អេហ្ស៊ីប៖មេកើយម្នាក់ រួមនឹងសកម្មជនជាច្រើនរបស់ចលនាភាតរអ៊ីស្លាមបានទទួលទោសប្រហារជីវិត
នៅក្នុងប្រទេសអេហ្ស៊ីប ប្រតិបត្តិការកំចាត់សកម្មជនរបស់ចលនាភាតរអ៊ីស្លាមតាមផ្លូវតុលាការកំពុងបន្តមានយ៉ាងសកម្ម។ នៅរសៀលថ្ងៃសៅរ៍ ទី១១ មេសា មានមនុស្សសរុបចំនួន ៥១នាក់របស់ចលនាភាតរអ៊ីស្លាមត្រូវបានតុលាការកាត់ទោសប្រហារជីវិត និងដាក់គុកអស់មួយជីវិតពីបទបានញុះញង់ឲ្យមានការបះបោរ និងការប្រើអំពើហិង្សានៅក្រោយរដ្ឋប្រហារយោធាទម្លាក់លោកប្រធានាធិបតីស្របច្បាប់ម័រស៊ីក្នុងខែកក្កដា ឆ្នំា ២០១៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ក្នុងចំណោមអ្នកដែលទើបទទួលទោសទំាង ៥១នាក់ មាន ១៤នាក់បានទទួលទោសប្រហារជីវិត និង៣៧នាក់ផ្សេងទៀតទទួលទោសជាប់គុកអស់មួយជីវិត ហើយក្នុងចំណោមអ្នកទទួលទោសប្រហារជីវិតទំាង ១៤នាក់នោះ មានមា្នក់ជាមេចលនាភារតអ៊ីស្លាមឈ្មោះម៉ូហាម៉េត បាឌីដែលធា្លប់បានកាត់ទោសប្រហារជីវិតម្តងក្នុងខែមករា ឆ្នំា ២០១៤ កន្លងទៅ។ រីឯក្នុងចំណោមអ្នកទទួលទោសជាប់គុកអស់មួយជីវិត គេឃើញមានវត្តមានលោកម៉ូហាម៉េត សូលតានដែលមានសញ្ជាតិពីរ គឺអេហ្ស៊ីប និងអាមេរិកំាង ដោយជាប់ចោទពីបទបានជួយគំាទ្រចលនាភាតរអ៊ីស្លាម និងផ្សព្វផ្សាយព័ត៌មានមិនពិត។ លោកម៉ូហាម៉េត សូលតាន គឺជាកូនប្រុសរបស់លោកសាឡា សូលតានដែលមានឈ្មោះជាអ្នកទោសប្រហារជីវិតដែរ។
អ្នកទទួលទោសទំាង ៥១នាក់សុទ្ធសឹងជាសកម្មជនរបស់ចលនាភាតរអ៊ីស្លាមដែលបានគំាទ្រលោកអតីតប្រធានាធិបតីម័រស៊ី។ លោកម័រស៊ី គឺជាប្រធានាធិបតីអេហ្ស៊ីបស្របច្បាប់ដែលបានធ្លាក់ពីអំណាចដោយរដ្ឋប្រហារយោធាក្នុងខែកក្កដា ឆ្នំា ២០១៣។ គួររម្លឹកជូនថា នៅក្រោយការធ្លាក់ពីអំណាចរបស់លោកម័រស៊ី របបសឹកបានចាប់សកម្មជនរបស់ចលនាភាតរអ៊ីស្លាមជាច្រើនពាន់នាក់យកទៅឃុំ ហើយតុលាការក៏បានផ្តើមធ្វើការកាត់ទោសជាបន្តបន្ទាប់។ លោកឧត្តមសេនីយ ប្រធានាធិបតីសព្វថ្ងៃអាល់ស៊ីស៊ីដែលជាមេរដ្ឋប្រហារទម្លាក់លោកម័រស៊ីយល់ឃើញថា ចលនាភាតរអ៊ីស្លាមជាគ្រោះថ្នាក់ខ្លំាងណាស់សម្រាប់សន្តិសុខជាតិ។ តែពួកភាតរអ៊ីស្លាមតែងតែអះអាងថា ការតស៊ូប្រឆំាងរបស់គេគឺធ្វើឡើងដោយសន្តិវិធី និងថា ពួកគេគ្មានជាប់ពាក់ព័ន្ធនឹងអំពើហិង្សានៅក្រោយការទម្លាក់លោកម័រស៊ីកន្លងមកទេ។
មេធាវីការពារកូនក្តីបានថ្លែងប្រាប់អ្នកកាសែតនៅក្រៅតុលាការថា ការកាត់ក្តីបានរៀបចំឡើងដោយគ្មានជនជាប់ចោទណាម្នាក់ទេ និងថា ចៅក្រមក៏មិនបានបែងចែកពីប្រភេទទោសរបស់ជនជាប់ចោទម្នាក់ៗដែរ ពោលគឺដាក់ក្នុងចង្កោមទោសតែមួយដូចគ្នា។ រីឯអង្គការការពារសិទ្ធិមនុស្សបានសម្លឹងឃើញថា រាល់សញ្ញាប្រឆំាងណាមួយនៅអេហ្ស៊ីបនឹងត្រូវទទួលការវាយបកវិញយ៉ាងចាស់ដៃពីរដ្ឋអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ