UN ថាមានពួកអង្គការរដ្ឋអ៊ីស្លាមជីហាត ជាង២ម៉ឺននាក់ នៅស៊ីរី និងអ៊ីរ៉ាក់
សព្វថ្ងៃនេះ នៅស៊ីរី និងអ៊ីរ៉ាក់ គឺមានពួកភេរវជនអ៊ីស្លាមជីហាត ចន្លោះ២ម៉ឺនទៅ៣ម៉ឺននាក់។ នេះបើតាមរបាយការណ៍របស់អង្គការសហប្រជាជាតិ ចេញផ្សាយពីថ្ងៃចន្ទ ទី១៣សីហា។ របាយការណ៍ដដែល បញ្ជាក់ថា បើទោះបីជាពួកសកម្មប្រយុទ្ធជីហាត បានបរាជ័យបាក់ទ័ពជាច្រើនកន្លែងមកហើយក្តី ក៏ប៉ុន្តែពួកក្រុមភេរវករជីហាតនេះ នៅតែមានចំនួនច្រើន និងគួរឲ្យបារម្ភនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ពួកអង្គការរដ្ឋអ៊ីស្លាមជីហាត បានបាត់ដែនដីគ្រប់គ្រង នៅទីក្រុងម៉ូសូល (Mossoul) និងរ៉ាកា (Raqa) កាលពីឆ្នាំ២០១៧ ដោយសារតែក្រុមសម្ព័ន្ធមិត្តអន្តរជាតិវាយដណ្តើមបាន។ ពួកភេរវជនជីហាត បានបាក់ទ័ព អន់ថយកម្លាំងខ្លះ ប៉ុន្តែក្រុមគេនៅមានគ្នីគ្នាពពាក់ពពូនចំនួនច្រើននៅឡើយ នៅក្នុងដែនដីស៊ីរីនិងអ៊ីរ៉ាក់។ ដែលនេះហើយទើប អង្គការសហប្រជាជាតិថ្លែងក្តីព្រួយបារម្ភ។
សូមជ្រាបថា ក្រុមការងារទទួលតាមដានពួកភេរវជនរបស់អង្គការសហប្រជាជាតិ ត្រូវរៀបចំរបាយការណ៍សិក្សាជាទៀតទាត់ រៀងរាល់៦ខែម្តង ហើយដាក់ជូនក្រុមប្រឹក្សាសន្តិសុខនៃអង្គការសហប្រជាជាតិ។ សម្រាប់ឆ្នាំ២០១៨ តាំងពីដើមឆ្នាំរហូតមកដល់ពេលនេះ អង្គការសហប្រជាជាតិ បានវាយតម្លៃថា ពួកយុទ្ធជនជីហាតនៅស៊ីរី និងនៅអ៊ីរ៉ាក់ មានចំនួនប្រហាក់ប្រហែលគ្នា ក្នុងប្រទេសទាំងពីរ។ ហើយក្រៅពីនេះ គឺនៅមានសកម្មប្រយុទ្ធ ជាច្រើនទៀត ដែលនៅបង្កប់ខ្លួនរាយប៉ាយនៅក្នុងប្រទេសដទៃផ្សេងទៀត។
តួយ៉ាង នៅលីបី មានពួកកងទ័ពភេរវជនជីហាត ពី៣ពាន់ ទៅ៤ពាន់នាក់ ដែលមានតាំងមូលដ្ឋានច្បាស់លាស់។ ពួកនេះ មានក្រុមមេខ្លោងក្បាលម៉ាស៊ីនសម្រាប់ប្រតិបត្តិការ បញ្ជាចេញពីអាហ្វហ្គានីស្ថាន។ ហើយនៅក្នុងទឹកដីអាហ្វហ្គានីស្ថានផ្ទាល់តែម្តងនោះ គឺពួកប្រដាប់អាវុធជីហាត មានប្រមាណជា៤ពាន់៥រយនាក់។ ចំនួននេះ អង្គការសហប្រជាជាតិ កត់សម្គាល់ថាមានការកើនឡើង។ ចំណែកនៅ យ៉េមែនវិញ យ៉ាងហោច មានពួកជីហាត ដែលជាកងប្រដាប់អាវុធតែម្តង មានជាង៥០០នាក់។ នេះគេនៅមិនទាន់រាប់ ពីពួកភេរវជនអាល់កៃដា ដែលមានជាង៦ពាន់នាក់ នៅយេម៉ែននោះផង។ ក្រៅពីនេះ ពួកគេបានបណ្តុះខ្លួន មាននៅអាស៊ី អាហ្វ្រិក និងអឺរ៉ុបផង។
ចំនួនជីហាតមាននៅរាយប៉ាយច្រើនប្រទេស ជារឿងគួរព្រួយមួយទៅហើយ តែក្តីបារម្ភមួយផ្សេងទៀត របស់អង្គការសហប្រជាជាតិ គឺខ្លាចក្រែង សមាជិកក្រុមគ្រួសាររបស់ពួកជីហាត ដែលកំពុងត្រូវទទួលទំនុកប្រមុង ឲ្យស្នាក់នៅក្នុងជំរំជនភៀសខ្លួន បែរជាប្រែវិវត្តិខ្លួន ទៅជាជីហាតទៅវិញ។ ក្តីបារម្ភនេះ កើតមានទៅលើជំរំរ៉ុកបាន ( Rokbane) ដែលមើលខុសត្រូវដោយអាមេរិក នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ