លិចសាឡាងកូរ៉េខាងត្បូង៖បុគ្គលិកបម្រើការក្នុងសាឡាង ៤នាក់ជាប់ចោទពីបទមនុស្សឃាតដោយអចេតនា
នៅកូរ៉េខាងត្បូង ១ខែ ក្រោយគ្រោះថ្នាក់លិចសាឡាងមួយកាលពីថ្ងៃទី១៦ មេសាកន្លងមក មានបុគ្គលិកបម្រើការក្នុងសាឡាងនោះចំនួន ៤នាក់ទើបត្រូវបានតុលាការចោទប្រកាន់ពីបទមនុស្សឃាតដោយអចេទនាដែលនឹងអាចទទួលទោសប្រហារជីវិត។ សូមជម្រាបជូនថា គ្រោះថ្នាក់លិចសាឡាងកាលពី ១ខែមុនបានបណ្តាលឲ្យមានមនុស្សស្លាប់ និងបាត់ខ្លួនជាង ៣០០នាក់នៅក្នុងចំណោមអ្នកដំណើរទំាង ៤៧៦នាក់ ក្នុងនោះភាគច្រើនជាសិស្សសាលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
នៅក្នុងចំណោមជនជាប់ចោទទំាង ៤នាក់នោះ មានកាពីទែនបើកសាឡាងម្នាក់ អ្នកធ្វើនាវាចរណ៍ចំនួន ២នាក់ និងអ្នកជួសជុលគ្រឿងយន្តម្នាក់។ អ្នកទំាង ៤នាក់បានជាប់ចោទពីបានរត់ចោលសាឡាងដែលកំពុងលិច និងក្រោយពីបានចេញបញ្ជាមិនឲ្យអ្នកដំណើរលោតចេញពីសាឡាងនោះ។ ឆ្មំាសមុទ្របានផ្សព្វផ្សាយខ្សែអាត់វីដេអូមួយដែលបង្ហាញរូបថតកាពីទែនពាក់អាវធំ និងខោខ្លីដែលកំពុងរត់ចេញពីសាឡាងចំពេលដែលសាឡាងកំពុងផ្អៀងលិចសន្សឹមៗចូលក្នុងសមុទ្រ។ ក្រៅពីការចោទប្រកាន់លើអ្នកទំាង ៤នាក់ តុលាការក៏កំពុងបន្តការស៊ើបអង្កេតលើបុគ្គលិកបម្រើការចំនួន ១១នាក់ផ្សេងទៀតដែរ។ នៅកូរ៉េខាងត្បូង ទង្វើមនុស្សឃាតដោយអចេតនាត្រូវទទួលទោសប្រហារជីវិត តែទោសនេះកម្រនឹងឃើញអនុវត្តន៍ជាក់ស្តែងណាស់។ សព្វថ្ងៃ មានអ្នកទោសប្រហារជីវិតចំនួន ៦០នាក់ដែលកំពុងរង់ចំាថ្ងៃប្រហារជីវិតពួកគេ។
តុល្យការផ្លូវការចុងក្រោយនៃគ្រោះថ្នាក់លិចសាឡាងកាលពីថ្ងៃទី១៦ មេសាកន្លងទៅ មានស្លាប់ ២៨១នាក់ និងបាត់ខ្លួនចំនួន ២៣នាក់នៅក្នុងចំណោមអ្នកដំណើរទំាង ៤៧៦នាក់ដែលភាគច្រើនជាកូនសិស្សមកពីសាលាតែមួយស្ថិតក្បែរទីក្រុងសេអ៊ូល។ យោងតាមអ្នកនំាពាក្យឆ្មំាសមុទ្រ ក្រុមអ្នកជួយសង្រ្គោះទើបស្រង់បានសាកសពចំនួន ៤នាក់ទៀតនៅថ្ងៃពុធ ទី១៤ ឧសភា។ លទ្ធផលដំបូងនៃការស៊ើបអង្កេតបានបញ្ជាក់ថា សាឡាងនោះបានដឹកលើសចំណុះពីសមត្ថភាពរបស់ខ្លួន និងការដែលថៅកែបានធ្វើការកែប្រែរចនាសម្ព័ន្ធមួយចំនួនរបស់សាឡាង។
យ៉ាងណាក៏ដោយ ក្រុមគ្រួសាររបស់ជនរងគ្រោះសិស្សសាលាបានស្តីបន្ទោសពីភាពយឺតយ៉ាវក្នុងការជួយសង្រ្គោះ និងបានទាមទារឲ្យរដ្ឋអំណាចបំភ្លឺជុំវិញការរៀបចំ គ្រប់គ្រងវិធានការសង្រ្គោះ។ គួរជម្រាបជូនថា នៅក្រោយគ្រោះថ្នាក់លិចសាឡាង មានមនុស្ស ២០នាក់ត្រូវបានចាប់ខ្លួន ក្នុងនោះមាន ១៦នាក់ជាបុគ្គលិកបម្រើការក្នុងសាឡាង និង ៤នាក់ជាថ្នាក់ដឹកនំាក្រុមហ៊ុន។ លោកស្រីប្រធានាធិបតីប៉ាក់ គុនហឺបានធ្វើការសុំទោសចំពោះក្រុមគ្រួសារជនរងគ្រោះ រីឯលោកនាយករដ្ឋមន្រ្តីជុង ហុងវ៉ុនបានលាចុះពីមុខតំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ