អង្គការសុខភាពពិភពលោក៖ស្រាសម្លាប់មនុស្ស៣លាន៣សែននាក់ ក្នុងមួយឆ្នាំៗ
អង្គការសហប្រជាជាតិបានប្រកាសសញ្ញាអាសន្ន នៅថ្ងៃចន្ទនេះថា ក្នុងមួយឆ្នាំៗ ស្រាបានសម្លាប់មនុស្សប្រមាណ៣លាន៣សែននាក់ គឺច្រើនលើសពីជំងឺស៊ីដា ជំងឺរបេង រឺក៏អំពើហិង្សាទៅទៀត។ យោងតាមអង្គការសុខភាពពិភពលោក ជំងឺជាង២០០ គឺមានជាប់ពាក់ព័ន្ធនឹងការទទួលទានស្រា។ អង្គការសុខភាពពិភពលោកបានបរិហារអាជ្ញាធរគ្រប់រូប ថាមិនបានធ្វើសកម្មភាពគ្រប់គ្រាន់ ដើម្បីទប់ស្កាត់បញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
យោងតាមអង្គការសុខភាពពិភពលោក ក្នុងឆ្នាំ២០១២ មនុស្ស៣លាន៣សែននាក់ បាន ស្លាប់ដោយសារបានសេពស្រា ជាគ្រឿងស្រវឹង។ គិតជាតួលេខគឺ ក្នុងមួយឆ្នាំៗ មានម្នាក់ស្លាប់ដោយផឹកស្រា ក្នុងចំណោមមនុស្សសរុប២០នាក់។ នេះជាតួលេខកើនឡើងខ្ពស់ ប្រៀបនឹងឆ្នាំ២០០៥ ដែលកាលណោះ មានជនរងគ្រោះស្លាប់ដោយការសេពគ្រឿងស្រវឹងត្រឹមតែ២លាន៥សែននាក់ប៉ុណ្ណោះ។
ស្រាបានក្លាយជាអាវុធសម្លាប់មនុស្សខ្ពស់ជាងជំងឺស៊ីដា របេង ជំងឺឆ្លង រឺអំពើហិង្សានានាទៅទៀត។ រៀងរាល់ឆ្នាំ មនុស្សស្លាប់៥,៩ភាគរយ ក្នុងពិភពលោក មាន ជាប់ពាក់ព័ន្ធនឹងការសេពសុរា។ យោងតាមអង្គការសុខភាពពិភពលោក ប្រទេសទទួលទានស្រាខ្ពស់ ក្នុងឆ្នាំ២០១០ មានរុស្ស៊ី បណ្តាប្រទេសអឺរ៉ុបខាងកើត ពរទុយហ្កាល់ ប្រទេសភាគច្រើននៅសហភាពអឺរ៉ុប កាណាដា អូស្រ្តាលី និងអាហ្វ្រិកខាងត្បូង។ ថ្វីបើបណ្តាប្រទេសអ្នកមាននៅទ្វីបអឺរ៉ុប និងអាមេរិក ជាប្រទេសទទួលទានស្រាច្រើនជាងគេក៏ពិតមែន បរិមាណស្រាដែលប្រើប្រាស់ក្នុងស្រុក មិនបានប្រែប្រួលទេ ក្នុងពេលកន្លងមក។
ប៉ុន្មានឆ្នាំចុងក្រោយនេះ បណ្តាប្រទេសអាស៊ី មានឥណ្ឌា និងចិន បានចាប់ផ្តើមប្រើប្រាស់ស្រាក្នុងបរិមាណខ្ពស់។ អង្គការសុខភាពពិភពលោករំពឹងទុកថា ពីពេលនេះរហូតដល់ឆ្នាំ២០២៥ ប្រជាជនចិននឹងទទួលទានស្រា ក្នុងម្នាក់ៗប្រមាណ១លីត្រកន្លះ។ ក្នុងឆ្នាំ២០១២ ក្នុងពិភពលោក បរិមាណស្រាដែលមនុស្សអាយុចាប់ពី ១៥ឆ្នាំឡើងទៅ បានបានទទួលទាន មានដល់ជាង៦លីត្រ គិតក្នុងមនុស្សម្នាក់ៗ។ ហើយ១ភាគ៣ ស្ថិតក្រៅការគ្រប់គ្រងរបស់អាជ្ញាធរ។
អង្គការសហប្រជាជាតិបានសំដែងការបារម្ភ នៅថ្ងៃចន្ទនេះ និងព្រមានថា ស្ថានភាពនេះ កាន់តែធ្លាក់ដុនដាបថែមទៀត ប្រសិនបើគ្មានវិធានការទប់ស្កាត់ខ្ពស់បន្ថែមទេនោះ ពិសេសនៅតាមបណ្តាប្រទេសមានប្រជាជនច្រើន ដែលកម្រិតជីវភាពរស់នៅនឹងត្រូវកើនខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ