ទាហានកងកុម្ម៉ង់ដូពិសេសរបស់បារាំងពីររូបត្រូវរងរបួស ដោយ ដ្រូនបង្កប់គ្រាប់
កងទ័ពពិសេសរបស់បារាំងពីររូប ត្រូវរងរបួសធ្ងន់នៅក្នុងភាគខាងជើងប្រទេសអ៊ីរ៉ាក់។ ហេតុការណ៍នេះ បានកើតឡើងកាលពីថ្ងៃទី២តុលាមុន តែកងសេនាធិការបារាំងនៅតែពុំទាន់បញ្ជាក់អ្វីនៅឡើយទេពីព័ត៌មាននេះ ។ ទាហានកុម៉្មង់ដូឆ័ត្រយោងបារាំងនេះ ស្ថិតនៅក្នុងចំណោមកងកម្លាំងពិសេសបារាំងចំនួន១៥០នាក់ដែលបាន ដាក់ពង្រាយជាផ្លូវការនៅក្រុងErbil ។ កងទ័ពពិសេនេះ ដែលស្គាល់យ៉ាងច្បាស់លាស់គ្រប់ទិសទីពិបាកៗនៅលើទឹកដីអ៊ីរ៉ាក់ មានការភ្ញាក់ផ្អើលខ្លាំងនៅចំពោះមុខដ្រូនឆ្នៃប្រឌិតថ្មីទែងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ដំណឹងនេះ ត្រូវបានទំព័រអ៊ីនធ័រណែតពិសេសឈ្មោះ Le Mamouth បង្ហើបឲ្យដឹងកាលពីថ្ងៃព្រហស្បតិ៍មុនដោយប្រាប់ថា “ទាហានកុម្ម៉ង់ដូឆ័ត្រយោងបារាំងពីររូបដែលស្ថិតនៅក្នុងកងបញ្ជាការនៃប្រតិបត្តិការពិសេស(COS) បានត្រូវរងរបួសក្នុងនោះ ម្នាក់រងរបួសធ្ងន់។
នៅថ្ងៃនោះដែរ នៅទីក្រុងប៉ារីសវិញ កងសេនាធិការបារាំង បានបដិសេធពុំធ្វើអត្ថាធិប្បាយអ្វីទាំងអស់នៅលើព័ត៌មាននេះ។ តែពីពេលនោះមក ទាហានបារាំងទាំងពីររូប ត្រូវបានគេដឹកមកព្យាបាលនៅមន្ទីរពេទ្យទាហានមួយនៅទីក្រុងប៉ារីស ក្នុងនោះទាហានម្នាក់ បានរងរបួសយ៉ាងធ្ងន់ធ្ងរ វិះស្លាប់វិសរស់។
ជាទូទៅ កងកម្លាំងពិសេសបារាំងនេះ ធ្វើប្រតិបត្តិការ ចាប់ពីក្រុង Erbilទៅ Erbil ដែលជាទីក្រុងរបស់ Kurdistan ប៉ែកទឹកដីអ៊ីរ៉ាក់។ គេបានរកឃើញដែរ សាកសាពរបស់កងប្រដាប់អាវុធ Kurdistan ពីររូបនៅថ្ងៃជាមួយគ្នានោះ។
នៅថ្ងៃច័ន្ទមុន កាសែត បារាំងឈ្មោះ Le Monde បានបង្ហើបឲ្យដឹងដែរពីយុទ្ធសាស្រ្តរបស់ពួកអ៊ីស្លាមជីហាតនៅក្នុងសកម្មភាពវាយប្រហារប្រឆាំងតទល់នឹងកងទ័ពបារាំង ដោយ បានបញ្ជូនដ្រូនបង្កប់គ្រាប់បែកមួយតម្រង់ឆ្ពោះទៅកាន់ខ្សែបន្ទាត់របស់កងទ័បារាំង។ តែគេនៅពុំទាន់ដឹងនៅឡើយទេពីកាលៈទេសៈនៃការផ្ទុះដ្រូននោះ តែកាសែត Le Monde បានឆ្លើយដោយធ្វើជាសំណួរថា “ ឬ មួយក៏ដ្រូនឆ្នៃប្រឌិតថ្មីទែងនោះ បានផ្ទុះនៅពេលដល់ដី ឬមួយក៏ជាដ្រូនដើម្បីទាក់ទាញការយកចិត្តទុកដាក់របស់កងទ័ពឆ័ត្រយោងបារាំង ហើយបន្ទាប់ពីផ្ទុះរួច ត្រូវបានទាហានប្រមែប្រមូលយកទុក។ ក៏ប៉ុន្តែអ្វីដែលគេដឹងនោះ គឺ ពួកទាហានដែលត្រូវរងរបួស កំពុងតែមានការឈឺចាប់យ៉ាងខ្លាំងជាពិសេសនៅលើមុខរបួសដ៏ធ្ងន់ធ្ងរនៅលើជើងទាំងពីររបស់ពួកគេ-នេះបើយោងតាមកាសែត Le Monde ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ