កូរ៉េខាងត្បូង ៖ សាឡាងលិច អ្នកដំណើរជិត៣០០នាក់បាត់ដំណឹង
មានស្លាប់យ៉ាងហោចណាស់ ៣នាក់ នៅកូរ៉េខាងត្បូង ក្នុងគ្រោះលិចសាឡាងមួយគ្រឿងមានផ្ទុកអ្នកដំណើរ ៤៧៧ នាក់ ភាគច្រើនជាសិស្សវិទ្យាល័យ។ នេះបើតាមតុល្យការបណ្តោះអាសន្នដំបូង ! ជនរងគ្រោះអាចនឹងមានចំនួនកើនឡើងទៀត ព្រោះនៅ មានអ្នកដំណើរប្រមាណ៣០០នាក់ទៀត មិនទាន់ស្រង់បាន។ ឆ្មាំសមុទ្ទ ទូកទំនិញនៅក្បែរៗនោះ កំពុងសហការគ្នាធ្វើប្រតិបត្តិការជួយសង្គ្រោះ ក្នុងមហាសាគរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
"សាឡាង មានជើងចម្លងជាប្រចាំ ពីកំពង់ផែ អ៊ីនឆេអុង ទៅកាន់កោះទេសចរណ៍ ហ្សេហ្ស៊ុយ ដែលស្ថិតនៅភាគខាងត្បូងឧបទ្វីប បានលិចបាត់ក្នុងសមុទ្ទ ក្នុងរយៈពេលតែប៉ុន្មានម៉ោងប៉ុណ្ណោះ។ នៅក្នុងរូបភាពដំបូងបញ្ចាំងតាមកញ្ចក់ទូរទស្សន៍កូរ៉េ គេឃើញ សាឡាង Sewol ដេកលើទឹក បន្តិចក្រោយមកសាឡាងក៏ក្រឡាប់ ដាំក្បាលចុះ និងជាចុងក្រោយ ក្នុងរយៈពេលប្រមាណកន្លះម៉ោងក្រោយ សាឡាងក៏លិចបាត់។
បើតាមសាក្សី ដែលបានផ្សព្វផ្សាយតាមទូរទស្សន៍ មានអ្នកជិះជាច្រើននាក់រត់ចេញមិនទាន់ពេលសាឡាងកំពុងក្រឡាប់ អាចត្រូវជាប់កុនឈ្លក់ទឹកស្លាប់ក្នុងសាឡាង។ ទឹកដែលមានសីតុណ្ហភាពតែ១២ដឺក្រេ។ ដូច្នេះតុល្យការនៃជនរងគ្រោះអាចនឹងធ្ងន់ធ្ងរខ្លាំង។ អ្នកបាត់បង់ជីវិតពីរនាក់ដំបូង ម្នាក់ជាស្រីបុគ្គលិករបស់សាឡាងនិងម្នាក់ទៀតជាក្មេងជំទង់ស្លាប់ពេលទៅដល់មន្ទីរពេទ្យ។
សូមបញ្ជាក់ថាសាឡាងចម្លងនេះ មានផ្ទុកអ្នកដំណើរសរុប ៤៧៧នាក់ ក្នុងនោះ ៣២៤នាក់ជាសិស្សវិទ្យាល័យ ដឹកនាំដោយគ្រូបង្រៀន១៤នាក់ទៅធ្វើដំណើរកំសាន្តសិក្សា កោះប្រវត្តិសាស្ត្រ ហ្សេហ្ស៊ុយ និងអ្នកបុគ្គលិក ២៩នាក់ ព្រមទាំងរថយន្ត១៥០គ្រឿង។
ក្រុមឆ្មាំសមុទ្ទបានចាប់ផ្តើមធ្វើប្រតិបត្តិការសង្គ្រោះភ្លាម ក្នុងទ្រង់ទ្រាយធំ ដោយមានជំនួយពីឧទ្ធម្ភាគចក្រ១៨គ្រឿង និងនាវាជាង៣០គ្រឿង ខ្លះជានាវាដឹកទំនិញ ខ្លះជានាវាយោធា។
គេនៅមិនទាន់ដឹកច្បាស់អំពីមូលហេតុបង្កឱ្យមានគ្រោះថ្នាក់លិចសាឡាងនេះនៅឡើយទេ។ ប៉ុន្តែ ទំនងជាបណ្តាលមកពីមានការបុកទង្គិច ឬប៉ះកើលដុំថ្ម។ បើតាមសំដីសិស្សសាលាម្នាក់ អះអាងថាបានឮស្នូរបុកផាំងស្ទើរបែកក្រដាសត្រចៀក បន្តដោយសំឡេងអំពាវនាវរបស់បុគ្គលិក ឱ្យនាំអ្នកដំណើរលោតចេញសាឡាង។ អាវពោងសុវត្ថិភាពត្រូវបានចែកចាយដល់គ្រប់អ្នកដំណើរ។ ឯប្រតិបត្តិការសង្គ្រោះកំពុងបន្តស្វែងរកអ្នកបាត់ខ្លួន៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ