កិច្ចចរចារុស្ស៊ី-ជប៉ុន ដើម្បីសាកល្បងដោះស្រាយជាថ្មី បញ្ហាដែនដីជាប់វិវាទ
នៅថ្ងៃចន្ទនេះ នៅទីក្រុងម៉ូស្គូ លោកអនុរដ្ឋមន្ត្រីការបរទេសរុស្ស៊ី Igor Morgoulov បានទទួលជួបពិភាក្សាជាមួយ សមភាគីជប៉ុនលោក Singuke Sugiyama ក្នុងគោលដៅស្តារឡើងវិញ កិច្ចចរចាជុំវិញកោះបួននៅខាងត្បូងជួរកោះគួរីល ដែលជប៉ុនចាត់ទុកជាដែនដីខាងជើងរបស់ខ្លួន ហើយរមែងទាមទារពីរុស្ស៊ី ឲ្យប្រគល់ទៅខ្លួនវិញ។ មកពីបញ្ហានេះ ប្រទេសទាំងពីរនៅមិនទាន់ចុះនឹងគ្នានៅឡើយ ជា “សន្ធិសញ្ញាសន្តិភាព” ហេតុដែលរាំងរាដល់ការពង្រីកទំនាក់ទំនងសេដ្ឋកិច្ចទ្វេភាគី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
គួរនិយាយថា កោះបួនតូចៗនោះ មានផ្ទៃក្រឡាសរុបតែ ៥.០០០គម២ ប៉ុណ្ណោះ។ វាបានឆ្លងមកនៅក្រោមអធិបតេយ្យសហភាពសូវៀត ក្រោយពីជប៉ុនចាញ់សង្គ្រាមលោកលើកទី២ ក្នុងឆ្នាំ១៩៤៥ ហើយបច្ចុប្បន្ន ជាកម្មសិទ្ធិសហព័ន្ធរុស្ស៊ី ដែលបន្តកេរពីសហភាពសូវៀត។ សព្វថ្ងៃរស់នៅលើកោះទាំងនោះ មានបណ្តាជនតែម្តុំ២ម៉ឺននាក់ ប៉ុន្តែតាមមតិពួកអ្នកប្រាជ្ញ វាបង្កប់នៅក្រោមទឹកវា គឺកំណប់ដ៏សម្បូណ៏នៃប្រេងកាតនិងឧស្ម័នធម្មជាតិ ដោយមិនទាន់និយាយពីជលផលបែបយ៉ាងក្តាមសមុទ្រ ដែលក្នុង១ឆ្នាំៗ មាននេសាទបានក្នុងទឹកប្រាក់ដល់ជាង ២.០០០លានដុល្លារអាមេរិកទៅផង។ មិនតែប៉ុណ្ណោះវាក៏ជាឈ្នាន់យុទ្ធសាស្ត្រដ៏សំខាន់របស់កងនាវារុស្ស៊ី ដែលប្រចាំនៅមហាសមុទ្រប៉ាស៊ីហ្វិក។
ថ្លែងទៅកាន់គូសន្ទនាជប៉ុន លោកអនុរដ្ឋមន្ត្រីការបរទេសរុស្ស៊ី Igor Morgoulov លើកឡើងថា៖ គឺស្របនឹងការព្រមព្រៀងគ្នានៅម៉ូស្គូ កាលពីខែមេសាឆ្នាំនេះ រវាងលោកប្រធានាធិបតីរុស្ស៊ីពូទីន និងលោកនាយករដ្ឋមន្ត្រីជប៉ុន Shinzo Abe ដែលឥឡូវគូភាគីចាប់ផ្តើមពិនិត្យទៅលើដំណាក់កាល និងបែបបទសំខាន់ៗនៃអនាគតកិច្ចចរចា ឆ្ពោះទៅចុះជា“សន្ធិសញ្ញាសន្តិភាព”។ ទីក្រុងម៉ូស្គូសង្ឃឹមថា ការងាររួមគ្នា នឹងជួយបំផុសបំផុលភាពជាដៃគូរបស់យើង នៅតាមវិស័យប្លែកៗបំផុត។
លោកអនុរដ្ឋមន្ត្រីការបរទេសជប៉ុន Singuke Sugiyama ពីចំណែកខ្លួន ថ្លែងជាអាទ៏៖“មានមនោសញ្ចេតនាដែលថា ជប៉ុននិងរុស្ស៊ីជាមិត្តដ៏ជំនិតនឹងគ្នាទេតើ”។
ជាការកត់សម្គាល់ ទំនាក់ទំនងជប៉ុន-រុស្ស៊ី បានស្រុតចុះត្រជាក់មែនទែន ក្រោយពីលោកមេដវេដេវ កាលពី៣ឆ្នាំមុន ពេលគាត់កាន់តំណែងជាប្រធានាធិបតីរុស្ស៊ី ស្រាប់តែបានយកជើងទៅជាន់ជាលើកដំបូង លើកោះជាប់វិវាទនោះ ហេតុដែលបានញ៉ាំង លោកនាយករដ្ឋមន្ត្រីជប៉ុន កាលណោះ គឺលោក Naoto Kan ឲ្យទម្លាយកំហឹងចេញមក ហៅទស្សនកិច្ចប្រមុខរដ្ឋរុស្ស៊ីនោះ ថាជា” ការប្រមាថមិនអាចអត់ឱនបាន”។
ខាងពាណិជ្ជកម្មរុស្ស៊ី ជាដៃគូត្រឹមទី១៥ប៉ុណ្ណោះរបស់ជប៉ុន។ ទោះយ៉ាងណាក្តី ក៏ទំហំផ្តោះប្តូរពាណិជ្ចកម្ម រវាងប្រទេសទាំងពីរក្នុងឆ្នាំមុន បានមានទឹកប្រាក់ដល់ទៅ ៣២.០០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ