ក្រុមអ្នករត់ម៉ូតូឌុបតវ៉ាប្រឆាំងប្រធានមជ្ឈមណ្ឌលសិទ្ធិមនុស្ស ក្នុងរឿងស្ត្រីអ្នកភូមិបឹងកក់
នៅព្រឹកថ្ងៃចន្ទ ទី៣១ ខែធ្នូនេះ សមាគមរួមគ្នាដើម្បីអភិវឌ្ឍន៍កម្ពុជា ដែលជាក្រុមអ្នករត់ម៉ូតូឌុប និងម៉ូតូកង់បី ប្រឆាំងនឹងអ្នកស្រី យ៉ោម បុប្ផា ស្ត្រីអ្នកតវ៉ាដីធ្លី នៅបឹងកក់ បានលើកគ្នាទៅប្រមូលផ្តុំ តវ៉ានៅមុខមជ្ឈមណ្ឌលសិទ្ធិមនុស្សកម្ពុជា ប្រឆាំងលោក អ៊ូ វីរៈ។ ក្រុមអ្នកតវ៉ាប្រមាណ ៥០ នាក់ បានទាមទារឲ្យលោក អ៊ូ វីរៈ កែតម្រូវនូវសម្តី ក្នុងបទសម្ភាសន៍ជាមួយអ្នកកាសែត ដែលលោកថា រឿងអ្នកស្រី យ៉ោម បុប្ផា ដែលត្រូវតុលាការកាត់ទោសដាក់ពន្ធនាគារ ៣ ឆ្នាំ ក្នុងរឿងវាយលើអ្នករត់ម៉ូតូឌុប ២ នាក់ កាលពីដើមខែកញ្ញា គឺជារឿងប្រឌិត រៀបចំឡើងដោយក្រុមអ្នករត់ម៉ូតូឌុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ក្រុមអ្នករត់ម៉ូតូឌុប ដែលបានតវ៉ា លើកបដា និងស្រែកមេក្រូ នៅព្រឹកមិញ បានដាក់លិខិតមួយច្បាប់ ទៅកាន់លោក អ៊ូ វីរៈ និងសុំជួបលោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា ដើម្បីកែតម្រូវនូវការផ្តល់បទសម្ភាសន៍របស់លោកជាមួយអ្នកកាសែត កាលពីចុងសប្តាហ៍មុន ជុំវិញករណីស្ត្រីបឹងកក់ អ្នកស្រី យ៉ោម បុប្ផា។
ក្រុមអ្នកតវ៉ាអះអាងថា លោក អ៊ូ វីរៈ បានចោទប្រកាន់ថា ក្រុមអ្នករត់ម៉ូតូឌុបបានប្រឌិតរឿង ដើម្បីទម្លាក់កំហុសចោទប្រកាន់លើអ្នកស្រី យ៉ោម បុប្ផា ពីបទបង្ករបួសស្នាមដោយចេតនា តាមរយៈការព្រួតគ្នាវាយទៅលើអ្នករត់ម៉ូតូឌុប ពីរនាក់ កាលពីថ្ងៃទី៤ ខែកញ្ញា ឆ្នាំ២០១២។
រហូតដល់ថ្ងៃ២៧ ខែធ្នូ អ្នកស្រី យ៉ោម បុប្ផា ត្រូវបានតុលាការផ្តន្ទាទោសដាក់ពន្ធនាគារ ៣ ឆ្នាំ។ ក្នុងរឿងក្តីនោះ លោក អ៊ូ វីរៈ ដែលបានតាមឃ្លាំមើល តាំងពីដើមរៀងមក បានចាត់ទុកថា ជាការប្រឌិតរឿង ហើយមានអ្នកបង្គាប់ប្រាប់ឲ្យជនរងគ្រោះជាអ្នករត់ម៉ូតូឌុប និងសាក្សី ឆ្លើយ ទម្លាក់កំហុសលើស្ត្រីអ្នកតវ៉ាដីធ្លី នៅបឹងកក់ អ្នកស្រី យ៉ោម បុប្ផា។
ក្រុមអ្នករត់ម៉ូតូឌុប នៅព្រឹកមិញ បានទាមទារជួបផ្ទាល់ជាមួយនឹងលោក អ៊ូ វីរៈ ប៉ុន្តែលោក អ៊ូ វីរៈ មិនចេញមកជួប ដោយគ្រាន់តែខាងមជ្ឈមណ្ឌលរបស់លោក បានទទួលយកនូវលិខិតតវ៉ានោះ។
កាលពីខែកញ្ញា ក្រុមអ្នករត់ម៉ូតូឌុប និងម៉ូតូកង់បីនេះ ក៏បានធ្វើការតវ៉ាដូចគ្នា ប្រឆាំងនឹងលោក អំ សំអាត ប្រធានផ្នែកស៊ើបអង្កេតរបស់អង្គការសិទ្ធិមនុស្សលីកាដូ ពាក់ព័ន្ធនឹងការបញ្ចេញមតិយោបល់ លើករណីអ្នកស្រី យ៉ោម បុប្ផា ផងដែរ។
ក្រុមអង្គការសិទ្ធិមនុស្ស យល់ថា ក្រុមអ្នករត់ម៉ូតូឌុប ដែលបានតវ៉ានោះ បង្កើតឡើងដោយអាជ្ញាធរ ដើម្បីទំនាស់ និងគាបសង្កត់ លើអ្នកភូមិបឹងកក់ កុំឲ្យងើបតវ៉ា ក្នុងរឿងដីធ្លី នៅបឹងកក់។
នៅព្រឹកថ្ងៃចន្ទនេះដែរ ក្រុមស្ត្រីរស់នៅសហគមន៍ភូមិបឹងកក់ ដែលមានជម្លោះដីធ្លី ក៏បានប្រមូលផ្តុំ បែបន់តាមបែបអបិយជំនឿ លើកបដា និងបាចអំបិល ដាក់បណ្តាសា លើមន្ត្រីតុលាការ ដែលអ្នកភូមិអះអាងថា ពុករលួយ និងកាត់ក្តីមិនយុត្តិធម៌។
ការជួបជុំតវ៉ា នៅមុខតុលាការ ក្រុងភ្នំពេញ នៅព្រឹកថ្ងៃចន្ទនេះ ជាលើកទី២ហើយ បន្ទាប់ពីអ្នកភូមិបឹងកក់ បានប្រមូលផ្ដុំ អុជធូប បែបន់ និងដាក់បណ្តាសាដូចគ្នានេះ នៅមុខរូបសំណាកលោកយាយដូនពេញ នៅវត្តភ្នំ កាលពីព្រឹកថ្ងៃសុក្រ ទី២៨ ខែធ្នូ ឆ្នាំ២០១២។
អ្នកភូមិបឹងកក់ បានចាត់ទុកការសម្រេចក្តីរបស់ចៅក្រមតុលាការសាលាដំបូង រាជធានីភ្នំពេញ ដែលបានផ្តន្ទាទោសដាក់ពន្ធនាគារលើអ្នកស្រី យ៉ោម បុប្ផា ចំនួន ៣ ឆ្នាំ ក្នុងរឿងបង្ករបួសស្នាម ព្រួតគ្នាវាយទៅលើបុរសអ្នករត់ម៉ូតូឌុបពីរនាក់ ថាជារឿងអយុត្តិធម៌ ហើយទាមទារឲ្យតុលាការ សើរើរឿងនោះ ឡើងវិញ និងដោះលែងអ្នកស្រី យ៉ោម បុប្ផា ដែលជាស្ត្រីសកម្មជនអ្នកតវ៉ាដីធ្លី នៅបឹងកក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ