តុលាការ ន័រវែស កាត់ក្តីឲ្យអង្គការបរិស្ថានចាញ់ ចំពោះបណ្តឹងក្រុមហ៊ុនបូមប្រេង
តុលាការ ទីក្រុង អូស្លូ បានសម្រេចទម្លាក់ចោលបទចោទ របស់អង្គការបរិស្ថានមួយចំនួន ដែលប្តឹងរដ្ឋាភិបាលន័រវែស ក្នុងសំណុំរឿងផ្តល់អាជ្ញាប័ណ្ណឲ្យក្រុមហ៊ុនបូមប្រេង។ តុលាការយល់ថា រដ្ឋាភិបាលន័រវែស ផ្តល់អាជ្ញាប័ណ្ណ ដល់ក្រុមហ៊ុនបូមប្រេង ជាង១០ក្រុមហ៊ុន គឺមិនខុសច្បាប់រដ្ឋធម្មនុញ្ញទេ។ ចំណែក អង្គការ ខាងបរិស្ថាន បានប្រតិកម្មថា ការធ្វើសកម្មភាពដើម្បិកិច្ចការពារបរិស្ថាន គឺជាសមរភូមិមួយដ៏លំបាក។
ចុះផ្សាយនៅថ្ងៃ៖
ស្តាប់ - ០១:៥៨
មូលហេតុដែលអង្គការខាងបរិស្ថាន ប្តឹងរដ្ឋាភិបាលន័រវែស ពីព្រោះ រដ្ឋធម្មនុញ្ញនៃប្រទេសនេះ បានចែកពីសិទ្ធិរបស់ពលរដ្ឋ ក្នុងការនៅជាមួយបរិស្ថានដែលមានសុខភាពល្អ។ តែទីបំផុត អង្គការ Greanpeace និងសម្ព័ន្ធអង្គការខាងបរិស្ថានធម្មជាតិ ចំនួនពីរទៀត បានចាញ់ក្តី ក្នុងការប្តឹងផ្តល់រដ្ឋាភិបាលន័រវែស ដែលបានផ្តល់សិទ្ធិឲ្យក្រុមហ៊ុនអន្តរជាតិធំៗ រកស៊ីបូមប្រេង ក្នុងតំបន់តាក់ទិក។
ការបូមប្រេងក្នុងតំបន់តាក់ទិកនេះ គឺត្រូវអង្គការខាងបរិស្ថានខាងលើ អះអាងថា វាបានផ្តល់ផលប៉ះពាល់ដល់បរិស្ថាន ខូចលំនឹងធម្មជាតិ និងបង្កើតកម្តៅផែនដែរជាដើម។ ពិសេស គឺផ្ទុយពីស្មារតី នៃកិច្ចព្រមព្រៀងទីក្រុងប៉ារីសស្តីពីអាកាសធាតុ ដែលរដ្ឋាភិបាលន័រវែស បានចុះហត្ថលេខា នៅឆ្នាំ២០១៦។
ក៏ប៉ុន្តែ តុលាការ ក្រុងអូស្លូ មិនយល់ដូច្នោះទេ។ ក្នុងសេចក្តីសម្រេចរបស់ខ្លួន តុលាការ លើកឡើងថា ប្រទេសន័រវេស មិនអាចនឹងទទួលខុសត្រូវចំពោះការបំភាយឧស្ម័នកាបូនិកទៅលើប្រទេសដទៃ តាមរយៈសកម្មភាពនាំចេញនោះទេ។
គួរបញ្ជាក់ដែរថា ន័រវេស ជាប្រទេសដែលនាំចេញប្រេងនិងឧស្ម័ន ដ៏ធំជាងគេ ទៅកាន់ប្រទេសអឺរ៉ុបខាងលិច។ ក្រុមហ៊ុន បូមប្រេង និងឧស្ម័ន ដែលត្រូវអង្គការបរិស្ថានប្តឹងនោះ មានដូចជាក្រុមហ៊ុនរបស់រដ្ឋឈ្មោះ Statoil, ក្រុមហ៊ុន Lukoil របស់រុស្ស៊ី និងមានក្រុមហ៊ុន Chevron របស់អាមេរិក ជាដើម។
ចំពោះការទម្លាក់បទចោទរបស់អង្គការខាងបរិស្ថាននេះ អាចនឹងត្រូវអង្គការបន្តប្តឹងឡើងឧទ្ធរណ៍។ ការបន្តប្តឹងឧទ្ធរណ៍ជាជម្រើសល្អមួយ ព្រោះថា ករណីដូច្នេះនៅប្រទេសអឺរ៉ុបធ្លាប់មានឈ្នះក្តីខ្លះមកហើយ។ ដូចជានៅ ហូឡង់ តុលាការជាន់ខ្ពស់ បានសម្រេចឲ្យរដ្ឋាភិបាលការបន្ថយការបំភាយឧស្ម័យ ឲ្យបាន២៥ភាគរយនៅឆ្នាំ២០២០។ នៅអាល្លឺម៉ង់ ពលរដ្ឋម្នាក់ បានឈ្នះក្តីក្នុងករណីប្តឹងក្រុមហ៊ុនថាមពលធំមួយ ឲ្យសងជំងឺចិត្តចំពោះការបំពុលបរិស្ថាន ដែលនាំឲ្យប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ