លោក Shimon Peres ស្ថិតក្រោមការសង្គ្រោះបន្ទាន់ពីសំណាក់ក្រុមគ្រូពេទ្យអ៊ីស្រាអែល
លោក Shimon Peres ដែលជាអតីតប្រធានាធិបតីនិងក៏ជាអតីតនាយករដ្ឋមន្ត្រីអ៊ីស្រាអែលព្រមទាំងជាជ័យលាភីរង្វាន់ណូបែលសន្តិភាពនោះ កំពុងស្ថិតក្រោមការជួយសង្គ្រោះជាបន្ទាន់នៅក្នុងមន្ទីរពេទ្យមួយក្បែរទីក្រុង Tel Aviv ក្រោយមានការដាច់សសៃឈាមក្នុងខួរក្បាលកាលពីម្សិលមិញ។ យោងតាមក្រុមគ្រូពេទ្យអ៊ីស្រាអែល ស្ថានភាពសុខភាពរបស់លោក មានអការៈធ្ងន់ធ្ងរតែនៅនឹង។ ក៏ប៉ុន្តែមតិមហាជនទំាងក្នុងនិងទាំងក្រៅប្រទេស កំពុងភ័យស្លន់ស្លោរ ចំពោះអាយុជីវិតរបស់លោក Shimon Peres ដែលជាឥស្សរជននយោបាយដ៏អសា្ចរ្យមួយរូបរបស់ប្រទេសអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:៤៣
លោក Shimon Peres ដែលជាប្រធានាធិបតីអ៊ីស្រាអែលទី៩ កំពុងស្ថិតក្រោមការជួយសង្គ្រោះបន្ទាន់ពីសំណាក់ក្រុមគ្រូពេទ្យដោយរោគដាច់សសៃឈាមក្នុងខួរក្បាល តាំងពីយប់ម្សិលមិញនៅមន្ទីរពេទ្យមួយជិតទីក្រុងTel Aviv។ យោងតាមលោកសាស្រ្តាចារ្យវិជ្ជបណ្ឌិតដែលជានាយកមន្ទីរពេទ្យ ស្ថានភាពសុខភាពរបស់លោក Shimon Peres មានអការៈធ្ងន់ធ្ងរតែនៅនឹង។
នៅចំពោះមុខអ្នកកាសែតដែលមានវត្តមានយ៉ាងកកកុញនៅចំពីមុខមន្ទីរពេទ្យ គ្រូពេទ្យនាយក បានថ្លែងបញ្ជាក់ប្រាប់ថា” លោក Peres កំពុងស្ថិតនៅក្រោមការព្យាបាលយ៉ាងម័តធ្យ័តនិងយកចិត្តទុកដាក់ជាទីបំផុតក្រោមការតាមដានរបស់ក្រុមគ្រូពេទ្យជំនាញៗគ្រប់មុខរបស់អ៊ីស្រាអែល។ កាលពីខែមករាមុន លោក ធ្លាប់មានរោគសញ្ញាបេះដូងចំនួនពីរលើករួចមកហើយ ក្នុងរយៈពេលតែ១០ថ្ងៃប៉ុណ្ណោះ ប៉ុន្តែក្រុមគ្រូពេទ្យ កាលណោះ បានអះអាងថា វាមិនធំដុំទេ។
ខណៈនេះ ក្រុមវិជ្ជបណ្ឌិតអ៊ីស្រាអែល បានរក្សាភាពស្ងៀមស្ងាត់ មិនហ៊ានធ្វើការប៉ាន់ស្មានអ្វីទេ នៅលើស្ថានភាពអការៈរោគរបស់លោក Shimon Peres។ ប៉ុន្តែ ប្រទេសអ៊ីស្រាអែលទាំងមូល កំពុងតែស្លុតរន្ធត់ចិត្តឥតឧបមា ពីព្រោះលោក Peres គឺ ជាបិតាស្ថាបនិកលើកចុងក្រោយមួយរូបនៃរដ្ឋអ៊ីស្រាអែលដែលកំពុងនៅរស់រានមានជីវិត។
គួររំលឹកថា ដោយសារតែតួនាទីដ៏ចម្បងរបស់លោកនៅក្នុងកិច្ចព្រមព្រៀងសន្តិភាពនៅទីក្រុងអូស្លូជាមួយរដ្ឋអំណាចប៉ាឡេស្ទីននោះ លោក Shimon Peres បានទទួលរង្វាន់ណូបែលសន្តិភាពនៅក្នុងឆ្នាំ ១៩៩៤។ លោក ក៏ធ្លាប់ធ្វើ ជានាយករដ្ឋមន្ត្រីអ៊ីស្រាអ៊ែលពីរលើក គឺនៅរវាងឆ្នាំ១៩៨៤និង១៩៨៦និងរវាង១៩៩៥-៩៦ បន្ទាប់មកទៀត លោកបានឡើងជាប្រធានាធិបតីអ៊ីស្រាអែលពីឆ្នាំ២០០៧ដល់ឆ្នាំ២០១៤។
នៅពេលនេះ ក្រុមគ្រួសាររបស់លោក Shimon Peres បានទទួលសារគាំទ្រជាច្រើនពីពិភពលោកទាំងមូលហើយនៅក្នុងប្រទេសវិញ ឥស្សរជននយោបាយសំខាន់ៗរបស់អ៊ីស្រាអែល ក៏បញ្ចេញប្រតិកម្មជាបន្ទាន់ភ្លាមដែរ ដូចយ៉ាង លោកនាយករដ្ឋមន្ត្រីអ៊ីស្រាអែល Benjamin Netanyahu តាមរយៈ Facebook លោក បានបួងសួងបន់ស្រន់សូមឲ្យអតីតប្រធានាធិតបីអ៊ីស្រាអែលរូបនេះ បានជាសះស្បើយពីជម្ងឺយ៉ាងឆាប់រហ័សនិងថា យើងទាំងអស់ស្រឡាញ់រូបលោក Shimon Peres ជាពិសេសពលរដ្ឋអ៊ីស្រាអែលទូទាំងប្រទេសសង្ឃឹមយ៉ាងមុតមាំថា លោកPeres នឹងបានជាសះស្បើយ។
ចំណែក លោក Reuven Rivlin ដែលបានឡើងជាប្រធានាធិបតីអ៊ីស្រាអែល បន្តស្នងពីលោក Shimon Peres នៅឆ្នាំ២០១៤ ក៏បានថ្លែងបញ្ជាក់ដែរថា "លោកសូមបួងសួងដល់ព្រះជាម្ចាស់ ជាមួយនឹងពលរដ្ឋអ៊ីស្រាអែលទូទាំងប្រទេស ដើម្បីសូមឲ្យលោក Shimon Peresដែលជាមិត្តរបស់លោក បានជាសះស្បើយយ៉ាងឆាប់រហ័សដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ