អ៊ីរ៉ង់ បង្អួត ប្រព័ន្ធខែលមីស៊ីសថ្មី Made In Iran ជាសាធារណៈ
នៅថ្ងៃអាទិត្យនេះ អ៊ីរ៉ង់ បានបង្ហាញ ជាសាធារណៈរូបភាព ប្រព័ន្ធខែលមីស៊ីលថ្មី ប្រភេទ Bavar 373 ផលិត ដោយអ៊ីរ៉ង់ខ្លួនឯង និងនៅក្នុងប្រទេសអ៊ីរ៉ង់ផ្ទាល់ ដែលអាចប្រៀបប្រដូចបាននឹងខែលមីស៊ីលរុស្ស៊ី S-300។ ពិធីបង្អួតសព្វាវុធថ្មីបានប្រព្រឹត្តទៅក្រោមអធិបតីភាពប្រធានាធិបតី លោក ហាសាន់ រ៉ូហានី Hassan Rohani និងរដ្ឋមន្ត្រីក្រសួងការពារជាតិអ៊ីរ៉ង់ លោក ហ៊ូសេន ដេះហ្កាន Hossein Dehghan។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
កម្មវិធីបង្ហាញគម្រោងប្រព័ន្ធខែលមីស៊ីល ត្រូវបានចាក់ផ្សាយក្នុងប្រព័ន្ធឃោសនាព័ត៌មានអ៊ីរ៉ង់យ៉ាងទូលំទូលាយ។ គម្រោងផលិតប្រព័ន្ធខែលមីស៊ីល ដែលបានដុះដាលឡើង តាំងពីអ៊ីរ៉ង់ កំពុងស្ថិតនៅក្រោមទណ្ឌកម្មអន្តរជាតិម្ល៉េះ។
នៅឆ្នាំ២០១០ នៅពេលដែលរុស្ស៊ីបានផ្អាកឈប់បញ្ជូនប្រព័ន្ធខែលមីស៊ីល S-៣០០ទៅឱ្យតេអេរ៉ង់ ស្របតាមសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ដាក់ទណ្ឌកម្មអ៊ីរ៉ង់ក្នុងសំណុំរឿងកម្មវិធីនុយក្លេអ៊ែរមក អ៊ីរ៉ង់ក៏បានផ្តួចផ្តើមគំនិតបង្កើតគម្រោងផលិតខែលមីស៊ីល ដោយខ្លួនឯង។
នៅឆ្នាំ២០១៥ មុនកិច្ចព្រមព្រៀងអន្តរជាតិស្តីពីកម្មវិធីនុយក្លេអ៊ែរអ៊ីរ៉ង់ដែលអនុញ្ញាតឱ្យអ៊ីរ៉ង់បានរួចផុតពីទណ្ឌកម្មពិភពលោកបន្តិចម្តងៗនោះ រុស្ស៊ីក៏មានសិទ្ធិបញ្ជូនខែលមីស៊ីលS-៣០០ មកឱ្យអ៊ីរ៉ង់ជាថ្មីនិងជាបណ្តើរៗស្របតាមកិច្ចព្រមព្រៀងតាំងពីឆ្នាំ២០០៧។ ប៉ុន្តែ ការរិះគន់នៅមានច្រើន ជាពិសេសពីសំណាក់សហរដ្ឋអាមេរិក និងអ៊ីស្រាអែល។ ការរិះគន់ដែលបានធ្វើឱ្យជួបការលំបាកខ្លាំង ក្នុងការដាក់ដំឡើងប្រព័ន្ធនុយក្លេអ៊ែរនៅក្នុងប្រទេស។
គឺនៅពេលនោះហើយដែលប្រព័ន្ធខែលមីស៊ីលBavar៣៧៣ ត្រូវបានផលិតឡើង។ ជាប្រព័ន្ធដែលមានសមត្ថភាពដូចខែលមីស៊ីលរុស្ស៊ី S-៣០០ ដោយអាចបំផ្លាញមីស៊ីលរយៈឆ្ងាយ ដ្រូន យន្តហោះចម្បាំង និងមីស៊ីលអន្តរទ្វីប បាលីស្ទិកផង។ នេះបើតាមអះអាងរបស់រដ្ឋមន្ត្រីក្រសួងការពារជាតិអ៊ីរ៉ង់ ដែលបានអួតបន្ថែមទៀតថា ប្រព័ន្ធមីស៊ីលបាវ៉ារ អាចមានសមត្ថភាពកម្ទេច ចំណុចដៅ បានច្រើន ក្នុងពេលតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ