សន្និសីទសន្ធិសញ្ញាមិនរីកសាយភាយអាវុធនុយក្លេអ៊ែរបរាជ័យក្នុងការបង្កើតតំបន់គ្មានអាវុធនុយក្លេអ៊ែរនៅមជ្ឈិមបូព៌ា
សន្និសីទនៃសន្ធិសញ្ញាមិនរីកសាយភាយអាវុធនុយក្លេអ៊ែរ ដែលបានបើកធ្វើនៅទីក្រុងញូវយ៉ក តាំងពីថ្ងៃទី២៧មេសាមកនោះ បានបិទបញ្ចប់កាលពីថ្ងៃសុក្រម្សិលមិញ ក៏ប៉ុន្តែ បិទបញ្ចប់ទៅដោយបរាជ័យក្នុងការបង្កើតតំបន់គ្មានអាវុធនុយក្លេអ៊ែរ នៅមជ្ឈិមបូព៌ា។ សេចក្តីព្រាងសេចក្តីសម្រេច ដែលជាការផ្តួចផ្តើមគំនិតរបស់បណ្តាប្រទេសអារ៉ាប់ មិនអាចអនុម័តចេញទៅរួច ដោយសារតែមានការជំទាស់ពីសំណាក់សហរដ្ឋអាមេរិក និងសម្ព័ន្ធមិត្ត។
ចុះផ្សាយនៅថ្ងៃ៖
ស្តាប់ - ០២:០១
សេចក្តីព្រាងសេចក្តីសម្រេច ដែលគាំទ្រដោយបណ្តាប្រទេសអារ៉ាប់ បានកំណត់យកថ្ងៃទី១ ខែមីនា ឆ្នាំ២០១៦ គឺជាថ្ងៃកំណត់ចុងក្រោយ ក្នុងការកោះប្រជុំសន្និសីទស្តីពីការបង្កើតតំបន់គ្មានអាវុធនុយក្លេអ៊ែរនៅមជ្ឈិមបូព៌ា ព្រមទាំងដាក់បន្ទុកឲ្យលោកបាន គីមូន អគ្គលេខាធិការអ.ស.ប ជាអ្នកដឹកនាំគម្រោងបង្កើតតំបន់គ្មានអាវុធនុយក្លេអ៊ែរនេះ។ ក៏ប៉ុន្តែ សេចក្តីព្រាងនេះត្រូវជាប់គាំង ដោយសារតែមានការជំទាស់ពីសំណាក់សហរដ្ឋអាមេរិក អង់គ្លេស និងកាណាដា។
មន្រ្តីការទូតរបស់ប្រទេសទាំង៣នេះ បានធ្វើការពន្យល់ថា ពួកគេមិនប្រឆាំងនឹងគម្រោងបង្កើតតំបន់គ្មាននុយក្លេអ៊ែរនៅមជ្ឈិមបូព៌ានេះទេ ក៏ប៉ុន្តែ ពួកគេមិនឯកភាពនឹងការចេញសេចក្តីសម្រេចដាក់ឱសានវាទ ដោយមិនមានការព្រមព្រៀងពីគ្រប់ភាគីដែលពាក់ព័ន្ធ។
ក៏ប៉ុន្តែ អ៊ីរ៉ង់វិញ ក្នុងនាមក្រុមប្រទេសមិនចលបក្សសម្ព័ន្ធ បានធ្វើការស្តីបន្ទោសដល់ប្រទេសទាំង៣នេះថាបានរារាំងគម្រោងដែលមានការគាំទ្រពីសំណាក់ប្រទេសភាគច្រើន ដើម្បីគ្រាន់តែការពារផលប្រយោជន៍របស់ប្រទេសមួយ ដែលមិនស្ថិតក្នុងសន្ធិសញ្ញាមិនរីកសាយភាយអាវុធនុយក្លេអ៊ែរ។
អ៊ីស្រាអែល ដែលជាប្រទេសតែមួយគត់ក្នុងតំបន់មជ្ឈិមបូព៌ាដែលមានអាវុធនុយក្លេអ៊ែរ ហើយដែលមិនមែនជាហត្ថលេខីនៃសន្ធិសញ្ញាមិនរីកសាយភាយអាវុធនុយក្លេអ៊ែរ ប៉ុន្តែបានចូលរួមក្នុងសន្និសីទក្នុងឋានៈជាអ្នកសង្កេតការណ៍ បានបដិសេធយ៉ាងដាច់អហង្ការថា ខ្លួននឹងមិនចូលរួមក្នុងសន្និសីទបង្កើតតំបន់គ្មានអាវុធនុយក្លេអ៊ែរ ទៅតាមកាលបរិច្ឆេទ និងរបៀបវារៈ ដែលស្ថិតក្រោមការបង្គាប់បញ្ជារបស់អ.ស.បនោះទេ។
ក៏ប៉ុន្តែ គេសង្កេតឃើញថា ដោយសារតែមានការជំទាស់ពីសំណាក់អ៊ីស្រាអែលនេះហើយ ដែលជាហេតុផលដ៏សំខាន់មួយ នាំឲ្យគម្រោងបង្កើតតំបន់គ្មានអាវុធនុយក្លេអ៊ែរនៅមជ្ឈិមបូព៌ា ដែលចាប់កំណើតឡើង តាំងពីឆ្នាំ១៩៩៥មកនោះ នៅតែមិនអាចចេញជារូបរាងបានមកទល់នឹងសព្វថ្ងៃ។ គួររំឭកឡើងវិញថា នៅក្នុងអំឡុងសន្និសីទឆ្នាំ២០១០ ប្រទេសហត្ថលេខីនៃសន្ធិសញ្ញាមិនរីកសាយភាយអាវុធនុយក្លេអ៊ែរធ្លាប់បានចេញសេចក្តីថ្លែងការណ៍មួយ កំណត់ឲ្យបើកធ្វើសន្និសីទអន្តរជាតិស្តីពីបញ្ហានេះ នៅឆ្នាំ២០១២ ក៏ប៉ុន្តែ សន្និសីទនេះមិនអាចបើកធ្វើទៅបាន ដោយសារតែអ៊ីស្រាអែលមិនព្រមចូលរួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ