ចាប់តាំងពីឆ្នាំ២០០៤ វិទ្យាស្ថានជាតិប្រជាធិបតេយ្យ សម្រាប់កិច្ចការអន្តរជាតិ ហៅកាត់ថា NDI បានរៀបចំកិច្ចពិភាក្សារវាងអ្នកតំណាងរាស្ត្រ និងប្រជាពលរដ្ឋម្ចាស់ឆ្នោត ដោយមានការចូលរួមពីគ្រប់គណបក្សនយោបាយ ដែលបានជាប់ឆ្នោត។ ប៉ុន្តែនៅឆ្នាំ២០១៤ នេះ លោក លី សុធារ៉ាយុត្តិ អ្នកគ្រប់គ្រងកម្មវិធី របស់វិទ្យាស្ថានជាតិ NDI បានលើកឡើងថា ដោយតែសភាជាតិ បច្ចុប្ប្នន្ន មានគណបក្សតែមួយ ទើប NDI បានរៀបចំកិច្ចពិភាក្សា រវាងក្រុមប្រឹក្សាឃុំសង្កាត់ ជាមួយនឹងម្ចាស់ឆ្នោតជំនួសវិញ។ កិច្ចពិភាក្សា តាមមូលដ្ឋាន ក្នុងរយៈពេល ១០ ឆ្នាំ មកនេះ NDI បានផ្តល់វេទិកាឲ្យប្រជាពលរដ្ឋម្ចាស់ឆ្នោត លើកឡើងនូវទុក្ខកង្វល់ជាច្រើន រួមមាន៖ បញ្ហាដីធ្លី កង្វះប្រព័ន្ធធារាសាស្ត្រសម្រាប់ដំណាំកសិកម្ម និងបញ្ហាហេដ្ឋារចនាសម្ព័ន្ធផ្លូវថ្នល់ ជាដើម ដាក់ទៅកាន់តំណាងរាស្ត្រជាប់ឆ្នោត ដើម្បីដោះស្រាយ។
