វិបត្តិអ៊ុយក្រែន-គ្រីមេ ៖ រុស្ស៊ីវាយប្រហារតាមផ្លូវយោធា និងតាមប្រព័ន្ធអ៊ីនធ័រនែត ?
ក្នុងបរិបទដែលគ្រីមេ កំពុងរៀបចំបោះឆ្នោតប្រជាមតិភ្ជាប់ខ្លួននឹងរុស្ស៊ី អង្គការអូតង់បានប្រកាសថា មានការវាយប្រហារតាមអ៊ីនធ័រនែត លើវិបសៃត៍របស់ខ្លួន នៅយប់ថ្ងៃសៅរ៍ឆ្លងចូលថ្ងៃអាទិត្យនេះ។ ប៉ុន្តែអ្នកទទួលខុសត្រូវអង្គការ បានអះអាងគ្មានប៉ះពាល់ដល់ប្រតិបត្តិការយោធាទេ។
ចុះផ្សាយនៅថ្ងៃ៖
ស្តាប់ - ០១:៤២
គឺជាការវាយប្រហារមិនឱ្យរកឃើញទំព័រវិបសៃត៍របស់អង្គការអូតង់ មានអ្នកចូលមើលច្រើនទាល់តែគាំងតែម្តង ! គេហទំព័ររបស់អង្គការ nato.int. មិនអាចបើកចេញតាំងពីរំលងអាធ្រាត្រមក។ អស័យដ្ឋានអ៊ីនធ័រនែតសំខាន់ៗផ្សេងៗទៀតរបស់តូអង់ មានជាអាទិ៍វិបសៃត៍របស់ក្រុមហ៊ុនការពារសន្តិសុខសុវត្ថិភាព នៅប្រទេសអេស្តូនី ក៏រងការវាយប្រហារដែរ។ ការវាយប្រហារធ្វើឡើងក្នុងខណៈដែលក្រុមអ្នកបច្ចេកទេសកំពុងសាកល្បងជួសជុលវិបសៃត៍របស់អង្គការឱ្យមានដំណើរការជាធម្មតាឡើងវិញ។
ការវាយប្រហារនេះ គឺជាស្នាដៃរបស់ចលនាអ៊ុយក្រែនមួយក្រុម ដែលមានឈ្មោះថា « Cyber Berkut” ដោយអះអាងថាជាសកម្មភាពជាតិនិយមអ៊ុយក្រែន មិនចង់ឃើញកម្លាំងអូតង់ចូលឈ្លានពានអ៊ុយក្រែន។ តាមការពិត បែរគូតនេះ ជាឈ្មោះរបស់កម្លាំងកម្លាំងប៉ូលិសប្រឆាំងនឹងអំពើហិង្សារបស់អ៊ុយក្រែន ដែលទើបត្រូវបានរដ្ឋាភិបាលអ៊ុយក្រែនថ្មីរំលាយចោល ពីបទបានបាញ់សម្លាប់បាតុករជាងដប់នាក់ ក្នុងអំឡុងពេលបាតុកម្មនៅក្រុងគៀវប្រឆាំងនឹងប្រធានាធិបតីចាស់ វិចទ័រ យ៉ាណូកូវិច។
បើតាមអ្នកឯកទេសប្រឆាំងនឹងការវាយប្រហារអ៊ីនធ័រនែត ក្រុមបែរគូតនេះ ធ្លាប់វាយប្រហារវិបសៃត៍អ៊ុយក្រែននិងរុស្ស៊ី កាលពីសប្តាហ៍មុន។ ម្យ៉ាងវិញទៀត ការវាយប្រហារអ៊ីនធ័រនែតនេះ កើតឡើងជួនចំពេលដែលរុស្ស៊ីនិងអូតង់ និងបស្ចឹមលោកតានតឹងដាក់គ្នាខ្លាំង ដោយសារវិបត្តិអ៊ុយក្រែន។
ប៉ុន្មានឆ្នាំចុងក្រោយនេះ គេសង្ស័យថាក្រុមចោរអ៊ីនធ័រនែតរុស្ស៊ី បានវាយប្រហារវិបសៃត៍ជាច្រើនរបស់អេស្តូនី កាលពីឆ្នាំ២០០៧ ពេលប្រទេសទាំងពីរមានជម្លោះនឹងគ្នា ហើយនៅឆ្នាំ២០០៨ ពេលមានជម្លោះរវាងរុស្ស៊ីនិងហ្ស័កហ្ស៊ី ក៏មានការវាយប្រហារបិទវិបសៃត៍ដូច្នេះដែរ តែម៉ូស្គូតែងបដិសេធជារៀងរហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ