តំណាងរាស្ត្រគណបក្សប្រឆាំងទៅដល់ពន្ធនាគារត្រពាំងផ្លុងតែមិនបានចូលទេ
ដូចការគ្រោងទុក តំណាងរាស្ត្រគណបក្សសង្គ្រោះជាតិមួយក្រុមបានទៅដល់ពន្ធនាគារត្រពាំងផ្លុងក្នុងខេត្តកំពង់ចាមនៅព្រឹកថ្ងៃអង្គារទី៤កុម្ភៈនេះក្នុងគោលបំណងសួរសុខទុក្ខលោក វន់ ពៅ សកម្មជនសិទ្ធិមនុស្ស និងមនុស្ស ២២ នាក់ផ្សេងទៀតដែលអាជ្ញាធរចាប់ឃុំខ្លួនកាលពីដើមខែមករា។ ប៉ុន្តែ តំណាងរាស្ត្របក្សប្រឆាំងដែលអមដំណើរដោយក្រុមគ្រួសារជនរងគ្រោះជាច្រើននាក់ផងបានត្រឹមជួបជុំគ្នាពីមុខពន្ធនាគារប៉ុណ្ណោះ ហើយក៏ត្រឡប់មកភ្នំពេញវិញដោយសារតែអាជ្ញាធរមិនអនុញ្ញាតឲ្យចូលសួរសុខទុក្ខជនជាប់ចោទទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
តំណាងរាស្ត្រគណបក្សសង្គ្រោះជាតិបានវិលត្រឡប់មកភ្នំពេញវិញនៅរសៀលថ្ងៃអង្គារទី៤កុម្ភៈនេះ បន្ទាប់ពីបានទៅដល់ពន្ធនាគារត្រពាំងផ្លុង ខេត្តកំពង់ចាម តែអាជ្ញាធរពន្ធនាគារមិនអនុញ្ញាតឲ្យចូលជួបជនជាប់ចោទ។
លោក ហូ វ៉ាន់ តំណាងរាស្ត្រគណបក្សសង្គ្រោះជាតិបានថ្លែងប្រាប់វិទ្យុបារាំងអន្តរជាតិនៅរសៀលថ្ងៃអង្គារនេះថា អ្នកតំណាងរាស្ត្រគណបក្សសង្គ្រោះជាតិ រួមទាំងសមាជិកព្រឹទ្ធសភាគណបក្សសម រង្ស៊ី ផងសរុបប្រមាណជាជាង ២០ នាក់មិនត្រូវបានគេអនុញ្ញាតឲ្យចូលសួរសុខទុក្ខជនជាប់ចោទទេ។ ពួកគេបានត្រឹមចែកអំណោយដល់ក្រុមគ្រួសារជនជាប់ចោទហើយក៏ត្រឡប់មកភ្នំពេញវិញ។ លោក ហូរ វ៉ាន់ បានសម្តែងការសោកស្តាយតែមិនបានសម្តែងការភ្ញាក់ផ្អើលទេចំពោះបញ្ហានេះពីព្រោះលោកអះអាងថាបានស្គាល់សារជាតិអាជ្ញាធរកម្ពុជារួចទៅហើយ។
គួរបញ្ជាក់ថា លោក វន់ ពៅ និងតំណាងសហជីពកម្មកររួមទាំងសកម្មជនដីធ្លីសរុប ២៣ នាក់ត្រូវបានសមត្ថកិច្ចចាប់ឃុំខ្លួនកាលពីថ្ងៃទី២និងទី៣មករាក្នុងព្រឹត្តិការណ៍ប៉ះទង្គិចគ្នាដោយហិង្សារវាងក្រុមបាតុករដែលទាមទារដំឡើងប្រាក់ខែជាមួយកងកម្លាំងយោធានិងរាជអាវុធហត្ថ។ អំពើហិង្សាដែលបណ្តាលឲ្យមានមនុស្ស៤នាក់ស្លាប់និងរាប់សិបនាក់រងរបួសដោយគ្រាប់កាំភ្លើងនិងដំបងរបស់សមត្ថកិច្ច។ ភាគីសមត្ថកិច្ចក៏ទទួលរងរបួសមួយចំនួនដែរដោយសារការគប់ដុំថ្មនិងវត្ថុរឹងរបស់ក្រុមបាតុករ។
ក្រុមមេធាវីការពារក្តីឲ្យជនជាប់ចោទទាំង ២៣ នាក់និងសកម្មជនការពារសិទ្ធិមនុស្សធ្លាប់បានទាមទារឲ្យដោះលែងអ្នកទាំងនោះឲ្យនៅក្រៅឃុំជាបណ្តោះអាសន្ន ប៉ុន្តែ តុលាការបានបដិសេធ។ សូម្បីតែការសួរសុខទុក្ខអ្នកទាំងនោះក៏ត្រូវបានអាជ្ញាធរកម្រិតយ៉ាងតឹរ៉ឹងដែរ។ ក្រៅពីសាច់ញាតិ ក្រុមគ្រួសារ និងមេធាវី អាជ្ញាធរពន្ធនាគារមិនអនុញ្ញាតឲ្យមានអ្នកណាអាចចូលសួរសុខទុក្ខជនជាប់ចោទបានឡើយក្រោមហេតុផលថា សំណុំរឿងនេះកំពុងស្ថិតក្នុងដំណាក់កាលស៊ើបអង្កេតរបស់តុលាការ។
នៅព្រឹកថ្ងៃអង្គារនេះ សូម្បីតែគ្រួសារជនជាប់ចោទក៏គេមិនអនុញ្ញាតឲ្យចូលជួបសួរសុខទុក្ខដែរដោយត្រូវរង់ចាំរហូតដល់ថ្ងៃពុធ។ នេះបើយោងតាមលោក ហូរ វ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ