កម្មករកូរ៉េខាងជើងដែលស៊ីឈ្នួលនៅរុស្ស៊ីទទួលជម្រកនយោបាយនៅកូរ៉េខាងត្បូង
ដំណឹងនេះ ផ្សាយដោយទីភ្នាក់ងារព័ត៌មានរុស្ស៊ី Interfax ល្ងាចម្សិលមិញយោងទៅលើកាសែតក្រុង Seoul “ The Chosun Ilbo “ ( ចូស៊ុន អ៊ីលបូ ) ដែលលំអិតថាពីក្នុងចំណោមកម្មករកូរ៉េខាងជើង៤០នាក់ដែលបានរត់ទៅលាក់ខ្លួនក្នុងស្ថានទូតកូរ៉េខាងត្បូងនៅក្រុងម៉ូស្គូ មាន៨នាក់ហើយត្រូវបានបញ្ជូនទៅដល់កូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:២៩
ជាការកត់សម្គាល់កម្មករទាំងនោះ សុទ្ធតែស៊ីឈ្នួលប្រកបរបរកាប់ឈើក្នុងព្រៃនៅតំបន់ស៊ីបេរីប្រទេសរុស្ស៊ី។ គេធ្វើការ គឺស្របនឹងកិច្ចព្រមព្រៀងចុះរវាងរដ្ឋាភិបាលកូរ៉េខាងជើងនិងភាគីរុស្ស៊ីជានិយោជក។
តាមពិត គេបានត្រូវបញ្ជូនដល់ក្រុង Seoul គឺតាំងពីថ្ងៃ១៣មេសាម៉្លេះ ប៉ុន្តែដំណឹងនេះ ទើបបានត្រូវកាសែតនៅទីនោះ The Chosun Ilbo “ ទម្លាយឲ្យដឹងថ្ងៃ២៥មេសាម្សិលមិញ។ ឥឡូវ ជាតិកូរ៉េខាងជើងទាំង៨នាក់ កំពុងត្រូវសមត្ថកិច្ចកូរ៉េខាងត្បូង ធ្វើអង្កេតសួរចម្លើយ។ ៣២នាក់ ទៀតដែលសុំជម្រកនយោបាយនៅកូរ៉េខាងត្បូងដែរ កំពុងបន្តលាក់ខ្លួនក្នុងស្ថានទូតកូរ៉េខាងត្បូងនៅម៉ូស្គូដោយរង់ចាំការបញ្ជូនខ្លួនគេ ទៅកាន់ក្រុង Seoulដែរ។
តាមកាសែតកូរ៉េខាងត្បូងមួយទៀត“ The Dong-a-Ilbo “ ៖
- ជាតិកូរ៉េខាងជើង៨នាក់នោះដែលរត់ចោលស្រុក បានពួនសំងំក្នុងស្ថានទូត កូរ៉េខាងត្បូងនៅម៉ូស្គូ ម្នាក់ៗគឺអស់ពេល ពី១ឆ្នាំកន្លះ ដល់២ឆ្នាំឯណោះមុននឹងមានភ័ព្វសំណាងត្រូវគេបញ្ជូនទៅកាន់កូរ៉េខាងត្បូង។
- កម្មករទាំងនោះ បានបង្ខំចិត្តលួចរត់ចេញពីកន្លែងកាប់ឈើព្រៃមកពីគេមិនអាចទ្រាំទ្រ នឹងធាតុអាកាសត្រជាក់ខ្លាំងនៅ តំបន់ស៊ីបេរី ព្រមទាំងនឹងការវាយធ្វើបាបពីខាងពួកអនុរក្សជាឆ្មាំត្រួតត្រាលើសកម្មភាពគេដែលមានបញ្ជូនពីកូរ៉េខាងជើងទៅ។
តាមការឲ្យដឹងនៃ “ស្ថាប័នរុស្ស៊ីទទួលបន្ទុកខាងពលករបរទេស” ហៅកាត់ថា FMS ភាគីរុស្ស៊ីនិយម ប្រើពលករកូរ៉េខាងជើង ដោយពលករជាតិនេះ មានវិន័យខ្ពស់ខាងបំពេញការងារ។ ស្របនឹងតួលេខឆ្នាំទៅមិញ មានកម្មករកូរ៉េខាងជើងចំនួន ២១.០០០នាក់ ប្រកបរបរស៊ីឈ្នួល កាប់ឈើក្នុងព្រៃស៊ីបេរី ប្រទេសរុស្ស៊ី។ ក្នុងមួយឆ្នាំ គេមានពេលសម្រាកតែ ២ថ្ងៃប៉ុណ្ណោះ។
ជាទូទៅ ប្រាក់ខែជារូបិយបណ្ណ ដែលពលករកូរ៉េខាងជើងរកបានគឺគេត្រូវប្រគល់ ក្នុងមួយភាគធំទៅឲ្យរដ្ឋអំណាចកូរ៉េខាងជើងផ្ទាល់។
មធ្យោបាយឃោសនាមហាជនរុស្ស៊ី ធ្លាប់បានលើកយកមកផ្សាយសំដីកម្មករកូរ៉េខាងជើងខ្លះ ដែលថា ប្រាក់ប្រមាណតែ៥០០ដុល្លារអាមេរិក ដែលគេអាចរកបានគឺគ្រប់គ្រាន់សម្រាប់ចិញ្ចឹមគ្រួសារគេដែលមានគ្នា៥នាក់ឲ្យរស់បានយ៉ាងសក្តិសមពេញក្នុង១ឆ្នាំ។
តាមតួលេខក្រៅផ្លូវការក្នុងអំឡុងជិត៦០ឆ្នាំ តាំងពីសង្គ្រាមនៅឧបទ្វីបកូរ៉េ បានចប់ទៅ មានពលរដ្ឋ កូរ៉េខាងជើងកុម្មុយនិស្ត ជាង២០.០០០នាក់ទៅហើយចេះរត់រួចទៅរស់នៅក្នុងប្រទេសកូរ៉េខាងត្បូងមូលធននិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ