ក្រសួងព័ត៌មានអំពាវនាវឱ្យហ្វេសប៊ុកចែករំលែកតែព័ត៌មានពិត
នៅក្រោយការបោះឆ្នោត ខណៈដែលស្ថានការណ៍នយោបាយ ហាក់ដូចជាតានតឹង ពេលនេះ ក្រសួងព័ត៌មាន បានចេញសេចក្តីអំពាវនាវទៅកាន់ប្រព័ន្ធផ្សព្វផ្សាយនានា ពិសេសបណ្តាញទំនាក់ទំនងសង្គម អោយចុះផ្សាយព័ត៌មាន ធ្វើអត្ថាធិប្បាយ និងចែករំលែកព័ត៌មាន ដោយផ្អែកតាមព័ត៌មានពិតជាក់ស្តែង ប្រកបដោយវិជ្ជាជីវៈ និងលើកកម្ពស់សីលធម៌ ជាដើម។ ក្នុងសេចក្តីអំពាវនាវចុះថ្ងៃទី១៥ សីហា ក្រសួងព័ត៌មានក៏បានដាស់តឿនដល់ប្រព័ន្ធផ្សព្វផ្សាយទាំងអស់ ត្រូវរួមគ្នាចៀសវាងការចុះផ្សាយព័ត៌មាន និងការចែករំលែកព័ត៌មាន ដែលមិនមានប្រភពច្បាស់លាស់ បំប៉ោង បំភិតបំភ័យ ញុះញង់ អុជអាល ប៉ុនប៉ងឲ្យមានអំពើហិង្សា និងការភ័យខ្លាចក្នុងសង្គម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រសួងព័ត៌មានអំពាវនាវឱ្យប្រព័ន្ធផ្សព្វផ្សាយ និងបណ្តាញទំនាក់ទំនងសង្គមដូចជាហ្វេសប៊ុក គោរពវិជ្ជាជីវៈសារព័ត៌មាន និងផ្សព្វផ្សាយនូវព័ត៌មានពិតប្រាកដ ចៀសវៀងការញុះញង់អុជអាល ដែលបង្កការភ័យខ្លាចក្នុងសង្គម។
ក្នុងលិខិតចុះផ្សាយ កាលយប់ពីថ្ងៃទី១៥ សីហា ដែលវិទ្យុបារាំងអន្តរជាតិទទួលបាន ក្រសួងព័ត៌មានបានឱ្យដឹងថា ដើម្បីរក្សានូវស្ថិរភាពសង្គម និងការពារនូវបាតុភាពដែលនាំដល់អំពើហិង្សានោះ គ្រប់ប្រព័ន្ធផ្សពផ្សាយ និងបណ្តាញទំនាក់ទំនងសង្គមដែលគេចង់សំដៅលើ ហ្វេសប៊ុក នោះ ត្រូវឈរលើភាពជាក់លាក់ត្រឹមត្រូវ ដោយផ្អែកតាមព័ត៌មានពិតជាក់ស្តែងប្រកបដោយវិជ្ជាជីវៈ នឹងមិនចុះផ្សាយព័ត៌មាន និងចែករំលែកបន្តក្នុងសង្គមហ្វេសប៊ុក។
ប្រការដែលព័ត៌មានទាំងអស់ឈរលើភាពជាក់លាក់ មិនបំផ្លើសនេះហើយ ដែលក្រសួងព័ត៌មានបានអះអាងថា នឹងចៀសវាងបាននូវការបំប៉ោង បំភិតបំភ័យ ញុះញង់អុជអាលប៉ុនប៉ងឱ្យមានអំពើហិង្សា និងការភ័យខ្លាចក្នុងសង្គម។ ប្រព័ន្ធបណ្តាញសង្គមហ្វេសប៊ុកដែលបច្ចុប្បន្ន បានក្លាយទៅជាឧបករណ៍ឃោសនានយោបាយ និងឧបករណ៍បំពងសម្លេងយ៉ាងមានសក្តានុពលក្នុងសង្គមខ្មែរ ដែលប្រជាពលរដ្ឋខ្មែរភាគច្រើន ជាយុវជនជាអ្នកប្រើប្រាស់។
នេះជាសេចក្តីអំពាវនាវលើកទី៣ហើយ ដែលចេញបន្តបន្ទាប់គ្នា ទាំងស្ថាប័នព្រះមហាក្សត្រ និងក្រសួងមហាផ្ទៃ ក្រោយប្រទេសកម្ពុជាបានបោះឆ្នោតជ្រើសរើសតំណាងរាស្ត្រ ថ្ងៃទី២៨ កក្កដាថ្មីៗនេះ។ គួររំលឹកថា កាលពីថ្ងៃទី៧ សីហាកន្លងទៅនេះ ព្រះមហាក្សត្រខ្មែរ សម្តេចព្រះបរមនាថនរោត្តម សីហមុនី ក៏បានអំពាវគណបក្សប្រជាជនកម្ពុជា និងគណបក្សសង្គ្រោះជាតិ បន្តពិភាក្សាដោះស្រាយភាពមិនប្រក្រតីនៃការបោះឆ្នោត។ ចំណែកឯក្រសួងមហាផ្ទៃវិញ ថែមទាំងបានព្រមានដល់លោក សម រង្ស៊ី ប្រធានគណបក្សប្រឆាំង ឱ្យទទួលខុសត្រូវលើឧបទ្ទវហេតុ ប្រសិនបើគណបក្សមួយនេះហ៊ានធ្វើបាតុកម្មប្រឆាំងនឹងលទ្ធផលបោះឆ្នោតមែននោះ។
គេនៅចាំបានថា ថ្ងៃទី២៨ កក្កដានោះហើយ ដែលកម្ពុជាបានចាប់ផ្តើមស្គាល់សារជាថ្មីនៅកំដៅតានតឹងផ្នែកនយោបាយ ដោយសារគណបក្សឈ្នះឆ្នោតក្នុងសភាទាំងពីរ មិនព្រមចូលតុចរចារដើម្បីដោះស្រាយភាពមិនប្រក្រតីនៃការបោះឆ្នោត និងដោយសារការចល័តកម្លាំងប្រដាប់អាវុធ និងគ្រឿងសព្វាវុធធុនធ្ងន់ នៅទីក្រុងភ្នំពេញ។
យ៉ាងណាក៏ដោយ ការអំពាវនាវរបស់ក្រសួងព័ត៌មានឱ្យប្រព័ន្ធផ្សព្វផ្សាយ និងបណ្តាញទំនាក់ទំនងសង្គម គោរពវិជ្ជាជីវៈ និងផ្អែកលើព័ត៌មានពិតប្រាកដនាពេលនេះ ជាការក្រើនរំលឹកដល់អ្នកប្រើប្រាស់ និងអ្នកទទួលដំណឹង អោយចេះថ្លឹងថ្លែងមុននឹងចែកចាយព័ត៌មានដោយផ្អែកលើស្មារតីផលប្រយោជន៍ជាតិជាធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ