ជនឥតក្រដាសស្នាមប្រមាណ៩០០០នាក់នឹងចាកចេញពីប្រទេសកាតា
បណ្តាជនចំនួន៩០០០នាក់ ដែលរស់នៅដោយខុសច្បាប់នៅក្នុងប្រទេសកាតា នឹងត្រូវអនុញ្ញាតឲ្យចាកចេញពីប្រទេសនេះ នៅក្នុងក្របខណ្ឌនៃការលើកលែងទោស ដែលអាជ្ញាធរកាតាបានសម្រេចយល់ព្រម។ នេះបើយោងតាមការជូនដំណឹងពីមន្ត្រី ក្រសួងមហាផ្ទៃ និងក្រសួងជនអន្តោប្រវេសន៍កាតា។
ចុះផ្សាយនៅថ្ងៃ៖
ស្តាប់ - ០១:៥៧
អាជ្ញាធរកាតា បានអនុវត្តការលើកលែងទោសមួយដែលមានរយៈពេល៣ខែ ចំពោះជនចំណាកស្រុកដែលកំពុងរស់នៅនិងធ្វើការខុសច្បាប់នៅក្នុងប្រទេស។ការលើកលែងទោសនេះដែលត្រូវផុតកំណត់នៅថ្ងៃទី១ធ្នូខាងមុខ អនុញ្ញាតដល់បណ្តាជនឥតក្រដាសស្នាមទាំងអស់ អាចចាកចេញពីប្រទេសកាតាដោយពុំមានផលវិបាកនៅលើផ្នែកច្បាប់។ នៅក្នុងការអនុវត្តការលើកលែងទោស នេះ កាតា បានធ្វើបីលើករួចទៅហើយ ដែលចុងក្រោយគេ គីនៅឆ្នាំ២០០៤។
មន្ត្រីជាន់ខ្ពស់កាតាម្នាក់ទទួលបន្ទុកសេវាអន្តោប្រវេស្តន៍ បានប្រមើលទុកថា” ចាប់ពីអំណេះ រហូតទៅដល់ពេលផុតកំណត់ការលើកលែងទោស ចំនួនជនដែលត្រូវចាកចេញពីប្រទេសកាតានឹងកើនឡើងដល់ចំនួន៩០០០នាក់។
កាតា ពុំដែលមានតួលេខផ្លូវការឡើយ ស្តីពីចំនួនជនឥតក្រដាសស្នាម ក៏ប៉ុន្តែបញ្ហានេះជាប្រធានបទដ៏រស៊ើបបំផុតនៅក្នុងប្រទេសមួយនេះដែលតែងតែត្រូវទទួលរងនូវការទិះតៀន។ ដោយហេតុថា ការងាររបស់ជនបរទេស ជិត២លាននាក់ មានលក្ខខ័ណ្ឌយ៉ាប់យឺនខ្លាំង ជាពិសេស ចាប់តាំងពី កាតា បានជាប់ឈ្មោះជាម្ចាស់ផ្ទះក្នុងការទទួលរៀបចំការប្រកួតកីឡាបាល់ទាត់ពានរង្វាន់ពិភពលោកសម្រាប់ឆ្នាំ២០២២ មក។ ម្យ៉ាងទៀត ច្បាប់នៅក្នុងប្រទេសនេះ ហាមមិនឲ្យជនបរទេសធ្វើការនោះទេ បើពួកគេពុំមានទិដ្ឋាការពិសេស។
ចំណែក អង្គការការពារសិទ្ធិមនុស្ស បានអះអាងថា ជនអន្តោប្រវេស្តន៍ចំនូនដ៏សន្ធឹកសន្ធាប់ បានរត់គេចពីការងារខ្លួន ដោយសារតែពួកគេ ឥតបានទទួលប្រាក់ខែពីនយោជគឬក៏ត្រូវបានគេរំលោភបំពាន។ ក្រោយពីរត់គេចពីការងារ ពួកគេ ធ្លាក់ខ្លួនជាជនខុសច្បាប់ជាថ្មីឡើងវិញ ។ ដូច្នេះហើយ ពួកគេ ត្រូវខំត្រដររស់ទាំងលំបាកលំបិនដោយជំនួយពីមិត្តភ័ក្រ្តឬក៏ក្រុមគ្រួសារ និងធ្វើការងារដែលភាគច្រើនគេឲ្យប្រាក់ខែជាលុយសុទ្ធ។
សូមបញ្ជាក់ថា បណ្តាជនភាគច្រើនដែលកំពុងត្រៀមខ្លួនចាកចេញពីប្រទេសកាតានៅក្នុងក្របខណ្ឌនៃការលើកលែងទោស គឺ ភាគច្រើន មានដើមកំណើតមកពីតំបន់អាស៊ី ជារួម មាន បង់ក្លាដែស ឥណ្ឌា និង នេប៉ាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ