អ៊ីរ៉ង់ចង់ពង្រីកកម្មវិធីគ្រាប់មីស៊ីលអន្តរទ្វីបប្រឈមនឹងអាមេរិកដែលចង់ដាក់ទ័ណ្ឌកម្មថ្មី
បន្ទាប់ពីស្ងប់ស្ងាត់ទាក់ទងនឹងកម្មវិធីនុយក្លេអ៊ែរ អាមេរិកគ្រោងនឹងដាក់ទ័ណ្ឌកម្មថ្មីលើអ៊ីរ៉ង់ទាក់ទងនឹងកម្មវិធីគ្រាប់មីស៊ីលអន្តរទ្វីប។ ជាការឆ្លើយតបនឹងគម្រោងទ័ណ្ឌកម្មថ្មីរបស់អាមេរិក អ៊ីរ៉ង់តាមរយៈលោកប្រធានាធិបតីហាសាន រ៉ូហានីបានប្រកាសឲ្យដឹងពីភាពចាំបាច់ដែលអ៊ីរ៉ង់ត្រូវពន្លឿនកម្មវិធីគ្រាប់មីស៊ីលអន្តរទ្វីបរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
គឺនៅក្នុងលិខិតមួយផ្ញើទៅកាន់លោករដ្ឋមន្រ្តីក្រសួងការពារជាតិអ៊ីរ៉ង់ដែលលោកប្រធានាធិបតីអ៊ីរ៉ង់ហាសាន រ៉ូហានីបានសរសេរថា ប្រឈមនឹងនយោបាយអរិភាពរបស់សហរដ្ឋអាមេរិក វាពិតជាចាំបាច់ដែលអ៊ីរ៉ង់ត្រូវធ្វើការអភិវឌ្ឍន៍លើកម្មវិធីគ្រាប់មីស៊ីលអន្តរទ្វីបរបស់ខ្លួនយ៉ាងមធ្យ័ត និងបន្ទាន់។ ប្រតិកម្មរបស់ប្រមុខរដ្ឋអ៊ីរ៉ង់យ៉ាងដូចនេះបានធ្វើឡើង បន្ទាប់ពីសារព័ត៌មានអាមរិកបានប្រាប់ឲ្យដឹងថា រដ្ឋបាលអាមេរិកត្រូវអនុម័តនូវទ័ណ្ឌកម្មថ្មីទៀតប្រឆាំងនឹងស្ថាប័ន និងថ្នាក់ដឹកនាំអ៊ីរ៉ង់ចំនួន ១១រូប។ គម្រោងទ័ណ្ឌកម្មរបស់អាមេរិកដែលបានលេចខ្ចរខ្ចាយនៅក្រោយអ៊ីរ៉ង់បានបាញ់សាកល្បងគ្រាប់មីស៊ីលអន្តរទ្វីបកាលពីខែតុលា និងវិច្ឆិកាកន្លងទៅ។
ក្រៅពីលិខិតផ្ញើទៅកាន់រដ្ឋមន្រ្តីការពារជាតិ លោកប្រធានាធិបតីអ៊ីរ៉ង់ហាសាន រ៉ូហានីក៏បានបញ្ជាក់ថា កម្លាំងទ័ពអ៊ីរ៉ង់ក៏ត្រូវបង្កើនសមត្ថភាពកម្មវិធីគ្រាប់មីស៊ីលរបស់ខ្លួនក្នុងករណីដែលមានវិធានការទ័ណ្ឌកម្មថ្មីរបស់សហរដ្ឋអាមេរិក។ គួរជម្រាបជូនថានារយៈពេលប៉ុន្មានឆ្នាំចុងក្រោយនេះ អ៊ីរ៉ង់បានធ្វើការអភិវឌ្ឍន៍ក្រោមទ្រង់ទ្រាយធំនូវកម្មវិធីគ្រាប់មីស៊ីលបាញ់ចម្ងាយឆ្ងាយរហូតដល់ទៅ ២ ០០០គីឡូម៉ែត្រ ពោលអាចបាញ់ទៅដល់ប្រទេសអ៊ីស្រាអែល និងមូលដ្ឋានទ័ពអាមេរិកជាច្រើនកន្លែងនៅក្នុងតំបន់ដើមបូព៌ា។
កម្មវីធីគ្រាប់មីស៊ីលអន្តរទ្វីបរបស់អ៊ីរ៉ង់ពេលនេះបានធ្វើឲ្យអាមេរិក និងអ៊ីស្រាអែលព្រួយបារម្ភក្រៃលែង ពិសេសបន្ទាប់ពីទីក្រុងតេហេរ៉ង់បានប្រកាសនាពេលថ្មីៗនេះថា ខ្លួននឹងមិនកម្រិតកម្មវិធីគ្រាប់មីស៊ីលអន្តរទ្វីបទេ ទោះបីជាមានកិច្ចព្រមព្រៀងស្តីពីនុយក្លែអ៊ែរជាមួយសហគមន៍អន្តរជាតិក៏ដោយ។ ដូច្នេះឃើញថា ការសម្រេចចិត្តរបស់លោកប្រមុខរដ្ឋអ៊ីរ៉ង់ពេលនេះនឹងអាចធ្វើឲ្យទំនាក់ទំនងរវាងអ៊ីរ៉ង់ និងអាមេរិកធ្លាក់ចុះកាន់តែខ្លាំងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ