ក្រុមប្រឹក្សាសន្តិសុខអ.ស.បត្រៀមពិភាក្សាករណីរំលោភសិទ្ធិមនុស្សនៅកូរ៉េខាងជើង
ក្រុមប្រឹក្សាសន្តិសុខអង្គការសហប្រជាជាតិនឹងបើកកិច្ចប្រជុំមួយក្នុងខែធ្នូនេះដើម្បីសិក្សាករណីរំលោភសិទ្ធិមនុស្សនៅក្នុងប្រទេសកូរ៉េខាងជើង។ ការសម្រេចនេះត្រូវបានធ្វើឡើងតាមសំណើរបស់សមាជិក ១០ប្រទេសក្នុងចំណោមសមាជិកទំាង ១៥ប្រទេសនៃក្រុមប្រឹក្សាសន្តិសុខ។ តែជម្រើសថ្ងៃបើកកិច្ចប្រជុំនៅថ្ងៃណានោះនៅមិនបានកំណត់នៅឡើយទេ នេះបើយោងតាមការបញ្ជាក់របស់ប្រធានក្រុមប្រឹក្សាសន្តិសុខដែលប្រទេសឆាដធ្វើជាប្រធានផ្លាស់វេន។
ចុះផ្សាយនៅថ្ងៃ៖
ស្តាប់ - ០២:០៧
សំណើសុំឲ្យក្រុមប្រឹក្សាសន្តិសុខអង្គការសហប្រជាជាតិផ្តើមសិក្សាករណីរំលោភសិទ្ធមនុស្សនៅកូរ៉េខាងជើងត្រូវបានធ្វើឡើងតាមរយៈលិខិតមួយផ្ញើទៅកាន់ប្រធានក្រុមប្រឹក្សាសន្តិសុខនៅថ្ងៃសុក្រ ទី៥ ធ្នូ។ គឺជាលិខិតដែលបានចុះហត្ថលេខាដោយប្រទេស ១០ ក្នុងចំណោមប្រទេសទំាង ១៥ ជាសមាជិកក្រុមប្រឹក្សាសន្តិសុខ។ ប្រទេសហត្ថលេខីទំាង ១០នោះមាន អូស្រ្តាលី បារំាង អាមេរិក អង់គ្លេស ឈីលី លុចសំបួ រវ៉ាន់ដា ហ្ស៊កដានី លីទុយអានី និងកូរ៉េខាងត្បូង។ ពួកគេបានសម្តែងក្តីព្រួយបារម្ភខ្លំាងចំពោះស្ថានការណ៍ និងការរំលោភសិទ្ធិមនុស្សយ៉ាងធ្ងន់ធ្ងរនៅកូរ៉េខាងជើង ដោយបានស្នើឲ្យបញ្ចូលសំណុំរឿងរំលោភសិទ្ធិមនុស្សនៅកូរ៉េខាងជើងទៅក្នុងរបៀបវារៈនៃកិច្ចប្រជុំរបស់ក្រុមប្រឹក្សាសន្តិសុខនៅក្នុងខែធ្នូនេះ។ នៅក្នុងលិខិតដដែលនោះ ប្រទេសហត្ថលេខីទំាង ១០ បានយល់ឃើញថា ទង្វើរំលោភសិទ្ធិមនុស្សរបស់របបក្រុងព្យុងយ៉ាងនឹងបង្កឲ្យមានអស្ថិរភាពនៅក្នុងតំបន់ ព្រមទំាងសន្តិភាព និងសន្តិសុខអន្តរជាតិ។
គួររម្លឹកជូនថានៅក្នុងខែវិច្ឆិកាកន្លងទៅ គណៈកម្មការសិទ្ធិមនុស្សរបស់អង្គការសហប្រជាជាតិក៏បានអនុម័តនូវសេចក្តីសម្រេចចិត្តមួយដោយបានស្នើក្រុមប្រឹក្សាសន្តិសុខឲ្យបញ្ជូនរឿងរំលោភសិទ្ធិមនុស្សនៅកូរ៉េខាងជើងទៅកាន់តុលាការព្រហ្មទ័ណ្ឌអន្តរជាតិ។ សេចក្តីសម្រេចចិត្តនោះពុំមានលក្ខណៈបង្ខិតបង្ខំទេ និងដែលបានធ្វើឡើង ដោយផ្អែកលើរបាយការណ៍របស់គណៈកម្មការស៊ើបអង្កេតអ.ស.ប. ចេញផ្សាយកាលពីដំណាច់ខែកុម្ភៈកន្លងទៅ។ របាយការណ៍ដែលបានបង្ហាញពីការបាត់បង់ជីវិតអ្នកទោសនយោបាយរាប់សិបពាន់នាក់ក្នុងរយៈពេល ៥០ឆ្នំាចុងក្រោយនេះនៅក្នុងទឹកដីកូរ៉េខាងជើង និងមានរាប់សិបម៉ឺននាក់ផ្សេងទៀតកំពុងបន្តដេកក្នុងគុកសព្វថ្ងៃ។ ក្រុងព្យុងយ៉ាងធ្លាប់បានបញ្ចេញប្រតិកម្មប្រឆំាងលើរបាយការណ៍នោះ ព្រមទំាងគំរាមសងសឹកតាមរយៈការសាងល្បងនុយក្លេអ៊ែរថ្មីៗទៀត។
បើយោងតាមប្រភពពីក្រុមប្រឹក្សាសន្តិសុខឲ្យដឹងថា ចិន និងរុស្ស៊ីដែលជាសម្ព័ន្ធមិត្តរបស់កូរ៉េខាងជើងនឹងចេញមុខជំទាស់នឹងការដាក់ទ័ណ្ឌកម្មថ្មីលើក្រុងព្យុងយ៉ាង ព្រោះប៉េកំាង និងមូស្គូជាសមាជិកអចិន្ត្រៃយ៍ដែលមានសិទ្ធិវ៉េតូ។ ក្រៅពីរុស្ស៊ី និងចិន នៅមានប្រទេសសមាជិកក្រុមប្រឹក្សាសន្តិសុខ ៣ទៀត គឺឆាដ អាហ្សង់ទីន និងនីហ្សេរីយ៉ាដែលមិនស្ថិតក្នុងក្រុមប្រទេសហត្ថលេខីទំាង ១០នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ