អូបាម៉ាទូរស័ព្ទទៅបញ្ចុះបញ្ចូលប្រធានាធិបតីចិនឲ្យគាំទ្រទណ្ឌកម្មលើអៀរ៉ង់
នៅយប់ថ្ងៃព្រហស្បតិ៍ ទី១ មេសា ២០១០ លោកអូបាម៉ា បានទូរស័ព្ទជួបសន្ទនាជាមួយលោកហ៊ូ ជីនតាវ ប្រធានាធិបតីចិន អស់រយៈពេលប្រមាណជា ១ម៉ោង។ ការសន្ទនាគ្នា រហូតដល់ទៅ១ម៉ោងនេះ ធ្វើឡើង ដើម្បីបន្ធូរបន្ថយភាពតានតឹងរវាងប្រទេសទាំងពីរ និងជាពិសេស លោកអូបាម៉ា ចង់បញ្ចុះបញ្ចូលប្រធានាធិបតីចិន ឲ្យគាំទ្រការដាក់ទណ្ឌកម្មលើអៀរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងការសន្ទនាតាមទូរស័ព្ទ រយៈពេល ១ម៉ោងនេះ លោកអូបាម៉ា បានសង្កត់ធ្ងន់ទៅលើសារៈសំខាន់ នៃកិច្ចសហប្រតិបត្តិការរបស់ចិន ក្នុងការធ្វើយ៉ាងណាឲ្យអៀរ៉ង់គោរពទៅតាមកាតព្វកិច្ចរបស់ខ្លួន ស្តីពីបញ្ហានុយក្លេអ៊ែរ។
ចំណែក លោកហ៊ូ ជីនតាវ វិញ បានទាមទារឲ្យមានទំនាក់ទំនង ប្រកបដោយស្ថិរភាព រវាងអាមេរិក និងចិន។
ប្រធានាធិបតីទាំងពីរ ក៏បានជជែកគ្នាផងដែរ អំពី បញ្ហាកោះតៃវ៉ាន់ បញ្ហាទីបេ និងការអនុវត្តកិច្ចព្រមព្រៀងរបស់ G20 ជុំវិញបញ្ហាសេដ្ឋកិច្ច។
គួររំឭកថា ភាពតានតឹងផ្នែកការទូត រវាង ចិន និងអាមេរិក នាពេលថ្មីៗនេះ គឺកើតឡើងពីរឿងចិនមិនព្រមដំឡើងថ្លៃលុយយ័ន រឿងលោកអូបាម៉ាទទួលជួបសម្រេចសង្ឃដាឡៃ ឡាម៉ា រឿងអាមេរិកលក់អាវុធទៅឲ្យតៃវ៉ាន់ និងរឿងរ៉ាវជុំវិញក្រុមហ៊ុន Google របស់អាមេរិក។
ក៏ប៉ុន្តែ នៅពេលដែលបញ្ហានុយក្លេអ៊ែរអៀរ៉ង់កាន់តែចោទជាបញ្ហាខ្លាំងឡើង អាមេរិក ក៏កំពុងតែត្រូវការចិនខ្លាំងដែរ ព្រោះចិន គឺជាអ្នកកាន់កូនសោរ ក្នុងរឿងដាក់ទណ្ឌកម្មលើអៀរ៉ង់។
កាលពីដើមសប្តាហ៍នេះ លោកអូបាម៉ាបានថ្លែងថា លោកចង់ឲ្យក្រុមប្រឹក្សាសន្តិសុខអ.ស.ប. អនុម័តទណ្ឌកម្មលើអៀរ៉ង់ឲ្យបានក្នុងពេលឆាប់ៗ។ ក៏ប៉ុន្តែ ឧបសគ្គក្នុងរឿងនេះ គឺការជំទាស់ពីចិន ដែលមានសិទ្ធិវ៉េតូ។
កាលពីយប់ថ្ងៃពុធ រដ្ឋាភិបាលអាមេរិក បានប្រកាសថា ចិនបានសុខចិត្តចូលរួមជជែករឿងដាក់ទណ្ឌកម្មលើអៀរ៉ង់ហើយ។ ក៏ប៉ុន្តែ ការចរចានេះនៅមិនទាន់ចាប់ផ្តើមនៅឡើយទេ។
មួយថ្ងៃក្រោយពីការប្រកាសនេះ ពោលគឺនៅព្រឹកថ្ងៃព្រហស្បតិ៍ អៀរ៉ង់បានបញ្ជូនមន្រ្តីជាន់ខ្ពស់របស់ខ្លួនម្នាក់ ដែលជាអ្នកទទួលបន្ទុកសំណុំរឿងនុយក្លេអ៊ែរ ឲ្យទៅជួបមន្ត្រីចិន។
ក្រោយពីបានជួបជាមួយតំណាងរដ្ឋាភិបាលអៀរ៉ង់ រដ្ឋមន្រ្តីការបរទេសចិន បានថ្លែងប្រាប់អ្នកកាសែតថា ចិននៅតែមានបំណងចង់ឲ្យដោះស្រាយសំណុំរឿងនុយក្លេអ៊ែរអៀរ៉ង់ តាមរយៈការចរចា។ ក៏ប៉ុន្តែ លើកនេះ រដ្ឋមន្រ្តីការបរទេសចិនមិនបានថ្លែងជំទាស់នឹងការដាក់ទណ្ឌកម្ម ដូចពេលមុនៗទៀតទេ។
យុទ្ធសាស្រ្តរបស់ចិន ដែលទុករឿងអៀរ៉ង់ ក្នុងភាពស្រពិចស្រពិលបែបនេះ គឺដើម្បីងាយស្រួល ក្នុងពេលចរចា ជាមួយប្រទេសមហាអំណាចផ្សេងទៀត ក្នុងក្រុមប្រឹក្សាសន្តិសុខ។ គេរំពឹងថា ក្នុងការចរចានេះ មុននឹងគាំទ្រការដាក់ទណ្ឌកម្មលើអៀរ៉ង់ ចិនប្រាកដជាទាមទារឲ្យមានការកែប្រែ ឬលុបចោលវិធានការមួយចំនួន ដើម្បីបន្ធូរបន្ថយទណ្ឌកម្មនេះ ជៀសវាងកុំឲ្យខូចដល់ផលប្រយោជន៍សេដ្ឋកិច្ចចិន។
គួរបញ្ជាក់ថា ចិន គឺជាដៃគូពាណិជ្ជកម្មដ៏សំខាន់របស់អៀរ៉ង់ ជាពិសេស អៀរ៉ង់ គឺជាអ្នកផ្គត់ផ្គង់ប្រេងទៅឲ្យចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ