ស៊ីរីចោទប្រកាន់អ៊ីស្រាអែលថា បានចូលឈ្លានពានទៅបាញ់បំផ្លាញទីតាំងយោធារបស់ស៊ីរី
កងទ័ពស៊ីរី នៅថ្ងៃព្រហស្បតិ៍ម្សិលមិញបានចោទប្រកាន់រដ្ឋាភិបាលអ៊ីស្រាអែល ថា បានបញ្ជារឲ្យយន្តហោះចម្បាំងចូលទៅបាញ់បំផ្លាញ ទីតាំងរចនាសម្ព័ន្ធយោធារបស់ស៊ីរី។ តាមកងទ័ពស៊ីរី ការវាយប្រហាររបស់យន្តហោះចម្បាំងអ៊ីស្រាអែលបានសម្លាប់មនុស្ស ២នាក់ និងបានបណ្តាលឲ្យមានការខូចខាតសំភារៈដ៏ធ្ងន់ធ្ងរ នៅក្នុងទឹកដីស៊ីរី។ នៅព្រឹកព្រលឹមថ្ងៃព្រហស្បតិ៍ យន្តហោះចម្បាំងរបស់អ៊ីស្រាអែល បានវាយប្រហារលើទីតាំងដែលគេជឿថា ជាទីតាំងផលិតអាវុធគីមីរបស់កងទ័ពស៊ីរី។
ចុះផ្សាយនៅថ្ងៃ៖
នៅក្នុងសេចក្តីថ្លែងការណ៍របស់ខ្លួន នាថ្ងៃព្រហស្បតិ៍ កងទ័ពស៊ីរីបានព្រមាន ចាត់ទុក រាល់ទង្វើរបស់អ៊ីស្រាអែល ថា ជាសកម្មភាពរំលោភសន្តិសុខ ហើយនិងស្ថិរភាពនៅក្នុងតំបន់។ តាមកងទ័ពស៊ីរី យន្តហោះចម្បាំងអ៊ីស្រាអែល តាំងពីតំបន់ដែនអាកាសលីបង់ បានបាញ់មីស៊ីលបំផ្លាញទីតាំងយោធារបស់ស៊ីរី ដែលស្ថិតនៅភាគពាយ័ព្យ ប្រទេសស៊ីរី។
ភាគីអ៊ីស្រាអែលវិញមិនបានអត្ថាធិប្បាយ ឬប្រតិកម្មអ្វីទៅលើការវាយប្រហាររបស់យន្តហោះអ៊ីស្រាអែល នៅថ្ងៃព្រហស្បតិ៍នោះទេ។ គេជឿថា ទីតាំងរបស់កងទ័ពស៊ីរី ដែលយន្តហោះចម្បាំងអ៊ីស្រាអែលបាញ់បំផ្លាញ ជាកន្លែងហ្វឹកហ្វឺនយោធា ហើយនិងមួយផ្នែកជាមជ្ឈមណ្ឌលស្រាវជ្រាវ និងសិក្សា វិទ្យាសាស្រ្តស៊ីរី។ អាមេរិក ហើយនិងអ្នកទទួលខុសត្រូវរបស់អ៊ីស្រាអែល កន្លងមក ធ្លាប់បានចាត់ទុកមជ្ឈមណ្ឌលស្រាវជ្រាវវិទ្យាសាស្រ្ត ស៊ីរី ថា ជាមន្ទីរពិសោធន៍ ដែលកងទ័ពស៊ីរីបានប្រើសម្រាប់ផលិតអាវុធគីមី។
អង្គការដើម្បីឃ្លាំមើលសិទ្ធិមនុស្សស៊ីរី ដែលមានទីតាំងនៅទីក្រុងឡុងដ៍បានបញ្ជាក់ថា ទីតាំងយោធារបស់ស៊ីរី ដែលរងការវាយប្រហាររបស់យន្តហោះចម្បាំងអ៊ីស្រាអែល ពិតជាមជ្ឈមណ្ឌលសិក្សា និងស្រាវជ្រាវវិទ្យាសាស្រ្ត ប៉ុន្តែ មិនបានបញ្ជាក់ថា ជាមន្ទីរពិសោធន៍ដែលផលិតអាវុធគីមីនោះទេ។
នេះមិនមែនជាលើកទី១ទេ ដែលអ៊ីស្រាអែល បញ្ជូនយន្តហោះឲ្យទៅបាញ់បំផ្លាញទីតាំងរចនាសម្ព័ន្ធយោធា នៅក្នុងទឹកដីស៊ីរី។ ចាប់តាំងពីសង្រ្គាមស៊ីវិលផ្ទុះនៅស៊ីរី នៅឆ្នាំ ២០១១ អ៊ីស្រាអែលឧស្សាហ៍វាយប្រហារតាមផ្លូវអាកាសលើក្រុមកងទ័ពស៊ីរី និងអេស្បូឡា ដែលគាំទ្រ ហិរញ្ញវត្ថុ និងយោធា ដោយប្រទេសអ៊ីរ៉ង់ (សត្រូវចងពៀររបស់អ៊ីស្រាអែល)។ កន្លងមក អ៊ីស្រាអែល ធ្លាប់បានចោទប្រកាន់ ទាហានអ៊ីរ៉ង់ ហើយនិងក្រុមអេស្បូឡា លីបង់ ដែលជាសម្ព័ន្ធមិត្ត របស់រដ្ឋាភិបាលស៊ីរី ថា បានប្រើប្រាស់ទឹកដីស៊ីរី សម្រាប់ធ្វើជាមន្ទីរពិសោធន៍ និងទីតាំង ផលិតមីស៊ីល ដែលអ៊ីរ៉ង់ និងក្រុមទាហានអេស្បូឡា លីបង់ប្រើសម្រាប់វាយប្រហារអ៊ីស្រាអែល។
អ៊ីស្រាអែល ធ្លាប់បានព្រមានមិនឲ្យមានការផ្ទេរសព្វាវុធទំនើបទៅឲ្យក្រុមអេស្បូឡា លីបង់នោះទេ។ នៅចុងខែមិថុនា នាយករដ្ឋមន្រ្តីចោទប្រកាន់ក្រុមអេស្បូឡា ដែលគាំទ្រដោយអ៊ីរ៉ង់ ថា កំពុងយកទឹកដីស៊ីរី និងលីបង់ ធ្វើជាជំរំលួចលាក់ ផលិតមីស៊ីល សម្រាប់វាយកម្ទេចអ៊ីស្រាអែល ដែលជាគូសត្រូវរបស់អ៊ីរ៉ង់។ នៅថ្ងៃព្រហស្បតិ៍ រដ្ឋាភិបាលស៊ីរី បានលើកឡើងពីការខូចខាតទាំងសំភារៈ និងការបាត់បង់ជីវិតមនុស្ស ប៉ុន្តែ មិនបានបញ្ជាក់ថា វិទ្យាស្ថានសម្រាប់ការស្រាវជ្រាវវិទ្យាសាស្រ្ត ដែលគេជឿថា ជាកន្លែងផលិតអាវុធគីមី ជាកន្លែងដែលរងការបាញ់បំផ្លាញរបស់យន្តហោះអ៊ីស្រាអែលនោះទេ។ នៅថ្ងៃពុធ ម្សិលម្ង៉ៃ អ្នកស៊ើបអង្កេតរបស់អង្គការសហប្រជាជាតិទើបតែបានបង្ហាញជាលើកទី១ថា កងទ័ពស៊ីរី បានប្រព្រឹត្តឧក្រិដ្ឋកម្មសង្រ្គាម ដោយបានប្រើអាវុធគីមី សម្លាប់មនុស្សនៅទីក្រុង ខាន ស្ហេកឃួន កាលពីថ្ងៃទី ៤មេសាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ