នៅទីបំផុត ទង់ជាតិប៉ាឡេស្ទីនត្រូវបង្ហូតឡើង នៅអង្គការសហប្រជាជាតិ
នៅថ្ងៃពុធ នេះ ជាលើកទី១ ក្នុងប្រវត្តិសាស្រ្ត ទង់ជាតិប៉ាឡេស្ទីនត្រូវដាក់បង្ហូតឡើង ជាផ្លូវការ នៅទីស្នាក់ការអង្គការសហប្រជាជាតិ ក្នុងក្រុងញូវយ៉ក។ កាលពីថ្ងៃទី ១០កញ្ញា ប្រទេស១១៩ បោះឆ្នោត គាំទ្រជាឯកច្ឆន្ទ សេចក្តីសម្រេចចិត្តរបស់អង្គការសហប្រជាជាតិ ដែលអនុញ្ញាតឲ្យគេទង់ជាតិប៉ាឡេស្ទីន នៅ អមជាមួយទង់ជាតិរបស់ប្រទេសសមាជិកពេញសិទ្ធិរបស់អង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៤
ទង់ជាតិប៉ាឡេស្ទីន នឹងបក់រវិច ជាមួយនឹងទង់ជាតិ របស់ប្រទេសផ្សេងទៀត ដែលជាសមាជិកពេញសិទ្ធិរបស់អង្គការសហប្រជាជាតិ។ ប្រជាជនប៉ាឡេស្ទីនមានមោទនភាពខ្លាំង ព្រោះថា ការទទួលស្គាល់រដ្ឋប៉ាឡេស្ទីន នៅឆាកអន្តរជាតិ គឺជាអ្វីដែលប៉ាឡេស្ទីន។
ពិធីបង្ហូត ទង់ជាតិ ពណ៌ក្រហម ខ្មៅ ស និងបៃតងនឹងធ្វើឡើង នៅក្បែរដងទង់ជាតិរបស់វ៉ាទីកង់ នៅសួនច្បារ របស់ទីស្នាក់ការអង្គការសហប្រជាជាតិ គឺនៅក្រោយការឡើងថ្លែងសុន្ទរកថា របស់លោកប្រធានរដ្ឋអំណាចប៉ាឡេស្ទីនម៉ាម៉ូដ អាបាស។ តាំងពីថ្ងៃពុធ គឺនៅមួយថ្ងៃ មុន ពិធីបង្ហូតទង់ជាតិប៉ាឡេស្ទីន នៅក្នុងអត្ថបទរបស់លោក ចុះផ្សាយក្នុងកាសែតHuffington Post លោកប្រធានរដ្ឋប៉ាឡេស្ទីន ម៉ាម៉ូដ អាបាសបានចាត់ទុកព្រឹត្តិការណ៍ នៅថ្ងៃពុធ ថា ជាថ្ងៃរំភើប និងមោទនភាព សម្រាប់ប្រជាជនប៉ាឡេស្ទីនទាំងមូល។
សម្រាប់ប្រធានរដ្ឋប៉ាឡេស្ទីន ជនជាតិប៉ាឡេស្ទីនបានដើរនយោបាយសន្តិភាព ដើម្បី ទាមទារឲ្យមានទង់ជាតិរបស់ខ្លួន នៅទីស្នាក់ការអង្គការសហប្រជាជាតិ។
នៅប៉ុន្មានឆ្នាំចុងក្រោយនេះ ដោយសារដំណើរការចរចាស្វែងរកសន្តិភាព ជាមួយអ៊ីស្រាអែល ត្រូវជាប់គាំង រដ្ឋអំណាចប៉ាឡេស្ទីនបានងាកមកធ្វើនយោបាយការទូត ដើម្បីស្វែងរកការគាំទ្រ ការទទួលស្គាល់នៅឆាកអន្តរជាតិ។ នៅឆ្នាំ ២០១២ ប៉ាឡេស្ទីនត្រូវបានអង្គការសហប្រជាជាតិបោះឆ្នោត ឲ្យចូលជាសមាជិករដ្ឋសង្កេតការណ៍។ នេះជាជ័យជំនះ មួយ របស់ប៉ាឡេស្ទីន នៅក្នុងយុទ្ធនាការផ្លូវទូតដើម្បីសុំចូលជាសមាជិកពេញសិទ្ធិរបស់អង្គការសហប្រជាជាតិនៅពេលខាងមុខ។
ប្រជាជនប៉ាឡេស្ទីនយល់មិនដូចគ្នា ក្នុងរឿងមានទង់ជាតិរបស់ខ្លួន នៅអង្គការសហប្រជាជាតិ
សម្រាប់ប្រជាជនប៉ាឡេស្ទីន មួយចំនួន ការបង្ហូតទង់ជាតិ ប៉ាឡេស្ទីន នៅថ្ងៃពុធនេះ រឹតតែជានិមិត្តរូប ដ៏សំខាន់ និងផ្តល់ក្តីសង្ឃឹមបន្ថែមទៀត សម្រាប់ប៉ាឡេស្ទីន ក្នុងដំណើរការទាមទារ ជារដ្ឋឯករាជ្យ មួយ។ ប៉ុន្តែ មិនមែនប្រជាជនប៉ាឡេស្ទីន ទាំងអស់សុទ្ធតែអបអរសប្បាយចិត្តនឹងដំណឹងថ្ងៃនេះទេ។ តាមការសាកសួររបស់អ្នកកាសែតរបស់វិទ្យុបារាំងអន្តរជាតិ rfi នៅតំបន់ Cisjordanie ជាដើម ដែលមួយផ្នែកត្រូវស្ថិតនៅក្រោមការគ្រប់គ្រងរបស់ទាហានអ៊ីស្រាអែល ប្រជាជនប៉ាឡេស្ទីនមួយចំនួន មិនអើពើ ត្រេកត្រអាល នឹងឃើញទង់ជាតិ ប៉ាឡេស្ទីននៅអង្គការសហប្រជាជាតិអ្វីទេ។ ពួកគេចង់ឃើញសកម្មភាពជាក់ស្តែង ជាជាង សំដី ព្រោះថា ទង់ជាតិ របស់ប៉ាឡេស្ទីន នៅទីស្នាក់ការអង្គការសហប្រជាជាតិគ្រាន់តែជានិមិត្តរូប ដែលនឹងមិនហុចផល ជាក់ស្តែងអ្វីទេ។ អ្វីដែលប្រជាជនប៉ាឡេស្ទីនចង់បានបំផុត គឺសកម្មភាពនយោបាយទាំងឡាយណារបស់រដ្ឋអំណាចប៉ាឡេស្ទីន ដែលនឹងជួយជំរុញ ឲ្យអ៊ីស្រាអែល ដកទ័ព ចេញពី Cisjordanie និងឈប់បិទសិទ្ធិ ប្រជាជនប៉ាឡេស្ទីន នៅក្នុងទឹកដីប៉ាឡេស្ទីន តទៅទៀត។
ទោះជាថ្ងៃបង្ហូតទូតជាតិប៉ាឡេស្ទីន គ្រាន់តែជានិមិត្តរូប ប៉ុន្តែ វាជាព្រឹត្តិការណ៍សំខាន់មួយដែរ សម្រាប់ដាស់ ពញ្ញាក់ស្មារតី អង្គការសហប្រជាជាតិឲ្យបើកភ្នែក យកចិត្តទុកដាក់មើលបញ្ហារបស់ប៉ាឡេស្ទីនផង។ ត្រូវដឹងថា កន្លងមក ជម្លោះប៉ាឡេស្ទីន និងអ៊ីស្រាអែលធ្លាប់ជាសំណុំរឿងក្តៅគគុក នៅអង្គការសហប្រជាជាតិ ប៉ុន្តែ សព្វថ្ងៃនេះ នៅក្នុងការពិភាក្សាថ្នាក់អន្តរជាតិនានា បញ្ហាប៉ាឡេស្ទីន អ៊ីស្រាអែល មិនសូវត្រូវគេលើកមកនិយាយទេ។ ផ្ទុយទៅវិញ គេលឺនិយាយតែ ដោយសារជម្លោះនៅស៊ីរី ក្រុមភេរវនិយម ជីហាតអង្គការរដ្ឋអ៊ីស្លាម ឬបញ្ហាជនអន្តោប្រវេសន៍ ដែលកំពុងក្លាយជារឿងឈឺក្បាលរបស់អឺរ៉ុប តែប៉ុណ្ណោះ។
អាមេរិក៖ទង់ជាតិប៉ាឡេស្ទីននឹងមិនអាចជំនួសការចរចាសន្តិភាព អ៊ីស្រាអែល ប៉ាឡេស្ទីន
ក្នុងចំណោម ប្រទេសទាំង៨ដែលបានបោះឆ្នោត កាលពីដើមខែកញ្ញា កុំប្រឆាំង ឲ្យទង់ជាតិ ប៉ាឡេស្ទីន អាចត្រូវបង្ហូត នៅអង្គការសហប្រជាជាតិ មានផងដែរ អ៊ីស្រាអែល អាមេរិក និងកាណាដាដែលជាសម្ព័ន្ធមិត្ត។ អ៊ីស្រាអែលបានចាត់ទុក ការបង្ហូតទង់ជាតិ ប៉ាឡេស្ទីនថា ជានិមិត្តរូប ដែលគ្មានន័យ។ ចំណែកអាមេរិកវិញ ដែលបានបោះឆ្នោតប្រឆាំង ព្រោះថា សម្រាប់អាមេរិក ទង់ជាតិរបស់ប៉ាឡេស្ទីន នឹងមិនអាចជំនួសការចរចារកសន្តិភាព ប៉ាឡេស្ទីន អ៊ីស្រាអែលបានទេ។ តាមឯកអគ្គរដ្ឋទូតអាមេរិកប្រចាំអង្គការសហប្រជាជាតិ ដើម្បីអាចក្លាយជារដ្ឋឯករាជ្យ ប៉ាឡេស្ទីនត្រូវចរចាដោយផ្ទាល់ជាមួយអ៊ីស្រាអែល។
នៅអង្គការសហប្រជាជាតិ ប៉ាឡេស្ទីនទទួលបានជ័យជំនះ ដោយឃើញទង់ជាតិរបស់ខ្លួន បង្ហូត ឡើងជាលើកទី១ នៅក្នុងចំណោមទង់ជាតិប្រទេសសមាជិករបស់អង្គការសហប្រជាជាតិ ប៉ុន្តែ នៅក្នុងស្ថានភាពជាក់ស្តែង អាជ្ញាធរប៉ាឡេស្ទីនកំពុងស្ថិតនៅកន្លែងទ័លច្រក។ ការចរចា សន្តិភាពរវាងអ៊ីស្រាអែល និងប៉ាឡេស្ទីនបានជាប់គាំង តាំង ពីឆ្នាំ ២០១៤ គឺ បន្ទាប់ពី អាមេរិក ដែលជាអាជ្ញាកណ្តាល បរាជ័យ មិនអាចនាំភាគីជម្លោះទាំង២ ឲ្យចរចានិយាយត្រូវគ្នា។ នេះគេនៅមិនទាន់និយាយពី ភាពតានតឹង ការប្រឈមមុខដាក់គ្នា ដ៏ហិង្សា នៅប៉ុន្មានសប្តាហ៍នេះ រវាងអាជ្ញាធរអ៊ីស្រាអែលជាមួយ ប្រជាជនប៉ាឡេស្ទីន នៅជេរូសាឡឹម ខាងកើត ដែលជាទឹកដីរបស់ប៉ាឡេស្ទីន ប៉ុន្តែ គ្រប់គ្រងដោយទាហានអ៊ីស្រាអែល។
អ្នកជំនាញជាច្រើន បារម្ភថា បើសិន ភាពតានតឹងនៅតែបន្ត នៅទីលានវិហារអ៊ីស្លាម នោះ សង្រ្គាមគប់ដុំថ្ម intifadaលើកទី៣ របស់ប៉ាឡេស្ទីន ទៅលើអ៊ីស្រាអែល នឹងអាចផ្ទុះ ឡើងវិញ ព្រោះថា សង្រ្គាមគប់ដុំថ្ម intifada លើកទី ២ បានផ្ទុះឡើង នៅក្រោយ ការប្រឈមមុខដ៏ហិង្សា នៅl’esplanade des Mosquéesនេះឯង។
តាមការស្ទង់មតិ ប្រជាជនប៉ាឡេស្ទីនជាងពាក់កណ្តាល ចង់បានការដោះស្រាយបញ្ហាជាមួយអ៊ីស្រាអែល តាមផ្លូវកម្លាំងបាយ គឺប្រជាជនប៉ាឡេស្ទីនត្រូវចាប់កាន់អាវុធដូចមុន ប្រឆាំងនឹងអ៊ីស្រាអែល។ ប្រជាជនប៉ាឡេស្ទីនពីរភាគ បីចង់ឲ្យលោកម៉ាម៉ូដ អាបាសចុះចេញពីតំណែងជាប្រធានរដ្ឋអំណាចប៉ាឡេស្ទីន។
ស្ថិតនៅក្នុងស្ថានភាពបែបនេះ ដំណោះស្រាយសន្តិភាព ដែលនៅក្នុងនោះ សហគមន៍អន្តរជាតិ កំពុងចង់ត្រួសត្រាយផ្លូវឲ្យមានរដ្ឋពីរ ប៉ាឡេស្ទីន និងអ៊ីស្រាអែល រស់នៅជិតខាងគ្នា នោះ គ្រាន់តែ ជាគំនិតស្រមើស្រមៃប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ