អូបាម៉ាទូរស័ព្ទទៅអបអរសាទរនាយករដ្ឋមន្រ្តីថ្មីរបស់ជប៉ុន
ក្រោយពីរដ្ឋសភាជប៉ុនបានបោះឆ្នោតផ្តល់សេចក្តីទុកចិត្តដល់លោក ណាអូតូ កាន់ (Naoto Kan) ឲ្យធ្វើជានាយករដ្ឋមន្រ្តីថ្មី លោកអូបាម៉ាបានទូរស័ព្ទទៅអបអរសាទរការឡើងកាន់តំណែងថ្មីនេះ។ មេដឹកនាំទាំងពីរបានសន្យាថានឹងសហការគ្នា ក្នុងការដោះស្រាយបញ្ហាធំៗមួយចំនួន រាប់ចាប់តាំងពីបញ្ហាកូរ៉េខាងជើង រហូតដល់បញ្ហាបន្ទាយទ័ពអាមេរិក នៅអូគីណាវ៉ា។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
លោកណាអូតូ កាន់ អាយុ ៦៣ឆ្នាំ ត្រូវបានជ្រើសរើសឲ្យឡើងកាន់តំណែងជានាយករដ្ឋមន្រ្តីថ្មីរបស់ជប៉ុន ជំនួសលោកហាតូយ៉ាម៉ា ដែលបានលាលែងពីតំណែង។ លោកណាអូតូ កាន់ ដែលជានាយករដ្ឋមន្រ្តីជប៉ុន ទី៥ ក្នុងរយៈពេលតែជាង៣ឆ្នាំនោះ ឡើងមកកាន់តំណែងក្នុងពេលដែលជប៉ុនកំពុងតែប្រឈមមុខនឹងបញ្ហាធំៗជាច្រើន រួមមាន ការកាត់បន្ថយបំណុលរបស់រដ្ឋ ដែលមានទំហំធំធេងហួសហេតុ។ ការជំរុញឲ្យសេដ្ឋកិច្ចមានកំណើន នៅក្នុងបរិបទវិបត្តិសេដ្ឋកិច្ចផង និងក្នុងសង្គមជប៉ុន ដែលមនុស្សវ័យចំណាស់ធ្វើការលែងកើត មានចំនួនកាន់តែច្រើនផង។ នៅក្នុងកិច្ចការបរទេសវិញ ជប៉ុនត្រូវស្វែងរកតុល្យភាពរវាង ម្ខាង ទំនាក់ទំនងជាមួយអាមេរិក ដែលជាសម្ព័ន្ធមិត្តចាស់ឆ្នាំ និង ម្ខាងទៀត ទំនាក់ទំនងជាមួយចិន ដែលជាមហាអំណាចជាន់ថ្មី និងជាដៃគូពាណិជ្ជកម្មដ៏ចម្បងរបស់ជប៉ុន។
នៅក្នុងការសន្ទនាតាមទូរស័ព្ទ កាលពីយប់ម្សិលមិញ លោកអូបាម៉ា និងលោកណាអូតូ កាន់ បានផ្តល់សារៈសំខាន់ជាពិសេស ចំពោះសម្ព័ន្ធភាពអាមេរិក-ជប៉ុន ហើយបានសន្យាជាមួយគ្នាថា នឹងសហការគ្នាយ៉ាងជិតស្និទ្ធិ ក្នុងការស្វែងរកដំណោះស្រាយបញ្ហាធំៗ ដែលអាមេរិក និងជប៉ុន កំពុងប្រឈមមុខ ក្នុងនោះ ក៏មានបញ្ហានុយក្លេអ៊ែរអៀរ៉ង់ និងកូរ៉េខាងជើងផងដែរ។
លោកណាអូតូ កាន់ ក៏បានសន្យាផងដែរថា នឹងខិតខំប្រឹងប្រែងឲ្យអស់ពីសមត្ថភាព ដោះស្រាយបញ្ហាទីតាំងទ័ពអាមេរិក នៅកោះអូគីណាវ៉ាឲ្យបាន។ គួររំឭកឡើងវិញថា វត្តមានកងទ័ពអាមេរិក នៅកោះអូគីណាវ៉ានេះហើយ ដែលជាបញ្ហាចម្បងជំរុញឲ្យលោកហាតូយ៉ាម៉ាលាលែងពីតំណែង។ លោកណាអូតូ កាន់ បានព្រមព្រៀងថានឹងគោរពតាមកិច្ចព្រមព្រៀងដែលរដ្ឋាភិបាលមុនបានចុះជាមួយអាមេរិក ពោលគឺ រើបន្ទាយទ័ពអាមេរិកចេញពីទីប្រជុំជន ទៅកាន់កន្លែងថ្មីមួយ ប៉ុន្តែ ស្ថិតនៅលើកោះអូគីណាវ៉ាដដែល។ ក៏ប៉ុន្តែ រហូតមកទល់ពេលនេះ រដ្ឋាភិបាលជប៉ុននៅមិនទាន់រកបានទីតាំងថ្មីនេះនៅឡើយទេ។ បើមើលទៅលើសន្ទុះនៃចលនាប្រឆាំងរបស់អ្នករស់នៅលើកោះអូគីណាវ៉ា ការរកទីតាំងថ្មី សម្រាប់បន្ទាយទ័ពអាមេរិកនេះ ប្រាកដជាមិនងាយស្រួលនោះទេ។
លោកអូបាម៉ា និងលោកណាអូតូ កាន់ នឹងជួបគ្នាជាលើកទី១ នៅក្នុងកិច្ចប្រជុំកំពូលក្រុមប្រទេស G8 និង G20 ដែលនឹងរៀបចំធ្វើ នៅកាណាដា នៅចុងខែមិថុនានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ