ហេតុអ្វីបានជាអារ៉ាប៊ីសាអូឌីតទទួលរងការវាយប្រហារពីអង្គការរដ្ឋអ៊ីស្លាម?
នៅក្នុងប្រទេសអារ៉ាប៊ីសាអូឌីត អំពើភេរវកម្មអត្តឃាតប្រឆំាងនឹងសហគមន៍និកាយស្ហ៊ីអ៊ីតនៅក្នុងវិហារស្ហ៊ីអ៊ីតមួយនាថ្ងៃសុក្រ ទី២២ ឧសភាបានបណ្តាលឲ្យស្លាប់មនុស្ស ២១នាក់ និងរបួស ៨១នាក់ ក្នុងនោះមាន១២នាក់កំពុងស្ថិតក្នុងស្ថានភាពធ្ងន់ធ្ងរ។ អង្គការរដ្ឋអ៊ីស្លាម តាមរយៈសាខាមួយរបស់ខ្លួនប្រចំាក្នុងទឹកដីអារ៉ាប៊ីសាអូឌីតបានសារភាពថាជាស្នាដៃរបស់ខ្លួន។ គិតតំាងពីខែវិច្ឆិកា ឆ្នំា ២០១៤ មក នេះជាលើកទី១ ដែលមានអំពើភេរវកម្មសំដៅសហគមន៍និកាយស្ហ៊ីអ៊ីតនៅក្នុងប្រទេសអារ៉ាប៊ីសាអូឌីត។ ម្យ៉ាងទៀត នេះក៏ជាលើកទី១ ដែលក្រុមជីហាតអង្គការរដ្ឋអ៊ីស្លាមដែលជាក្រុមនិកាយស៊ុននីតជ្រុលនិយមបានវាយប្រហារភេរវកម្មនៅអារ៉ាប៊ីសាអ៊ូឌីតដែលជាប្រទេសនិកាយស៊ុននីតដូចគ្នា។
ចុះផ្សាយនៅថ្ងៃ៖
រដ្ឋាភិបាលអារ៉ាប៊ីសាអូឌីតមិនសូវជាភ្ញាក់ផ្អើលប៉ុន្មានទេចំពោះភេរវកម្មអត្តឃាតបង្កឡើងដោយអង្គការរដ្ឋអ៊ីស្លាមពេលនេះ ព្រោះជាទង្វើដែលទីក្រុងរីយ៉ាដបានរង់ចំា ពិសេសតំាងពីក្រោយអារ៉ាប៊ីសាអូឌីតបានចូលរួមជាមួយកម្លំាងសម្ព័ន្ធមិត្តដឹកនំាដោយអាមេរិកវាយប្រហារលើក្រុមជីហាតអង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់ និងស៊ីរី។ គួររម្លឹកជូនថា តំាងពីខែសីហា ឆ្នំា ២០១៤ មកម្ល៉េះដែលអាមេរិកបានដឹកនំាកម្លំាងសម្ព័ន្ធមិត្តវាយប្រហារផ្លូវអាកាសលើទីតំាងរបស់អង្គការរដ្ឋអ៊ីស្លាមនៅក្នុងទឹកដីអ៊ីរ៉ាក់ និងស៊ីរី។ គិតមកទល់ថ្ងៃនេះ ប្រតិបត្តិការវាយប្រហារផ្លូវអាកាសបានធ្វើឡើងជិត ៤ ០០០ដង និងបានចំណាយលុយអស់ជាង ២ ០០០លានដុល្លារ។ តែអង្គការរដ្ឋអ៊ីស្លាមនៅតែមានកម្លំាងខ្លំាង និងថែមទំាងបានវាយចូលកាន់កាប់ទីក្រុងសំខាន់ៗមួយចំនួន ដូចយ៉ាងទីក្រុងរ៉ាម៉ាឌីក្នុងទឹកដីអ៊ីរ៉ាក់ និងទីក្រុងបុរាណប៉ាល់មៀរក្នុងទឹកដីស៊ីរីនាពេលថ្មីៗនេះ។
បើធៀបនឹងប្រទេសផ្សេងនៅក្នុងតំបន់ ពិសេសប្រទេសហ្សកដានី អារ៉ាប៊ីសាអូឌីតមិនសូវជាសកម្មប៉ុន្មានទេនៅក្នុងយុទ្ធនាការវាយកម្ទេចក្រុមជីហាតអង្គការរដ្ឋអ៊ីស្លាម តែនេះជាសក្ខីកម្មមួយគ្រប់គ្រាន់ដើម្បីឲ្យពួកជ្រុលនិយមនិកាយស៊ុយនីតមួយនេះអាចធ្វើការសងសឹកវិញបាន។ សូមជម្រាបជូនថា ការដែលអារ៉ាប៊ីសាអូឌីតសុខចិត្តចូលរួមជាមួយកម្លំាងសម្ព័ន្ធមិត្តក៏ដោយសារតែអារ៉ាប៊ីសាអូឌីតខ្លាចក្រុមជីហាតអង្គការរដ្ឋអ៊ីស្លាមឆ្លងទៅបង្កភេរវកម្មក្នុងទឹកដីខ្លួន។ ក្នុងរយៈពេលប៉ុន្មានខែចុងក្រោយនេះ រដ្ឋអំណាចទីក្រុងរីយ៉ាដបានធ្វើការចាប់ខ្លួនពួកស៊ុយនីតជ្រុលនិយមជាច្រើននាក់ដែលប៉ុនប៉ងរៀបចំភេរវកម្មក្នុងស្រុក។ នៅក្នុងខែមេសាកន្លងទៅ មានការចាប់ខ្លួនមនុស្ស ៦៥នាក់ដែលជាប់សង្ស័យមានទំនាក់ទំនងជាមួយអង្គការរដ្ឋអ៊ីស្លាម។ នៅទីបំផុត អារ៉ាប៊ីសាអូឌីតនៅតែមិនអាចគេចផុតពីភេរវកម្មបង្កឡើងដោយក្រុមជីហាតអង្គការរដ្ឋអ៊ីស្លាមដដែល។
អង្គការរដ្ឋអ៊ីស្លាមសន្យាបោសសំអាតពួកស្ហ៊ីអ៊ីតនៅអារ៉ាប៊ីសាអូឌីត
ទោះបីជាក្រុមជីហាតអង្គការរដ្ឋអ៊ីស្លាមមិនបានទាមទារឲ្យអារ៉ាប៊ីសាអូឌីតបញ្ឈប់ការចូលរួមជាមួយកម្លំាងសម្ព័ន្ធមិត្តដឹកនំាដោយអាមេរិកក៏ដោយ ក៏ស្នាដៃបង្ហូរឈាមនៅក្នុងទឹកដីអារ៉ាប៊ីសាអូឌីតពេលនេះបានចុះហត្ថលេខាដោយអង្គការរដ្ឋអ៊ីស្លាមរួចជាស្រេច និងដែលនេះ ជាសញ្ញាព្រមានមួយដែលអង្គការភេរវនិយមមួយនេះចង់បង្ហាញប្រាប់ពិភពលោកថា ពួកគេនៅតែមានកម្លំាងខ្លំាង ចង់វាយប្រហារលើប្រទេសណាក៏បាន និងពេលណាក៏បាន។ ប៉ុន្តែទន្ទឹមគ្នានេះ អំពើភេរវកម្មបង្ហូរឈាមបង្កដោយក្រុមនិកាយស៊ុយនីតជ្រុលនិយមក្នុងទឹកដីអារ៉ាប៊ីសាអូឌីតក៏មានបង្កប់ដោយអត្តសញ្ញាណផ្ទៃក្នុងមួយដាច់ដោយឡែកដែរ នោះគឺការរើសអើងរបស់ពួកស៊ុយនីតដែលមានចំនួនច្រើនទៅលើពួកស្ហ៊ីអ៊ីតដែលមានចំនួនតិចនៅក្នុងរាជាណាចក្រអារ៉ាប៊ីសាអូឌីត។
ភេរវកម្មអត្តឃាតនៅថ្ងៃសុក្រម្សិលមិញបានសំដៅត្រង់លើសហគមន៍និកាយស្ហ៊ីអ៊ីតក្នុងស្រុក Koudeih ស្ថិតប៉ែកខាងជើងប្រទេស ដោយភេរវជនបានទាញបំផ្ទុះគ្រាប់បែកជាប់នឹងខ្លួនគេនៅក្នុងវិហារស្ហ៊ីអ៊ីតមួយដែលក្រុមនិកាយស្ហ៊ីអ៊ីតកំពុងសូត្រធម៌។ អង្គការរដ្ឋអ៊ីស្លាមបានប្រកាសសារភាពនៅក្នុងសេចក្តីជូនដំណឹងរបស់ខ្លួនដោយសន្យាថា នឹងធ្វើការបោសសំអាតបំបាត់ពួកស្ហ៊ីអ៊ីតឲ្យអស់ពីទឹកដីអារ៉ាប៊ីសាអូឌីត។ គួររម្លឹកជូនថា ក្រុមស្ហ៊ីអ៊ីតរស់ក្នុងស្រុក Koudeih បានរងគ្រោះពីការរើសអើង មើលងាយ មើលថោកពីពួកស៊ុយនីត។ តំាងពីឆ្នំា ២០១១ មក មានអំពើវាយប្រហារជាច្រើនដងលើកម្លំាងសន្តិសុខក្នុងស្រុក Koudeih ដោយបណ្តាលឲ្យស្លាប់ប្រមាណជា ២០នាក់។
ក្រុមស្ហ៊ីអ៊ីតក្នុងស្រុក Koudeih បានស្តីបន្ទោសរដ្ឋអំណាចដែលមិនបានចាត់វិធានការគ្រប់គ្រាន់ក្នុងការជួយការពារពួកគេ ពិសេសការពារសន្តិសុខនៅតាមវិហាររបស់ពួកគេ។
សង្រ្គាមរវាងពួកស្ហ៊ីអ៊ីត និងស៊ុយនីតនឹងពុះកញ្ជ្រោលកាន់តែខ្លំាង
អ្វីដែលរដ្ឋអំណាចអារ៉ាប៊ីសាអូឌីតកំពុងបារម្ភខ្លំាងនោះ គឺកំណើនភាពតានតឹងរវាងពួកស្ហ៊ីអ៊ីត និងពួកស៊ុយនីតនៅក្នុងទឹកដីអារ៉ាប៊ីសាអូឌីត និងនៅក្នុងតំបន់ទំាងមូល។ អារ៉ាប៊ីសាអូឌីតដែលជាប្រទេសនិកាយស៊ុយនីតបាន និងកំពុងប្រឈមមុខយ៉ាងខ្លំាងទល់នឹងអ៊ីរ៉ង់ដែលជាប្រទេសស្ហ៊ីអ៊ីត និងចលនាហេស្បូឡានៅលីបង់ដែលប្រកាន់និកាយស្ហ៊ីអ៊ីត។ ប្រទេសអ៊ីរ៉ង់ និងចលនាហេស្បូឡាបានថ្កោលទោសលើអំពើភេរវកម្មសំដៅសហគមន៍ស្ហ៊ីអ៊ីតក្នុងទឹកដីអារ៉ាប៊ីសាអូឌីត និងថែមទំាងបានទម្លាក់ការទទួលខុសត្រូវលើរដ្ឋាភិបាលទីក្រុងរីយ៉ាដ។
គួរជម្រាបជូនថា ក្រៅពីចូលរួមជាមួយសម្ព័ន្ធមិត្តអាមេរិកដើម្បីវាយប្រហារអង្គការរដ្ឋអ៊ីស្លាមនៅអ៊ីរ៉ាក់ និងស៊ីរី អារ៉ាប៊ីសាអូឌីតខ្លួនឯងក៏បានដឹកនំាកម្លំាងសម្ព័ន្ធមិត្តអារ៉ាប់ក្នុងតំបន់វាយប្រហារលើពួកឧទ្ទាមហ៊ូទី្សនិកាយស្ហ៊ីអ៊ីតនៅក្នុងប្រទេសយេម៉ែន។ ទង្វើរបៀបនេះរបស់ទីក្រុងរីយ៉ាដត្រូវបានអ៊ីរ៉ង់ចាត់ទុកជាទង្វើសម្លាប់រង្គាលលើពួកស្ហ៊ីអ៊ីត និងព្រមានមិនបន្តឈរឱបដៃមើលទេ។ ដូច្នេះចង់មិនចង់ ភេរវកម្មបង្ហូរឈាមពួកស្ហ៊ីអ៊ីតក្នុងទឹកដីអារ៉ាប៊ីសាអូឌីតពេលនេះអាចជាការចាក់សំាងបន្ថែមលើពំនូកភ្លើងដែលកំពុងឆេះស្រាប់នៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ