អង្គការសហប្រជាជាតិ និងអាមេរិកសាទររដ្ឋាភិបាលថ្មីនៅប៉ាឡេស្ទីនដែលគ្មានវត្តមានពួកហាម៉ាស់
នៅថ្ងៃអាទិត្យ ទី១៤ មេសា រដ្ឋបាលអាមេរិកបានសាទររដ្ឋាភិបាលថ្មីនៅប៉ាឡេស្ទីនដែលនាយករដ្ឋមន្រ្តីថ្មីលោកម៉ូហាម៉ាដ តាយយេទើបបានប្រសូត្រចេញកាលពីថ្ងៃសៅរ៍ ទី១៣ មេសា។ តែអ្វីជាការកត់សម្គាល់ សមាសភាពក្នុងរដ្ឋាភិបាលថ្មីភាគច្រើនជាឥស្សរជនមកពីរដ្ឋាភិបាលចាស់ និងច្រើនជាមនុស្សជំនិតរបស់ប្រធានរដ្ឋអំណាចប៉ាឡេស្ទីនលោកម៉ាមូដ អាបាស់។ ចំណែកចលនាប៉ាឡេស្ទីនហាម៉ាស់ក៏ត្រូវបានគេផាត់ចេញពីរដ្ឋាភិបាលថ្មីដែរ។
ចុះផ្សាយនៅថ្ងៃ៖
ស្តាប់ - ០២:៤៨
បង្កើតរដ្ឋាភិបាលថ្មីជាមួយនឹងសមាសភាពនៅក្នុងរដ្ឋាភិបាលចាស់ នេះហើយជាអ្វីដែលបានកើតមានឡើងនៅក្នុងដែនដីប៉ាឡេស្ទីន។ តែទោះជាយ៉ាងនេះក្តី រដ្ឋាភិបាលថ្មីរបស់នាយករដ្ឋមន្រ្តីថ្មីរបស់លោកម៉ូហាម៉ាដ តាយយេមួយនេះបានទទួលការសាទរពីអង្គការសហប្រជាជាតិ និងពីសហរដ្ឋអាមេរិក។ លោកនីកូឡេ ឡាដឺណូវ ប្រេសិតរបស់អង្គការសហប្រជាជាតិប្រចាំតំបន់មជ្ឈិមបូព៌ាបានថ្លែងសាទរ និងបញ្ជាក់ថា អង្គការសហប្រជាជាតិសន្យាបន្តធ្វើការងារជាមួយថ្នាក់ដឹកនាំ និងប្រជាជនប៉ាឡេស្ទីនដើម្បីបិទបញ្ចប់ការត្រួតត្រា និងបន្តជំរុញដំណើរស្វែងរកការបង្កើតរដ្ឋប៉ាឡេស្ទីនមួយស្របច្បាប់យោងតាមសេចក្តីសម្រេចអនុម័តដោយអង្គការសហប្រជាជាតិ។
ពីខាងសហរដ្ឋអាមេរិក ទីប្រឹក្សារបស់លោកដូណាល់ ត្រាំ និងជាអ្នកតំណាងពិសេសទទួលបន្ទុកកិច្ចចរចាអន្តរជាតិលោកយ៉ាសុន គ្រីនប្លាតសរសេរនៅក្នុងបណ្តាញសង្គម Tweeter របស់លោកថា ជាមួយនឹងបទពិសោធន៍របស់ឥស្សរជននៅក្នុងរដ្ឋាភិបាលថ្មី អាមេរិក និងប៉ាឡេស្ទីនអាចធ្វើការរួមគ្នាដើម្បីសន្តិភាព និងធ្វើឲ្យប្រសើរឡើងនូវជីវភាពរស់នៅរបស់ប្រជាជនប៉ាឡេស្ទីន។ តាមលោកគ្រីនប្លាតដដែល វាល្មមដល់ពេលដែលត្រូវបើកទំព័រសករាជថ្មីមួយ។ គួរបញ្ជាក់ថានៅថ្ងៃសៅរ៍ ទី១៣ មេសា លោកម៉ូហាម៉ាដ តាយយេដែលទើបតែងតាំងជានាយករដ្ឋមន្រ្តីប៉ាឡេស្ទីនក្នុងខែមីនាបានប្រកាសឲ្យដឹងពីសមាសភាពក្នុងរដ្ឋាភិបាលថ្មី។
តែអ្វីជាការកត់សម្គាល់ ឥស្សរជនភាគច្រើនក្នុងរដ្ឋាភិបាលថ្មីច្រើនជាមនុស្សជំនិតយូរអង្វែងនៃចលនាហ្វាតារបស់លោកប្រធានរដ្ឋអំណាចប៉ាឡេស្ទីនម៉ាមូដ អាបាស់។ តំណែងរដ្ឋមន្រ្តីភាគច្រើនត្រូវបានបន្តស្ថិតក្នុងដៃរបស់រដ្ឋមន្រ្តីនៅក្នុងជំនាន់រដ្ឋាភិបាលចាស់របស់លោករ៉ាមី ហាំដាឡា។ ចំណែកចលនាហាម៉ាស់ដែលគ្មានវត្តមាននៅក្នុងរដ្ឋាភិបាលថ្មីបានបរិហារចលនាហ្វាតាពីបទក្តោបក្តាប់អំណាចតែម្នាក់ឯង និងបន្តអំពាវនាវឲ្យបង្កើតរដ្ឋាភិបាលរួបរួមមួយដោយដាក់បញ្ចូលចលនាអ៊ីស្លាមហាម៉ាស់។ គួររម្លឹកថា ចលនាប៉ាឡេស្ទីនហ្វាតា និងហាម៉ាស់បានប្រឈមមុខដាក់គ្នាតាំងពីឆ្នាំ ២០០៧ ពោលតាំងពីពួកហាម៉ាស់បានយកតំបន់ហ្កាហ្សាទៅគ្រប់គ្រង។
តាំងពីឆ្នាំ ២០០៧ គ្រប់កិច្ចខិតខំប្រឹងប្រែងផ្សះផ្សារវាងចលនាហ្វាតា និងចលនាហាម៉ាស់បានទទួលបរាជ័យ។ ទន្ទឹមគ្នានេះ កិច្ចចរចាចុងក្រោយដើម្បីសន្តិភាពរវាងប៉ាឡេស្ទីន និងប្រទេសអ៊ីស្រាអែលដែលបានទទួលបរាជ័យក្នុងឆ្នាំ ២០១៤ ក៏កំពុងបន្តជាប់គាំងមកដល់សព្វថ្ងៃ។ គ្រប់គ្នាកំពុងរង់ចាំមើលថា តើជាមួយនឹងរដ្ឋាភិបាលថ្មីនៅប៉ាឡេស្ទីន និងប្រហែលជាមួយនឹងនាយករដ្ឋមន្រ្តីដដែលនៅអ៊ីស្រាអែល គឺលោកនេតាន់យ៉ាហ៊ូ កិច្ចចរចាសន្តិភាពរវាងប៉ាឡេស្ទីន និងអ៊ីស្រាអែលនឹងផ្តើមមានឡើងវិញ ឬអត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ