ក្រសួងបរិស្ថានដកហូតដីសម្បទានសេដ្ឋកិច្ចពីក្រុមហ៊ុន ៩ បន្ថែមទៀត!
ក្រសួងបរិស្ថានបានប្រកាសនៅថ្ងៃទី ១៧ តុលានេះ ថា ក្រសួងបានដកហូតដីសម្បទានសេដ្ឋកិច្ចពីក្រុមហ៊ុនចំនួន ៩ ហើយសម្រួលចំនួន ២ ក្រុមហ៊ុន បន្ថែមពីលើក្រុមហ៊ុន ៨ ដែលក្រសួងបានប្រកាសកាលពីពេលកន្លងទៅចំនួន។ សង្គមស៊ីវិលបានសាទរចំពោះការដកហូតនេះ ប៉ុន្តែ ស្នើឲ្យក្រសួង និងរដ្ឋាភិបាលគិតគូរបន្ថែមពីសហគមន៍ប្រជាពលរដ្ឋដែលរងផលប៉ះពាល់ដោយសារដីសម្បទានសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
លោករដ្ឋមន្ត្រីក្រសួងបរិស្ថាន សាយ សំអាល់ បានប្រកាសនៅក្នុងសន្និសីទសារព័ត៌មាននៅ រសៀលថ្ងៃសុក្រ ទី ១៧ តុលានេះថា ក្រសួងបានដកហូតដីសម្បទានសេដ្ឋកិច្ចចំនួន ១១ នៅក្នុងខេត្តមណ្ឌលគិរីចំនួន ៣ ខេត្តកំពង់ស្ពឺ និងខេត្តព្រះសីហនុចំនួន ៣ ខេត្តបន្ទាយមានជ័យចំនួន១ ខេត្តព្រះវិហារ និងខេត្តកំពង់ធំចំនួន ១ ខេត្តឧត្តមានជ័យចំនួន ១ ខេត្តបាត់ដំបងចំនួន ១ និងខេត្តក្រចេះចំនួន ។
ការដកហូតដីសម្បទានសេដ្ឋកិច្ចទំហំរាប់ម៉ឺនហិចតានៅពេលនេះ ត្រូវបានធ្វើឡើងបន្ទាប់ពី ក្រសួងពិនិត្យទៅឃើញថា ក្រុមហ៊ុនអស់ទាំងនេះ មិនបានគោរពទៅតាមគោលការណ៍ព្រមព្រៀងជាមួយនឹងរដ្ឋាភិបាល ក្នុងការយកដីទាំងអស់នោះទៅធ្វើការអភិវឌ្ឍ។ ចំណែកក្រុមហ៊ុនខ្លះទៀតបានធ្វើឲ្យប៉ះពាល់ដល់ប្រជាពលរដ្ឋរស់នៅក្នុងតំបន់នោះ។ នេះជាវិធានការថ្មីទៀតដែលរដ្ឋាភិបាលបានចាត់ឡើងចំពោះក្រុមហ៊ុនដីសម្បទានសេដ្ឋកិច្ច។ ដីសម្បទានសេដ្ឋកិច្ចដែលតែងបង្កបញ្ហាក្តៅគគុកចំពោះបរិស្ថាននិងប្រជាជននៅក្នុងតំបន់នោះ។
ចំណាត់ការថ្មីៗទាំងនេះបានទទួលការសាទរពីអ្នកធ្វើការពាក់ព័ន្ធបញ្ហាដីធ្លី។ យ៉ាងណាក៏ដោយ លោក ឡាត់ គី ប្រធានផ្នែកដីធ្លី របស់អង្គការអាដហុក បានបញ្ជាក់ប្រាប់វិទ្យុបារាំងថា កន្លងមកមានក្រុមហ៊ុនជាច្រើនដែលទទួលដីសម្បទានសេដ្ឋកិច្ចពីរដ្ឋាភិបាលកម្ពុជា តែ មិនបានគោរពតាមគោលការត្រឹមត្រូវនោះទេ។ ក្រុមហ៊ុនខ្លះមិនត្រឹមតែព្រៃឈើដូនតារបស់ប្រជាជនភាគតិចប៉ុណ្ណោះទេ ប៉ុន្តែថែមទាំងកាប់បំផ្លាញព្រៃឈើនៅក្នុងតំបន់អភិរក្សថែមទៀតផង។
លោកបានបន្តថា រដ្ឋាភិបាលគួរតែយកចិត្តទុកដាក់ពីផលប៉ះពាល់ដល់ប្រជាពលរដ្ឋ នៅក្នុងសហគមន៍ដែលមានជម្លោះជាមួយនិងក្រុមហ៊ុនឲ្យបានច្រើនជាងនេះ ព្រោះកន្លងមក បញ្ហាភាគច្រើនរបស់ពួកគាត់មិនត្រូវបានដោះស្រាយនោះទេ។ សូមបញ្ជាក់ថា កន្លងមករដ្ឋាភិបាលកម្ពុជា បានផ្តល់ដីសម្បទានសេដ្ឋកិច្ចដល់ក្រុមហ៊ុនចំនួន ១១១ ក្រោមការទទួលខុសត្រូវពីក្រសួងបរិស្ថាន។ ចាប់តាំងពីរដ្ឋមន្ត្រីថ្មីឡើងកាន់តំណែង វិធានការមួយចំនួនត្រូវបានចាត់ឡើងជាបន្តបន្ទាប់ ប៉ុន្តែ គេមិនទាន់ដឹងថាវិធានការទាំងនោះមានប្រសិទ្ធភាពកម្រិតណានៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ