ព្យុងយ៉ាងចោទសេអ៊ូលថា បានប្រឌិតរឿងឆ្កួតលីលា ដើម្បីបង្វែរចំណាប់អារម្មណ៍ប្រជាជនក្នុងស្រុក
កូរ៉េខាងជើងនៅថ្ងៃអាទិត្យនេះបានចោទប្រកាន់កូរ៉េខាងត្បូងបានបង្កើតរឿងយន្តហោះDrone ស៊ើបការណ៍ ដើម្បីបំបែរចំណាប់អារម្មណ៍របស់ប្រជាជនក្នុងស្រុក ពីរឿងអាស្រូវលិចសាឡាងនៅកូរ៉េខាងត្បូង។ កាលពីសប្តាហ៍មុន ក្រសួងការពារជាតិកូរ៉េខាងត្បូងបានលើកឡើងថា យន្តហោះDrone ដែលគេប្រើស៊ើបការណ៍ និងផ្ទុះធ្លាក់នៅកូរ៉េខាងត្បូង ធ្វើដំណើរចេញពីទឹកដីកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:១៦
ជាថ្មីម្តងទៀត កូរ៉េខាងជើងបានបដិសេធ ទាត់ចោលការចោទប្រកាន់ពីកូរ៉េខាងត្បូង ដែលថា កូរ៉េខាងជើងបានប្រើយន្តហោះDrone ទៅស៊ើបការណ៍ក្នុងទឹកដីកូរ៉េខាងត្បូង។ សម្រាប់ទីក្រុងព្យុងយ៉ាង សេអ៊ូលបានប្រឌិត បង្កើតរឿងនេះឡើង គ្រាន់តែដើម្បីបំបែរចំណាប់អារម្មណ៍របស់ប្រជាជនកូរ៉េខាងត្បូងតែប៉ុណ្ណោះ។ នៅក្នុងសេចក្តីថ្លែងការណ៍របស់ខ្លួន ដែលចេញផ្សាយនៅថ្ងៃនេះ គណៈកម្មការការពារជាតិកូរ៉េខាងជើង បានសរសេរថា លោកស្រីប្រធានាធិបតីប៉ាក់ គុនហេ របស់កូរ៉េខាងត្បូងបានព្យាយាមប្រឌិតរឿងឆ្កួតលីលា ដើម្បីអាចឲ្យខ្លួនចាកចេញពីវិបត្តិដែលមិនអាចដោះស្រាយរួច។
កូរ៉េខាងជើងចង់សំដៅវិបត្តិលិចសាឡាង នៅកូរ៉េខាងត្បូង ដែលនៅក្នុងនោះ រដ្ឋាភិបាលក្រុងសេអ៊ូលកំពុងរងការរិះគន់ពីក្រុមគ្រួសាររបស់ជនរងគ្រោះ។ នៅក្នុងគ្រោះថ្នាក់លិចសាឡាង កាលពីថ្ងៃទី ១៧មេសា កន្លងទៅ មនុស្សជាង៣០០នាក់ ដែលភាគច្រើនជាសិស្សសាលា បានស្លាប់ និងបាត់ខ្លួន។
នៅថ្ងៃអាទិត្យនេះ សមាជិកសភាកូរ៉េខាងត្បូង បានប្រកាសថា សភានឹងបើកការស៊ើបអង្កេតទៅលើគ្រោះថ្នាក់លិចសាឡាង។ តាមតុល្យការចុងក្រោយ នៅថ្ងៃអាទិត្យនេះ គេស្រង់យកបានសាកសព២៧៥នាក់ និង២៩នាក់ផ្សេងទៀត កំពុងបាត់ខ្លួន។ សកម្មភាពរុករកជនរងគ្រោះ នៅថ្ងៃអាទិត្យនេះត្រូវបានផ្អាក ដោយសារហេតុផលខ្យល់ព្យុះ និងទឹកហូរខ្លាំង។
យោងតាមប្រភពពីរដ្ឋាភិបាល និងបក្សប្រឆាំង សម័យប្រជុំសភាពិសេសមួយនឹងធ្វើឡើង ចាប់ពីថ្ងៃចន្ទ ដើមសប្តាហ៍ក្រោយ ដើម្បីពិនិត្យមើលរកមូលហេតុ និងអ្នកទទួលខុសត្រូវដែលធ្វើឲ្យសាឡាងលិច។ ក្រុមគ្រួសាររបស់ជនរងគ្រោះជាច្រើនបានបន្ទោសទៅលើសកម្មភាពយឺតយ៉ាវក្នុងការជួយស្រោចស្រង់ជនរងគ្រោះ នៅពេលសាឡាងលិចចូលទឹកភ្លាម។ គេជឿថា សិស្សសាលា ដែលស្ថិតនៅលើសាឡាង អាចរស់បានច្រើនម៉ោង និងច្រើនថ្ងៃ ដោយមកពីមានស្បោងខ្យល់ដែលបំរុងសម្រាប់ករណីមានគ្រោះអាសន្ន។ ប៉ុន្តែ សកម្មភាពជួយសង្រ្គោះមិនត្រូវបានធ្វើភ្លាមៗនោះទេ។ គ្រួសារជនរងគ្រោះបានចោទសួរថា ហេតុអ្វីបានគេត្រូវរង់ចាំពេលដល់ទៅ៣ថ្ងៃ ដើម្បីយកសាកសពទីមួយ ចេញពីសាឡាងលិចទឹក។
ការស៊ើបអង្កេតបឋមបានបង្ហាញថា ទម្ងន់ដែលសាឡាងផ្ទុកធ្ងន់ លើសបីដង ទម្ងន់ដែលគេកំណត់សម្រាប់សាឡាង។ លើសពីនោះ សាឡាងដែលលិច ធ្លាប់ត្រូវបានគេលួចកែច្នៃ ដោយខុសច្បាប់ បង្កើនបន្ទប់ដែលធ្វើឲ្យសាឡាងមិនអាចទ្រាំទ្រទម្ងន់បន្ថែមបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ