គជប៖ការពិនិត្យបញ្ជីឈ្មោះនិងចុះឈ្មោះបោះឆ្នោតប្រចាំឆ្នាំ២០១៤គឺអនុវត្តភារកិច្ចតាមតែច្បាប់ប៉ុណ្ណោះ
គណៈកម្មាធិការជាតិរៀបចំការបោះឆ្នោត គជប បានចេញសេចក្តីថ្លែងការណ៍ បញ្ជាក់ថា ការពិនិត្យបញ្ជីឈ្មោះ និងចុះឈ្មោះបោះឆ្នោត ប្រចាំឆ្នាំ២០១៤ គឺគជប អនុវត្តភារកិច្ច តាមតែច្បាប់ប៉ុណ្ណោះ។ សេចក្តីថ្លែងការណ៍ជាចំហរដូច្នេះ ត្រូវបានគជប ធ្វើឡើងតបទៅនឹងការលើកឡើងថា ការពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំ២០១៤ ដែលនឹងត្រូវអនុវត្តដោយគជប គឺជាការមិនចាំបាច់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
សេចក្តីថ្លែងការណ៍ ចុះថ្ងៃទី២ ខែកញ្ញា ឆ្នាំ២០១៤ គជប បានបំភ្លឺជូនសាធារណជន ២ ចំណុច។ ទី១ គជប សំអាងថា បច្ចុប្បន្ន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងច្បាប់ស្តីពីវិសោធកម្មនៃច្បាប់នេះ កំពុងស្ថិតនៅជាធរមាននៅឡើយ ហើយមាត្រា ៤៩ ថ្មី ( បី ) កថាខ័ណ្ឌទី២ នៃច្បាប់នេះ ចែងថា "រយៈពេលនៃការពិនិត្យបញ្ជីឈ្មោះ និងការចុះឈ្មោះបោះឆ្នោត និងការផ្តល់សុពលភាពលើបញ្ជីបោះឆ្នោត ត្រូវធ្វើ ចាប់ពីថ្ងៃទី១ ខែតុលា រហូតដល់ថ្ងៃទី៣១ ខែធ្នូ ជារៀងរាល់ឆ្នាំ"។ ហេតុនេះ គជប មានតួនាទីអនុវត្តភារកិច្ចរបស់ខ្លួន ដែលច្បាប់ប្រគល់ឲ្យធ្វើ។
គជប ក៏បានបញ្ជាក់ក្នុងសេចក្តីថ្លែងការណ៍ នៅចំណុចទី២ ថា មាត្រា ៣១ ថ្មី ( ពីរ ) នៃច្បាប់ស្តីពីវិសោធនកម្មនៃច្បាប់បោះឆ្នោតជ្រើសតាំងតំណាងរាស្ត្រ ក៏បានចែងដែរថា ប្រធាន អនុប្រធាន និងសមាជិកនៃគណៈកម្មាធិការជាតិរៀបចំការបោះឆ្នោត ត្រូវបន្តការងាររបស់ខ្លួន រហូតដល់មានការតែងតាំងថ្មី។ ក្នុងករណីខកខាន មិនបានរៀបចំសមាសភាពនៃគណៈកម្មាធិការរៀបចំការបោះឆ្នោត គជប តាមពេលវេលាដូចបានបញ្ញត្តក្នុងវក្យខ័ណ្ឌទី៣ មាត្រា ១៣ថ្មី ( ពីរ )មិនបានរៀបចំសមាសភាពនៃគជប ដែលមានស្រាប់ ត្រូវបន្តការងារ និងមានសមត្ថកិច្ច ចាត់ចែងរៀបចំការបោះឆ្នោតជ្រើសតាំងតំណាងរាស្ត្រ និងការបោះឆ្នោតផ្សេងទៀត តាមច្បាប់តម្រូវ។
គជប បានគូសបញ្ជាក់ថា "ការអនុវត្តនូវការពិនិត្យបញ្ជីឈ្មោះ និងចុះឈ្មោះបោះឆ្នោត ប្រចាំឆ្នាំ២០១៤ ដែលនឹងត្រូវចាប់ផ្តើមពីថ្ងៃទី១ ដល់ថ្ងៃទី២០ ខែតុលា ឆ្នាំ២០១៤ គឺជាការអនុវត្តតាមច្បាប់ ដែលនៅជាធរមាន។ ទន្ទឹមនឹងនេះ គជប ក៏បានអំពាវនាវដល់បងប្អូនប្រជាពលរដ្ឋទាំងអស់ ចូលរួមក្នុងការពិនិត្យបញ្ជីឈ្មោះ និងចុះឈ្មោះបោះឆ្នោតឲ្យបានគ្រប់ៗគ្នា។
ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១៤ នៅតាមឃុំសង្កាត់ ចាប់ពីថ្ងៃទី១ ខែតុលា ដល់ថ្ងៃទី២០ ខែតុលា។ តាមគជប អ្នកបោះឆ្នោតថ្មី នៅឆ្នាំ២០១៤ ចាប់ពីអាយុ ១៨ ឆ្នាំឡើង ដែលមានសិទ្ធិបោះឆ្នោត មានចំនួន ៩.៩៥១.៩១៥ នាក់។ រីឯចំនួនអ្នកបោះឆ្នោត ក្នុងបញ្ជីឆ្នាំ២០១៣ មានចំនួន ៩.៧៣២.៥៣១ នាក់។
ក៏ប៉ុន្តែសង្គមស៊ីវិលមួយចំនួន និងគណបក្សប្រឆាំង បានជំទាស់នឹងការងាររបស់គជប ព្រោះ គណបក្សប្រជាជនកម្ពុជា និងគណបក្សសង្គ្រោះជាតិ បានព្រមព្រៀងគ្នាហើយ ក្នុងការជ្រើសរើសគជបថ្មី និងធ្វើបញ្ជីឈ្មោះអ្នកបោះឆ្នោតថ្មី។ គជបថ្មី និងបញ្ជីឈ្មោះអ្នកបោះឆ្នោតថ្មី នឹងត្រូវគណបក្សទាំងពីរ បង្កើតក្នុងពេលឆាប់ៗខាងមុខ គឺយ៉ាងយូរ នៅចុងឆ្នាំនេះ។
ម្យ៉ាងទៀតដំណើរការធ្វើបច្ចុប្បន្នភាពបញ្ជីឈ្មោះអ្នកបោះឆ្នោតប្រចាំឆ្នាំ ត្រូវបានសង្គមស៊ីវិលលើកឡើងថា គជប ត្រូវចំណាយយ៉ាងហោចណាស់ ១ លានដុល្លារ។
ប៉ុន្តែលោក ឈាង វុន អ្នកតំណាងរាស្ត្រគណបក្សប្រជាជនកម្ពុជា និងជាអ្នកនាំពាក្យរដ្ឋសភា លើកឡើងថា ការងាររបស់ស្ថាប័នរដ្ឋ ដូចជា គជប មិនអាចឈប់ស្ងៀមបានទេ។ គជបត្រូវធ្វើការជាប្រចាំ ហើយបន្តការងាររបស់ខ្លួន រហូតដល់មានអ្នកថ្មី មកជំនួស ដូចកិច្ចព្រមព្រៀងរវាងគណបក្សទាំងពីរ និងច្បាប់ បានកំណត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ