មនុស្ស៩នាក់ត្រូវបានចាប់ខ្លួនជុំវិញការវាយប្រហារលើអ្នកកាសែតហុងកុង
ប៉ូលិសហុងកុងបានប្រកាសឲ្យដឹង កាលពីថ្ងៃពុធថា គេបានចាប់ខ្លួនជនសង្ស័យ ៩នាក់ ដែលមានជាប់ពាក់ព័ន្ធទៅនឹងការវាយប្រហារទៅលើអ្នកកាសែតម្នាក់ កាលពីខែមុន។ ការវាយប្រហារយ៉ាងឃោរឃៅទៅលើអ្នកកាសែត ដែលបានបណ្តាលឲ្យកើតមានក្តីបារម្ភ ចំពោះសិទ្ធិសេរីភាពសារព័ត៌មាន នៅក្នុងទីក្រុងហុងកុង ដែលជាផ្នែកមួយនៃដែនដីរបស់ចិន។
ចុះផ្សាយនៅថ្ងៃ៖
លោក Kevin Lau អ្នកកាសែតជើងចាស់ហុងកុង ត្រូវបានមនុស្សពីរនាក់វាយប្រហារដោយកាប់ ៦កាំបិត បណ្តាលឲ្យរងរបួសធ្ងន់ធ្ងរ កាលពីថ្ងៃទី២៦ ខែកុម្ភៈ ហើយដែលកំពុងសម្រាកព្យាបាលនៅមន្ទីរពេទ្យនៅឡើយ រហូតមកទល់នឹងថ្ងៃនេះ។
ស្នងការប៉ូលិសហុងកុងបានឲ្យដឹងថា ក្រោយពីបានវាយប្រហារទៅលើលោក Kevin Lau ជនដៃដល់ទាំងពីររូបបាននាំគ្នារត់គេចខ្លួនទៅចិនដីគោក មុននឹងត្រូវអាជ្ញាធរចិនចាប់ខ្លួនបាន នៅក្នុងខេត្តក្វាងទុង។ មនុស្ស ៧រូបផ្សេងទៀត ដែលជាប់សង្ស័យថាបានសមគំនិតក្នុងការរៀបចំផែនការវាយប្រហារទៅលើអ្នកកាសែតនេះ ត្រូវបានចាប់ខ្លួន នៅក្នុងទឹកដីហុងកុង។
ប៉ូលិសហុងកុងក៏បានឲ្យដឹងផងដែរថា ជនសង្ស័យទាំងពីររូប ដែលនៅពេលនេះកំពុងជាប់ឃុំនៅចិនដីគោក មានជាប់ពាក់ព័ន្ធនឹងក្រុមសង្គមងងឹតចិន ហើយទំនងជាត្រូវបានគេជួលឲ្យធ្វើការវាយប្រហារទៅលើអ្នកកាសែត Kevin Lau ក៏ប៉ុន្តែ រហូតមកទល់នឹងពេលនេះ អាជ្ញាធរនៅមិនទាន់អាចកំណត់ច្បាស់លាស់នៅឡើយទេថា តើការវាយប្រហារនេះ មានជាប់ពាក់ព័ន្ធនឹងអាជីពជាអ្នកកាសែតរបស់លោកដែរឬក៏យ៉ាងណា?
ក៏ប៉ុន្តែ ភរិយារបស់លោក Kevin Lau បានអះអាងថា លោកស្រីជឿជាក់យ៉ាងច្បាស់ថា ស្វាមីរបស់លោកស្រីត្រូវទទួលរងការវាយប្រហារ ដោយសារតែការងារជាអ្នកកាសែតរបស់គាត់ ហើយបានទាមទារឲ្យអាជ្ញាធរវែកមុខរកឲ្យឃើញមេខ្លោង ដែលនៅក្រោយការវាយប្រហារនេះ។ សមាគមអ្នកកាសែតក្រុងហុងកុងវិញ ក៏បានចេញសេចក្តីថ្លែងការណ៍មួយដែរ កាលពីថ្ងៃពុធ ដោយសម្តែងនូវការភ្ញាក់ផ្អើល ដោយឃើញថា ប៉ូលិសហុងកុងហាក់ដូចជាចង់ព្យាយាមបង្វែររឿងវាយប្រហារលើអ្នកកាសែតនេះ ទៅជារឿងផ្ទាល់ខ្លួន ហើយមិនជាប់ពាក់ព័ន្ធនឹងការងារសារព័ត៌មាន។
គួរបញ្ជាក់ថា ក្រោយពីមានការវាយប្រហារទៅលើលោក Kevin Lau មនុស្សរាប់រយនាក់បាននាំគ្នាចេញធ្វើបាតុកម្ម ដើម្បីថ្កោលទោសចំពោះអំពើហិង្សាលើអ្នកកាសែត និងទាមទារឲ្យអាជ្ញាធរការពារសិទ្ធិសេរីភាពសារព័ត៌មាន។ សិទ្ធិសេរីភាពសារព័ត៌មាន ដែលគេបារម្ភថា កំពុងតែធ្លាក់ចុះ ដោយសារតែមានសម្ពាធពីអាជ្ញាធរក្រុងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ