អង្គការសហប្រជាជាតិស្នើបើកការស៊ើបអង្កេតលើហិង្សានៅភាគខាងលិចភូមា
ថ្ងៃអង្គារនេះ អង្គការសហប្រជាជាតិបានស្នើអោយមានការស៊ើ់បអង្កេតលើហេតុការណ៍ដែលទាហានភូមាបានសម្លាប់ជនស៊ីវិល នៅភាគខាងលិចភូមា បូករួមទាំងអគ្គិភ័យនៅតាមភូមិផ្សេងៗនៅទីនោះផងដែរ។ ហិង្សាទាំងនេះ បានធ្វើអោយមានមនុស្សភៀសខ្លួន រាប់ពាន់នាក់ ក្នុងពេលប៉ុន្មានសប្តាហ៍ចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
ប្រភពដំបូងនៃហិង្សានៅភាគខាងលិចភូមា គឺដោយសារតែមានហិង្សាវាយប្រហារទៅលើប៉ុស្តិ៍ប៉ូលិសច្រើនកន្លែង កាលពីដើមខែតុលា នៅរដ្ឋរ៉ាក់ឃីន ជាប់ព្រំដែនបង់ក្លាដែស។ រដ្ឋាភិបាលភូមាបានចោទថា ហិង្សាទាំងនេះជាស្នាដៃជនជាតិរ៉ូហ៊ីងយ៉ាសរាប់រយនាក់ ដែលទទួលបានការបណ្តុះបណ្តាលពីក្រុមតាលីបង់។ រដ្ឋាភិបាលបន្ថែមថា ដោយសារមូលហេតុដូច្នេះ ទើបបានជាកងទ័ពភូមាបានធ្វើសកម្មភាពបង្ក្រាបពួកគេ។
តាំងពីបើកយុទ្ធនាការបង្ក្រាបមក តំបន់នៅទីនោះត្រូវបានបិទខ្ទប់។ ការបញ្ជូនស្បៀងម្ហូប អាហារអោយមនុស្សជាង១សែននាក់នៅទីនោះ ត្រូវបានផ្អាក។
ល្ងាចថ្ងៃចន្ទកន្លងទៅ អង្គការសហប្រជាជាតិបានចេញសេចក្តីថ្លែងការណ៍មួយ តបទៅរដ្ឋាភិបាលភូមាថា អាជ្ញាធរភូមាមិនអាចលើកហេតុផលថា បានសម្លាប់ជនសង្ស័យទាំងឡាយ ដោយសារតែសម្អាងលើមូលហេតុហិង្សាទៅលើប៉ុស្តិ៍ប៉ូលិសភូមាទេ។ អង្គការសហប្រជាជាតិលើកឡើងទៀតថា អគ្គិភ័យផ្ទះសម្បែង និងវិហារសាសនាអ៊ីស្លាមច្រើនកន្លែង បូករួមទាំងមនុស្សមួយចំនួនដែលត្រូវគេសម្លាប់់-ហេតុការណ៍ទាំងនេះគឺមិនអាចអោយគេទទួលយកបានទេ។
កងទ័ពភូមាប្រាប់ថា មានមនុស្ស៣១នាក់ត្រូវបានសម្លាប់ តាំងពីដើមខែតុលាមក។ ប៉ុន្តែក្រុមការពារសិទ្ធិជនជាតិភាគតិចរ៉ូហ៊ីងយ៉ា ប្រាប់ថា តួលេខជនរងគ្រោះមានច្រើនជាងនេះ។ អ្នកភូមិម្នាក់ប្រាប់ថា ប៉ុន្មានថ្ងៃចុងក្រោយនេះ អាជ្ញាធរភូមាបានជំរុញអោយជនជាតិរ៉ូហ៊ីងយ៉ារាប់ពាន់នាក់ ចាកចេញពីផ្ទះសម្បែងពួកគេ។
តាមរយៈហិង្សានៅភាគខាងលិចភូមា គេបារម្ភថា ហិង្សាសហគមន៍សាសនាអាចនឹងផ្ទុះឡើងជាថ្មីម្តងទៀត ដូចកាលពីឆ្នាំ២០១២ដែរ។ កាលនោះ ហិង្សាបានសម្លាប់មនុស្សជាង២០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ