អសបចង់លុបបំបាត់ភាពគ្មានសញ្ជាតិរបស់មនុស្សលោកចាប់ពីពេលនេះទៅដល់១០ឆ្នាំខាងមុខ
នៅលើលោក ប្រជាជនប្រមាណ១០លាននាក់ពុំមានសញ្ជាតិទេ នេះជាការអះអាងរបស់ស្នងការជាន់ខ្ពស់អសបទទួលបន្ទុកជន ភៀសខ្លួន( HCR) ដែលមានបំណងចង់លុបបំបាត់ឲ្យអស់នួវភាពដែលគ្មានសញ្ជាតិរបស់មនុស្សលោកចាប់ពីពេលនេះរហូតទៅដល់១០ឆ្នាំខាងមុខ។ ចំពោះលោកAntonio Guterres ស្នងការជាន់ខ្ពស់អសបទទួលបន្ទុកជនភៀសខ្លួន “ទារកដែលគ្មានសញ្ជាតិ បានប្រសូតឡើងគិតជាមធ្បមក្នុង១០នាទីម្តងនៅលើលោកដែលជាស្ថានការណ៍មួយដ៏ធ្ងន់ធ្ងរនិងក៏ពុំអាចទទួលយកបាននៅក្នុងសតវត្សរ៍ទី២១នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
នៅក្នុងក្របខណ្ឌនៃយុទ្ធនាការ”លុបបំបាត់ភាពគ្មានសញ្ជាតិ” ផ្តើមឡើងនៅថ្ងៃអង្គារ៤វិច្ឆិកានេះ លោក Antonio Guterres ស្នងការជាន់ខ្ពស់ទទួលបន្ទុកជនភៀសខ្លួននិងហត្ថលេខីដ៏ល្បីៗនៅលើលោក២០នាក់ បានផ្សព្វផ្សាយលិខិតចំហមួយអំពាវនាវសហគមន៍អន្តរជាតិ ដើម្បីប្រមែប្រមូលហត្ថលេខាពីបណ្តាជន ១០លាននាក់នៅលើលោកក្នុងការងារគាំទ្រដល់ការលុបបំបាត់ ភាពដែលគ្មានសញ្ជាតិ ចាប់ពីពេលនេះ រហូតទៅដល់១០ខាងមុខ”។
“ភាពគ្មានសញ្ជាតិមានន័យថា ជាជីវិតមួយដែលគ្មានការអប់រំសិក្សា គ្មានបានទទួលការ ព្យាបាលផ្នែកសុខភាពឬក៏គ្មានការងារធ្វើត្រឹមត្រូវ ឥតសេរីភាពក្នុងការធ្វើដំណើរ ក៏ព្រមទាំងគ្មានក្តីរំពឹង ឬ ទស្សនៈវិស័យអ្វីឡើយក្នុងអនាគត នេះជាការបញ្ចាក់របស់អង្គការ HCR។
ក្នុងចំណោមអ្នកចុះហត្ថលេខាលើញត្តិខាងលើនេះ មានតារាភាយន្តអាមេរិកាំង Angelina Jolie គណៈអេវែគ ប្រទេសអហ្វ្រិកខាងត្បូង Desmond Tutu ឬក៏តារាចម្រៀងអាជីពអូបេរ៉ាBarbara hendricks ជាដើម ដែលសុទ្ធស៊ឹងជាឥស្សរជនបំរើសកម្មភាពអង្គការមនុស្សធម៌។
ម្យ៉ាងទៀត ផែនការសកម្មរបស់អង្គការ HCR មានលក្ខណៈច្បាស់លាស់ចំនួន១០ ដែលមានគោលដៅដើម្បីដោះស្រាយស្ថានភាពបណ្តាជនដែលកំពុងប្រឈមមុខនឹងភាពគ្មានសញ្ជាតិ ចៀសវៀងកុំឲ្យករណីបែបនេះ លេចឡើងជាថ្មីទៀត និងការពារថែរក្សា បណ្តាជនទាំងនោះផង។ ផែនការរបស់អង្គការ HCR ថែមទាំងបានអំពាវនាវផងដែរសុំឲ្យរដ្ឋនីមួយៗ ចេញលិខិតសំគាល់សញ្ជាតិជូនដល់ពួកគេដែរ។
បណ្តាប្រទេសដែលប៉ះពាល់ខ្លាំងដោយបាតុភាពសង្គមនេះ មានដូចជាភូមាដោយនៅទីនោះ ជនជាតិភាគតិច Rohingyas ដែលជាអ្នកកាន់សាសនាអ៊ីស្លាមចំនួនជាង១លាននាក់ ត្រូវបានគេបោះបង់ចោលមិនឲ្យលក្ខន្តិកៈជាពលរដ្ឋភូមា។ ក្រៅពីភូមា ក៏មានប្រទេសអាហ្វ្រិកមួយចំនួនដែរដូចជាកូតឌីវ័រ។ នៅទីនោះ អ្នកអត់សញ្ជាតិរស់នៅប្រមាណជា៧០ម៉ីននាក់ហើយភាគច្រើនមកពី Burkina Faso ។
ចំណែក ប្រទេសថៃវិញ មានចំនួន៥០ម៉ឺននាក់ ប្រទស Lituanie មាន២៦ម៉ឺន៨០០០នាក់ដែលដើមកំណើតមកពីរុស្សីនិងសាធារណៈរដ្ឋដូមីនីកែន មាន២០ម៉ឺននាក់មកពីប្រទេសហៃទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ