អ៊ីរ៉ង់បដិសេធថា Ryad គ្មានបានអញ្ជើញខ្លួនក្នុងការពិភាក្សាអំពីពិធីស្វែងបុណ្យអ៊ីស្លាមទេ
អ៊ីរ៉ង់បានបដិសេធពត័តមានមួយរបស់អារ៉ាប៊ីសាអូឌីត ដែលអះអាងថា”អារ៉ាប់ប៊ីសាអូឌីត បានអញ្ជើញអ៊ីរ៉ង់ឲ្យចូលរួមការពិភាក្សាគ្នាមួយ។ ការពិភាក្សាដើម្បីរៀបចំឲ្យបរិស័ទអ៊ីស្លាមអ៊ីរ៉ង់ អាចវិលត្រឡប់មកចូលរួមពិធីស្វែងបុណ្យអ៊ីស្លាមប្រចាំឆ្នាំឡើងវិញនៅក្រុង La Mecque បន្ទាប់ពីអវត្តមានមួយឆ្នាំនិងភាពតានតឹងរវាងគ្នាក្រោយព្រឹត្តការណ៍សោកនាដ្យកម្មរត់ជាន់គ្នាកាលពីឆ្នាំ២០១៥មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ប្រធានអង្គការអ៊ីរ៉ង់ទទួលបន្ទុកខាងការចាត់ចែងពិធីស្វែងបុណ្យអ៊ីស្លាមនៅក្រុងLa Mecque បានថ្លែងបដិសេធថា “ប្រទេសអ៊ីរ៉ង់ គ្មានបានទទួលការអញ្ជើញណាមួយពីសំណាក់ប្រទេសអារ៉ាប៊ីសាអ៊ូឌីតឡើយ ដែលផ្ទុយស្រឡះ ពីការជូនដំណឹងរបស់ប្រព័ន្ធផ្សព្វផ្សាយមួយរបស់អារ៉ាប៊ីសាអ៊ូឌីតកាលពីម្សិលមិញ”។
ចំណែករដ្ឋមន្ត្រីរបស់អារ៉ាប៊ីសាអ៊ូឌីតទទួលបន្ទុកខាងចាត់ចែងរៀបចំពិធីស្វែងបុណ្យអ៊ីស្លាមវិញ កាលពីថ្ងៃសុក្រកន្លងទៅនេះ បានជូនដំណឹងថា គាត់បានចាប់ផ្តើមធ្វើជំនួបប្រាស្រ័យមួយចំនួនហើយដែលលោកគ្រោងធ្វើជាមួយបណ្តាប្រទេសចំនួន៨០ក្នុងនោះក៏មានប្រទេសអ៊ីរ៉ង់ផងដែរ ដើម្បីពិភាក្សាគ្នាអំពីការរៀបចំចាត់ចែងពិធីស្វែងបុណ្យអ៊ីស្លាមនៅខែកញ្ញាឆ្នាំ២០១៧-នេះបើយោងតាមកាសែតអារ៉ាប៊ីសាអ៊ូឌីត Al-Hayat ។
ចាប់តាំងពីជិត៣ទស្សវត្តន៍កន្លងមកហើយ នឹងក៏ជាលើកទីមួយដែរ ដែលគ្មានអ្នកស្វែងបុណ្យណាម្នាក់មកពីប្រទេសអ៊ឺរ៉ង់ឡើយដែលទៅចូលរួមនៅក្នុងពិធីស្វែងបុណ្យនេះកាលពីខែកញ្ញាឆ្នាំ២០១៦កន្លងផុតទៅនេះ។
ដោយសារ ភាពតានតឹងយ់ាងធ្ងន់ធ្ងរ កើតឡើងរួចទៅហើយ រវាងអ៊ីរ៉ង់ដែលកាន់និកាយអ៊ីស្លាមស៊ីអ៊ីតនិងអារ៉ាប៊ីសាអូឌីត ដែលកាន់និកាយអ៊ីស្លាមស៊ុននីត។ មហាអំណាចទាំងពីរនេះ គឹជាគូប្រជែងគ្នានៅក្នុងតំបន់។ ភាពតានតឹងរវាងអ៊ីរ៉ង់និងអារ៉ាប៊ីសាអូឌីត បានកើនឡើងថែមមួយកម្រិតទៀត នៅខណៈពេលដែលទីក្រុងតេអេរ៉ង់ បានធ្វើការជំទាស់ប្រឆាំងនឹងអារ៉ាប៊ីសាអូឌីតនៅក្នុងការរៀបចំចាត់ចែងពិធីស្វែងបុណ្យអ៊ីស្លាម ក្រោយពីព្រឹត្តិការណ៍សោកនាដកម្មរត់ជាន់លើគ្នាកាលពីឆ្នាំ២០១៥ ដែលបណ្តាលឲ្យស្លាប់បរិស័ទអ៊ីស្លាមជិត២ ៣០០នាក់ក្នុងចំណោមនោះ ៤៦៤នាក់ជាជនជាតិអ៊ីរ់ង់។
ក្រោយមក អារ៉ាប៊ីសាអ៊ូឌីត បានកាត់ផ្តាច់ទំនាក់ទំនងការទូតជាមួយអ៊ីរ៉ង់កាលពីមួយឆ្នាំមុន បន្ទាប់ពីមានការវាយប្រហារនិងការវាយកំទេចបំផ្លាញស្ថានទូតអារ៉ាប៊ីសាអ៊ូឌីតប្រចាំទីក្រុងតេអេរ៉ង់មក។ លើសពីនេះ អារ៉ាប៊ីសាអ៊ូឌីត ថែមទាំងកាត់ផ្តាច់ទំនាក់ទំនងរបស់ខ្លួនជាមួយអ៊ីរ៉ង់នៅលើវិស័យសេដ្ឋកិច្ចនិងពាណិជ្ចកម្មនិងព្យួរការហោះហើររវាងប្រទេសទាំងពីរទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ