ក្រសួងរ៉ែនិងថាមពលនៅតែបន្តគម្រោងជាយអារ៉ែងបើទោះបីមានការតវ៉ា
ក្រសួងរ៉ែនិងថាមពលនៅថ្ងៃទី៣០ កញ្ញានេះ បានធ្វើសន្និសីទកាសែតព័ត៌មានមួយបំភ្លឺលើគម្រោងវារីអគ្គីសនីស្ទឹងជាយអារ៉ែង ក្នុងខេត្តកោះកុងដែលចម្រូងចម្រាសរវាងរដ្ឋាភិបាល សង្គមស៊ីវិល និងប្រជាពលរដ្ឋ។ យ៉ាងណាក៏ដោយរដ្ឋាភិបាលប្រកាសថានៅតែបន្តគម្រោងនេះដដែល ហើយគ្រោងនេះនឹងដាក់ឱ្យដំណើការនៅចុងឆ្នាំ២០២០ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ក្រសួងឧស្សាហកម្មរ៉ែនិងថាមពលបានប្រកាសថាខ្លួននៅតែរក្សាជំហរបន្តគម្រោងអភិវឌ្ឍន៍ទំបន់វារីអគ្គីសនីស្ទឹងជាយអារ៉ែងដដែលបើទោះបីជាមានយុទ្ធនាការប្រឆាំងនឹងការអភិវឌ្ឍនៅតំបន់ធម្មជាតិនេះក៏ដោយ។ នេះបើតាមការបញ្ជាក់ពីលោក អ៊ិតប្រាំងរដ្ឋលេខាធិការក្រសួងរ៉ែ និងថាមពលក្នុងសន្និសីទសារព័ត៌មាន។ ការអភិវឌ្ឍទំនប់វារីអគ្គីសនីនេះលោកអ៊ិតប្រាំងបានបញ្ជាក់ថាជាផ្នែកមួយនៃការគិតគូរផ្នែកសេដ្ឋកិច្ចដែលកម្ពុជាត្រូវការអគ្គីសនីជាចាំបាច់។
លោកបន្តថា គ្រោងដែលមានទឹកប្រាក់ប្រមាណ៤០០លានដុល្លារអាមេរិកនេះ នេះ នឹងផ្តល់ផលជាច្រើនដូចជាថាមពលអគ្គីសនីប្រមាណជិត៦០០លានគីឡូវ៉ាត់ម៉ោងជារៀងរាល់ឆ្នាំ ចំណូលពន្ធ ការបង្កើតតំបន់អេកូទេសចរណ៍ និងការចែកចាយអគ្គីសនីក្នុងតំលៃថោកជាដើម។ ប៉ុន្តែលោកបានលើកឡើងថា គម្រោងអភិវឌ្ឍន៍ដែលបានសិក្សាតាំងពីឆ្នាំ២០០៦មក នៅមិនទាន់បញ្ចប់ការសិក្សាលំអិតនៃគម្រោងដែលជាជំហ៊ានទី២ក្នុងការដោះស្រាយផលប៉ះពាល់ទាំងនោះនៅឡើយទេ។
តំបន់ជាយអារ៉ែងនេះមានសត្វបក្សី ថនិកសត្វ និងល្មូន រួមទាំងមច្ឆាជាតិជាង២រយប្រភេទ និងត្រូវការជម្លៀសប្រជាពលរដ្ឋចេញប្រមាណជាង១ពាន់៣រយនាក់ ក្នុងបីឃុំ និង៧ភូមិដែលនឹងប៉ះពាល់ដល់វត្តអារាមចំនួន៣ សាលារៀនចំនួន៦កន្លែង និងទ្រព្យសម្បតិ្តរបស់ពលរដ្ឋជាច្រើនទៀត។ ហើយអ្នកទាំងនោះ ភាគច្រើនជាជនជាតិភាគតិច។ គម្រោងអភិវឌ្ឍន៍វារីអគ្គីសនីជាយអារ៉ែងនេះ ត្រូវការផ្ទៃដីអាងទឹកប្រមាណជាង ៩ពាន់ ៤រយហិកតា ក្នុងនោះមានព្រៃស្រោង៨៧៤ហិកតា និងព្រៃពាក់កណ្តាលស្រោង៣ពាន់៧រយ៩០ ហិកតាជាដើម។
សូមបញ្ជាក់ថាការអភិវឌ្ឍនៅតំបន់ស្ទឹងជាយអារ៉ែងនេះ សង្គមស៊ីវិលដែលធ្វើការងារបរិស្ថាន និងប្រជាពលរដ្ឋនៅតំបន់នោះផ្ទាល់ រហូតដល់សមាជិកសភាគណបក្សសង្គ្រោះជាតិទៀតផង បានប្រិតិកម្មប្រឆាំងនឹងការអភិវឌ្ឍន៍នេះ ដោយអះអាងថាមានផលប៉ះពាល់ទៅលើតំបន់ធម្មជាតិប៉ែកខាងលិចប្រទេសនេះជាខ្លាំង។ ជាពិសេសសត្វព្រៃ ព្រៃជំនឿនៃជនជាតិភាគតិច និងការព្រួយបារម្ភនឹងអពើពុករលួយនៃការកាប់ព្រៃនៅតំបន់ជាយអារ៉ែង រួមទាំងការអភិវឌ្ឍជាចិរភាពនៅតំបន់ព្រៃធម្មជាតិនោះឬយ៉ាងណា។ ហើយម្យ៉ាវិញទៀត សង្គមស៊ីវិលក៏បានព្រួយបារម្ភលើគម្រោងរើលំនៅដ្ឋានថ្មី ថាតើប្រជាពលរដ្ឋដែលរងផលប៉ះពាល់នឹងទទួលបានការអភិវឌ្ឍសមរម្យពីរដ្ឋាភិបាលដែរឬទេ។
បើទោះបីជារដ្ឋាភិបាលប្រកាន់ជំហរបន្តគម្រោងវារីអគ្គីសនីជាយអារ៉ែងក៏ដោយ ប៉ុន្តែលោកអ៊ិតប្រាំង រដ្ឋលេខាធិការក្រសួងរ៉ែ និងថាមពល ប្រកាសថា នឹងថ្លឹងថ្លែងពីផលប៉ះពាល់ និងផលចំណេញ មុននឹងការអនុវត្តគម្រោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ