បាតុករគាំទ្រខ្មែរកម្ពុជាក្រោមប្រើយុទ្ធសាសថ្មីប្រឆាំងនឹងទូតវៀតណាម
ក្រុមបាតុករ ប្រឆាំងនឹងស្ថានទូតវៀតណាម ក្នុងថ្ងៃពុធទី៨ នេះ បានយកស្ទីកឃ័រ ដែលមានរូបទង់ជាតិវៀតណាម និងរូបិយប័ណ្ណមកបិទលើកន្លែងអង្គុយរបស់ខ្លួន និងកន្លែងផ្សេងៗទៀត ជាការឆ្លើយតបទៅនឹងស្ថានទូវៀតណាម ដែលមិនចេញមកសុំទោសជាសាធារណៈចំពោះការលើកឡើងអំពីប្រវត្តិសាស្ត្រកម្ពុជាក្រោម។ នេះគឺជាបាតុកម្មថ្ងៃទី៥ ដែលជាថ្ងៃចុងក្រោយដើម្បីទាមទារឲ្យមានការសុំទោសជាសាធារណៈលើរឿងប្រវត្តិសាស្ត្រទឹកដីខ្មែរកម្ពុជាក្រោម។
ចុះផ្សាយនៅថ្ងៃ៖
ស្តាប់ - ០១:៥៤
ក្រោយពីមានការដុតទុងជាតិវៀតណាមជាបន្តបន្ទាប់ រហូតមកដល់ថ្ងៃនេះក្រុមបាតុករ បានជួបជុំគ្នានៅទីលានប្រជាធិបតេយ្យ ដោយមានបាតុករ និងព្រះសង្ឃចូលរួមប្រមាណ២០០នាក់។ សម្រាប់ព្រឹកនេះ ក្រុមបាតុករបាននាំគ្នាតាំងសមាធិនៅទីលានប្រជាធិបតេយ្យ ហើយក្រោយមកក្រុមបាតុករទាំងអស់បានប្រមូលផ្តុំគ្នា ដើម្បីហែរក្បួនទៅកាន់វត្តភ្នំ និងគោរពវិញ្ញាណក្ខនលោកយាយពេញផងដែរ។
ទោះបីជាព្រឹកនេះ មិនមានការដុតទង់ជាតិវៀតណាមក៏ដោយ ប៉ុន្តែក្រុមបាតុករបាននាំគ្នាយកស្ទីកឃ័រ ដែលមានរូបសញ្ញាបង្ហាញពីការឈប់ប្រើប្រាស់ផលិតផលវៀតណាម មកបិទនៅលើពូកម៉ូតូ បិទលើត្រនាប់ជើង និងខ្លះទៀតបានយកស្ទីកឃ័រទាំងនោះមកបិទជាប់នឹងខោរផ្នែកខាងក្រោយ។ ក្រៅពីការយកស្ទីកឃ័រមកបិទក្រុមបាតុករបានយករូបិយបណ្ណវៀតណាមមកបិទដូចគ្នានឹងការបិទស្ទីកឃ័រផងដែរ។ លោកគឹម កុសលជាអ្នកចូលរួមក្នុងបាតុកម្មនេះ បានបញ្ជាក់ថាលោកធ្វើបែបនេះ គឺដើម្បីឲ្យវៀតណាមចេញមកទទួលខុសត្រូវចំពោះរឿងរ៉ាវប្រតិ្តសាស្ត្រទឹកដីខ្មែរកម្ពុជាក្រោម។
ក្រៅពីការយកស្ទីកឃ័រមកបិទ ក្រុមបាតុករគ្រោងនឹងនាំគ្នាហែរក្បួនទៅកាន់មុខព្រះអង្គដង្កើរក្រោយពីចេញពីវត្តភ្នំ ដើម្បីបួងសួងឲ្យវត្ថុស័ក្ដិសិទ្ធិជួយការពារដល់ប្រជាពលរដ្ឋខ្មែរកម្ពុជាក្រោម។ បើតាមការលើកឡើងរបស់អ្នកចូលរួមលោកគឹម កុសល បានបន្តថាក្រុមបាតុករនឹងធ្វើដំណើរទៅកាន់ស្ថានទូតវៀតណាមជាថ្មីម្តងទៀតនៅថ្ងៃត្រង់នេះ ដោយមានការចែកខិតប័ណ្ណមួយចំនួននៅតាមផ្លូវទៅកាន់ស្ថានទូតវៀតណាមផងដែរ។
សូមបញ្ជាក់ថា ក្រសួងការបរទេសវៀតណាមក៏បានថ្កោលទោសម្តងរួចមកហើយ កាលពីថ្ងៃទី១៣ ខែសីហា កន្លងមកនេះ លើការដុតទង់ជាតិរបស់ខ្លួននៅមុខស្ថានទូតវៀតណាមក្នុងទីក្រុងភ្នំពេញកាលពីថ្ងៃទី១២ ខែសីហា។ នេះគឺជាបាតុកម្មលើកទី២ ហើយរបស់សមាគន៍ខ្មែរកម្ពុជាក្រោម ក្រោយពីមន្ត្រីស្ថានទូតវៀតណាមប្រចាំនៅកម្ពុជាម្នាក់មិនបានមកសុំទោសជាសាធារណៈចំពោះការលើកឡើងរបស់ខ្លួនដែលថាទឹកដីកម្ពុជាក្រោមជារបស់វៀតណាមជាយូរមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ