ក្រសួងធម្មការនិងសាសនា៖ ទង្វើរបស់លោកធាន វុទ្ធី គ្រាន់តែជាកំហុស ដែលកើតឡើងដោយគ្មានការពិចារណាគ្រប់គ្រាន់
នៅក្នុងសេចក្ដីថ្លែងការណ៍ចុះថ្ងៃទី៨ខែសីហា ក្រសួងធម្មការនិងសាសនា បានចាត់ទុកទង្វើរបស់បុគ្គលធាន វុទ្ធី ដែលបានតាំងខ្លួនជាព្រះសិអារ្យមេត្រី ថា គ្រាន់តែជាកំហុស ដែលកើតឡើងដោយគ្មានការពិចារណាគ្រប់គ្រាន់។ ទៅថ្ងៃមុខ ក្នុងករណីដែលបុគ្គលធាន វុទ្ធី ប្រព្រឹត្តទង្វើដែលផ្ទុយពីការពិតនៅក្នុងច្បាប់រដ្ឋ និងព្រះពុទ្ធសាសនាទៀត បុគ្គលធាន វុទ្ធីនេះ នឹងត្រូវទទួលទោសចំពោះមុខច្បាប់។ យ៉ាងណាក៏ដោយ ក្រសួងមិនបានបញ្ជាក់ទេថា តើបុគ្គលធាន វុទ្ធីនេះ ត្រូវប្រឈមមុខនឹងទោសទណ្ឌអ្វីខ្លះ នៅចំពោះមុខអំពើដែលបានធ្វើកន្លងមក។
ចុះផ្សាយនៅថ្ងៃ៖
ស្តាប់ - ០២:២៤
ក្រសួងធម្មការ និងសាសនា នៅថ្ងៃទី៨ខែសីហា បានចេញសេចក្ដីថ្លែងការណ៍រួមមួយ ជាមួយគណៈសង្ឃនាយក និងគណៈអភិបាលខេត្តកណ្ដាល ដោយចាត់ទុកទង្វើរបស់បុគ្គលធាន វុទ្ធី ដែលបានប្រព្រឹត្តកន្លងមកនេះ ថាជាកំហុសដែលកើតឡើងដោយមិនមានការពិចារណាគ្រប់គ្រាន់ និងមិនបានយល់ច្បាស់អំពីច្បាប់រដ្ឋ និងធម៌វិន័យនៃព្រះពុទ្ធសាសនា។
សេចក្ដីថ្លែងការណ៍រួមនេះ ចេញផ្សាយបន្ទាប់ពី បុគ្គលធាន វុទ្ធី បានឆ្លើយសារភាពទទួលស្គាល់កំហុស មិនគេចវេស និងបានធ្វើកិច្ចសន្យាឈប់ប្រព្រឹត្តផ្ទុយពីអ្វីដែលជាការពិត នៅក្នុងច្បាប់រដ្ឋ និងព្រះពុទ្ធសាសនាតទៅទៀត។ ហើយក្នុងករណីដែលបុគ្គលធាន វុទ្ធី មិនគោរពតាមកិច្ចសន្យារបស់ខ្លួន ដែលបានផ្តិតមេដៃទទួលស្គាល់កំហុស កាលពីថ្ងៃទី៧ខែសីហា នោះនឹងត្រូវទទួលទោសចំពោះមុខច្បាប់។ យ៉ាងណាក៏ដោយ ក្រសួងមិនបានបញ្ជាក់ទេថា តើបុគ្គលធាន វុទ្ធីនេះ ត្រូវប្រឈមមុខនឹងទោសទណ្ឌអ្វីខ្លះ នៅចំពោះមុខអំពើដែលបានធ្វើកន្លងមក។
ព្រះតេជព្រះគុណ ប៊ុត ប៊ុនទិញ ប្រធានបណ្ដាញព្រះសង្ឃឯករាជ្យដើម្បី យុត្តិធម៌សង្គម បានហៅបុគ្គលធាន វុទ្ធី ថាជាបុគ្គលពាលក្នុងសាសនា។ ហើយថា បុគ្គលដែលបានតាំងខ្លួនជាព្រះសិអារ្យមេត្រីនេះ គួរតែត្រូវបានពិន័យតាមច្បាប់ព្រហ្មទណ្ឌកម្រិតធ្ងន់មួយ។ ប៉ុន្តែ បើតាមលោកមេធាវីសុក សំអឿន ប្រធានអង្គការច្បាប់ការពារសិទ្ធិកម្ពុជា ទង្វើរបស់បុគ្គលធាន វុទ្ធី ប្រសិនបើត្រូវចោទពីបទឆបោកមែននោះ គឺត្រូវទទួលទោសព្រហ្មទណ្ឌ កម្រិតមជ្ឈឹមតែប៉ុណ្ណោះ។ លោកសុក សំអឿន៖
ដោយឡែក ចំពោះវត្តទួលរាជា ក្រសួងធម្មការនិងសាសនា គណៈសង្ឃនាយក និងអាជ្ញាធរខេត្តកណ្ដាល នឹងរៀបចំនិមន្តព្រះសង្ឃមកគង់នៅ ព្រមទាំងបង្កើតគណៈកម្មការអាចារ្យវត្ត សម្រាប់គ្រប់គ្រងឲ្យបានត្រឹមត្រូវតាមទំនៀមទម្លាប់ ប្រពៃណី ព្រះពុទ្ធសាសនា និងច្បាប់របស់រដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ