន់អំណាចជាថ្មី តែនៅទីបំផុត គ្មានសិទ្ធិឈរឈ្មោះបោះឆ្នោតសភា និងយល់ព្រមប្រគល់ខ្លួនឱ្យអាជ្ញាធរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក Pervez Musharraf អតីតប្រធានាធិបតីប៉ាគីស្ថាន បានចូលបង្ហាញខ្លួននៅមុខតុលាការនៅថ្ងៃសុក្រនេះ និង បានសម្រេចចិត្ត ប្រគល់ខ្លួនឱ្យអាជ្ញាធរ បន្ទាប់ពី ចៅក្រមសាលាដំបូង បានចេញបញ្ជា ឲ្យចាប់ខ្លួនលោក នៅព្រហស្បតិ៍១៨មេសាម្សិលមិញ។
ចៅក្រម បាន បដិសេធមិនព្រមពន្យារពេលឲ្យ លោក Musharraf មានសេរីភាពនៅក្រៅឃុំបណ្តោះអាសន្ន នៅក្នុងសំណុំរឿងក្តីមួយទៀត ពាក់ព័ន្ធតាំងពីពេលកាន់អំណាចទេ ទោះមានប្រាក់ធានាក៏ដោយ។
ការបដិសេធរបស់ចៅក្រមនេះហើយ ដែលជំរុញឲ្យ លោក Musharraf រត់ចេញយ៉ាងប្រញិបប្រញាប់ ពី តុលាការ ដោយមានការការពារពីក្រុមអង្គរក្សរបស់គាត់ ក្រោមសំរែក ស្រែកដៀលត្មះ ពុះពោរដោយកំហឹងក្រេវក្រោធ របស់ក្រុមមេធាវី ដែលធ្លាប់ត្រូវលោក Musharraf បណ្តេញចេញពីមុខងារដោយខុសច្បាប់ ជំនាន់លោកកាន់កាប់អំណាច។
សូមបញ្ជាក់ថា តុលាកាប៉ាគីស្ថាន ចង់ស្តាប់ លោក Musharraf ក្នុងការឆ្លើយបំភ្លឺតុលាការ នៅលើសំណុំរឿងមួយចំនួន ក្នុងនោះរួមមាន ការប្តឹងតវ៉ា ពីបទក្បត់ជាតិ។ រឿងរ៉ាវជាមួយតុលាការ ត្រូវបានចាប់ផ្តើមឡើងនៅពេលដែលលោក Musharraf បានសម្រេចចិត្តឈរឈ្មោះចូលរួមក្នុងការបោះឆ្នោតទូទៅមួយនៅថ្ងៃទី១១ឧសភាខាងមុខ តែ បេក្ខភាពរបស់លោកត្រូវបានគណកម្មការរៀបចំការបោះឆ្នោតច្រានចោលនៅក្នុងមណ្ឌលបោះឆ្នោត ចំនួន៤ ដែលលោកចង់ឈរឈ្មោះ។
នៅទីបំផុត ដោយមូលហេតុសន្តិសុខផ្ទាល់ខ្លួន លោក Pervez Musharraf មិនចង់រស់នៅក្នុងពន្ធនាគារឡើយ ទើបសុខចិត្តឲ្យអាជ្ញាធរប៉ាគីស្ថាន ឃុំឃាំងនៅក្នុងភូមិគ្រឹះជាយក្រុងអ៊ីស្លាមម៉ាបាត របស់លោកវិញ។ ចំណែក ក្រុមមេធាវីរបស់លោក Pervez Musharraf បានចូលទៅកាន់តុលាការ នៅថ្ងៃសុក្រនេះ ដើម្បី សាកល្បងរកវិធី ជួយអតីតប្រធានាធិបតីឲ្យបានរួចផុតពីការឃុំឃាំងក្នុងលំនៅឋាននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ