ក្រុមសកម្មជនសន្តិភាពបានទាមទារឲ្យមានការផ្តល់រង្វាន់ណូបែលសន្តិភាពដល់ប្រជាជនជប៉ុនទំាងអស់
នៅពេលដែលរដូវរៀបចំផ្តល់រង្វាន់ណូបែលឈានជិតមកដល់ ពិសេសរង្វាន់ណូបែលសន្តិភាព ក្រុមសកម្មជនសន្តិភាពបាននំាគ្នាធ្វើយុទ្ធនាការទាមទារឲ្យមានការផ្តល់រង្វាន់ណូបែលសន្តិភាពសម្រាប់ឆ្នំា ២០១៤ ដល់ប្រជាជនជប៉ុនទំាងមូល។ ការទាមទារយ៉ាងដូចនេះមកពីពួកគេយល់ថា ជប៉ុនជាប្រទេសតែមួយគត់ដែលបានប្រកាន់យករដ្ឋធម្មនុញ្ញសន្តិភាពនិយមអស់ជាច្រើនឆ្នំាកន្លងមកហើយ។ តែការទាមទារត្រូវបានធ្វើឡើង ចំពេលដែលរដ្ឋាភិបាលជប៉ុនរបស់លោកនាយករដ្ឋមន្រ្តីស៊ីនហ្សូ អាបេបានប្រកាសធ្វើកំណែទម្រង់ច្បាប់រដ្ឋធម្មនុញ្ញរបស់ប្រទេសដើម្បីពង្រីកតួនាទីកងទ័ពជប៉ុននៅលើឆាកអន្តរជាតិ។
ចុះផ្សាយនៅថ្ងៃ៖
ស្តាប់ - ០២:១៦
អ្នកដែលបានផ្តួចផ្តើមឲ្យមានគំនិតនេះឡើង គឺជាជនជាតិជប៉ុនមានឈ្មោះ ណាវកូ តាកាស៊ូ អាយុ ៣៧ឆ្នំា។ លោកតាកាស៊ូដែលបានប្រាប់ឲ្យដឹងថា គំនិតរបស់លោកបានកើតឡើង បន្ទាប់ពីលោកបានមើលបទយកការណ៍មួយតាមទូរទស្សន៍ស្តីពីការផ្តល់រង្វាន់ណូបែលសន្តិភាពឲ្យសហភាពអឺរ៉ុប។ បទយកការណ៍នោះបានធ្វើឲ្យលោកតាកាស៊ូនឹកឃើញដល់មាត្រាទី៩ នៃច្បាប់រដ្ឋធម្មនុញ្ញជប៉ុនអនុម័តក្នុងឆ្នំា ១៩៤៧ដែលតម្រូវឲ្យជប៉ុនមិនធ្វើសង្រ្គាម។ អ៊ីចឹងហើយបានជាគិតមកដល់ចុងសប្តាហ៍នេះ ក្រុមអ្នករៀបចំយុទ្ធនាការទាមទារឲ្យមានការផ្តល់រង្វាន់ណូបែលសន្តិភាពឲ្យប្រជាជនជប៉ុនប្រមែប្រមូលបានហត្ថលេខីគំាទ្រចំនួនជាង ១៥ម៉ឺននាក់។ គឺជាចំនួនដ៏ច្រើនសម្បើមមួយដែលក្រុមសកម្មជនសន្តិភាពយល់ឃើញថា ប្រជាជនជប៉ុនទំាង ១២៨លាននាក់នឹងអាចឈរឈ្មោះជាបេក្ខជនដើម្បីទទួលរង្វាន់ណូបែលសន្តិភាពសម្រាប់ឆ្នំា ២០១៤។
អ្វីជាការកត់សម្គាល់ កាលពីដើមខែកក្កដាកន្លងទៅ រដ្ឋាភិបាលជប៉ុនរបស់លោកនាយករដ្ឋមន្រ្តីស៊ីនហ្សូ អាបេទើបបានប្រកាសឲ្យដឹងពីការសម្រេចចិត្តជាប្រវត្តិសាស្រ្តក្នុងការធ្វើកំណែទម្រង់ច្បាប់រដ្ឋធម្មនុញ្ញរបស់ប្រទេសដើម្បីអនុញ្ញាតឲ្យកងទ័ពជប៉ុនមានលទ្ធភាពក្នុងការចូលរួមប្រតិបត្តិការក្រៅប្រទេសជាមួយកម្លំាងសម្ព័ន្ធមិត្ត ឬក៏ជួយសម្ព័ន្ធមិត្តដែលទទួលរងការវាយប្រហារ។ តែលោកស៊ីនហ្សូ អាបេបានចេញមុខធានានៅពេលថ្មីៗនេះថា ជប៉ុននឹងមិនចូលប្រឡូកក្នុងសង្រ្គាមដើម្បីការពារប្រទេសបរទេសណាមួយទេ។ យ៉ាងណាក៏ដោយ ការសម្រេចចិត្តរបស់លោកស៊ីនហ្សូ អាបេបានបង្កឲ្យមានភាពក្តៅក្រហាយពីប្រជាជនជប៉ុនមួយភាគធំ ពិសេសពីប្រទេសចិនដែលកំពុងមានជម្លោះដណ្តើមទីប្រជុំកោះជាមួយជប៉ុន។
រីឯក្រុមសកម្មជនសន្តិភាពក៏បានប្រឆំាងនឹងការសម្រេចចិត្តរបស់រដ្ឋាភិបាលក្រុងតូក្យូដែរ ដោយពួកគេបានអះអាងថា គឺដោយសារតែមាត្រាទី៩ នៃច្បាប់រដ្ឋធម្មនុញ្ញសន្តិភាពនិយមអនុម័តក្នុងឆ្នំា ១៩៤៧ កាលណោះឯងដែលបានអនុញ្ញាតឲ្យជប៉ុនមិនស្គាល់សង្រ្គាមក្នុងរយៈពេលជាង ៦៩ឆ្នំា។ លទ្ធផលនៃការស្ទង់មតិចុងក្រោយឲ្យដឹងថា មានប្រជាជនជប៉ុនជាងពាក់កណ្តាលចង់បន្តរក្សាច្បាប់រដ្ឋធម្មនុញ្ញសន្តិភាពនិយម។ យ៉ាងណាក៏ដោយ ឈ្មោះមនុស្ស ឬអង្គការដែលត្រូវទទួលរង្វាន់ណូបែលសន្តិភាពឆ្នំា ២០១៤ នឹងត្រូវប្រកាសឲ្យដឹងនៅខែតុលាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ