HRW បរិហារការប្រើច្រើនឡើងៗគ្រាប់បែកសម្លាប់មនុស្សនៅស៊ីរី
ក្នុងពេលកងកម្លាំងរដ្ឋាភិបាលស៊ីរី បានដណ្តើមកាន់កាប់មកវិញ តំបន់ភាគខាងជើងប្រទេសពីកណ្តាប់ដៃពួកភេរវនិយម អង្គការការពារសិទ្ធិមនុស្សHRW បានធ្វើការបរិហារការប្រើប្រាស់គ្រាប់បែកសម្លាប់មនុស្ស កាន់តែច្រើនឡើងៗ តាំងពីថ្ងៃទី ៣០កញ្ញា ថ្ងៃដែលរុស្ស៊ី និងកងកម្លាំងរដ្ឋាភិបាលលោក បាស្ហារ អាល់អាសាដ ចាប់ដៃគ្នាបើកយុទ្ធនាការវាយប្រហារក្រុមឧទ្ទាម។
ចុះផ្សាយនៅថ្ងៃ៖
ស្តាប់ - ០២:១៦
ភាគខាងជើង ខេត្តអាឡិប ដែលជាតំបន់យុទ្ធសាស្ត្ររបស់ស៊ីរី ត្រូវបានកងកម្លាំងរដ្ឋាភិបាលរបស់បាស្ហារ អាល់អាសាដ ដណ្តើមយកមកគ្រប់គ្រងវិញហើយ នៅថ្ងៃអាទិត្យនេះ។ នេះបើតាមការផ្សព្វផ្សាយរបស់ទូរទស្សន៍ជាតិស៊ីរី និងក្រុមសង្កេតការណ៍សិទ្ធិមនុស្សស៊ីរីOSDH ដែលបានអះអាងបន្ថែមទៀតថា មុននឹងដណ្តើមគ្រប់គ្រងតំបន់អាឡិបបានមកវិញ មានការប្រយុទ្ធគ្នាយ៉ាងខ្លាំង រវាងកងកម្លាំងស៊ីរី និងពួកឧទ្ទាម។ កងទ័ពអាកាសស៊ីរីនិងរុស្ស៊ី បានបាញ់រះពីលើមេឃប្រមាណ៤០ប្រាវ ព្រមទាំងទាំងការផ្លោងទម្លាក់គ្រាប់បែក សម្លាប់ពួកឧទ្ទាមអ៊ីស្លាមជ្រុលនិយម រណសិរ្សអាល់ណូស្រា ១៦នាក់ ក្នុងនោះក៏មានជនស៊ីវិលខ្លះដែរ ព្រមទាំងជនរងរបួសជាង៥០នាក់។
ប៉ុន្តែទន្ទឹមនឹងជោគជ័យនេះ អង្គការការពារសិទ្ធិមនុស្ស HRW បានចេញរបាយការណ៍ក្នុងថ្ងៃតែមួយបរិហារ របបលោកបាស្ហារ អាល់អាសាដ និងសម្ព័ន្ធមិត្តរុស្ស៊ីថាបានប្រើគ្រាប់បែកសម្លាប់មនុស្ស កាន់តែច្រើនឡើងៗ។ គិតចាប់តាំងពីរុស្ស៊ី បានចូលដៃប្រើកម្លាំងកម្ចាត់ពួកភេរវនិយមនៅស៊ីរី ក្បែររដ្ឋាភិបាលមក អង្គការបានរាប់ឃើញមានការរំលោភប្រើគ្រាប់បែកយ៉ាងហោច២០ដង ក្នុងការវាយប្រហារ៩កន្លែង សម្លាប់មនុស្សយ៉ាងហោច៣៥នាក់ ព្រមទាំងមានភស្តុតាងជារូបថតទៀត។ គ្រាប់បែកសម្លាប់មនុស្ស មិនមែនត្រឹមជាគ្រាប់កប់ក្នុងដីទេ តែអាចជាគ្រាប់បាញ់ចេញពីកាំភ្លើងធំ ឬទម្លាក់ពីយន្តហោះផង។
ក្រុមប្រឹក្សាសន្តិសុខអង្គការសហប្រជាជាតិ បានសេចក្តីសម្រេចចិត្ត លេខ ២១៣៩ កាលពីថ្ងៃទី ២២កុម្ភៈ២០១៤ ស្នើឱ្យគ្រប់ភាគីពាក់ព័ន្ធនៅស៊ីរី ឈប់ប្រើគ្រាប់បែក និងអាវុធសម្លាប់មនុស្ស ទាំងងងឹតងងុល។ រដ្ឋាភិបាលស៊ីរីខ្លួនឯងក៏បានចេញសេចក្តីថ្លែងការណ៍កាលពីខែវិច្ឆិកា ២០១៥ ធានារ៉ាប់រងថាមិនប្រើអាវុធសម្លាប់មនុស្ស បែបមិនរើសមុខឡើយ។ ប៉ុន្តែជាសន្យាខ្យល់ ព្រោះគ្រាប់បែកនៅតែបន្តផ្ទុះសម្លាប់ជនស្លូតត្រង់។
តាំងពីថ្ងៃទី៣០កញ្ញាមក រុស្ស៊ីបានចូលធ្វើអន្តរាគមន៍យោធា ជួយរដ្ឋាភិបាលស៊ីរី បើកយុទ្ធនាការកម្ចាត់ពួកភេរវនិយម នៃអង្គការរដ្ឋអ៊ីស្លាម និងអង្គការភេរវនិយមផ្សេងទៀត ប៉ុន្តែប្រទេសលោកខាងលិចបាននិងពួកឧទ្ទាមចោទថារុស្ស៊ីផ្ទង់ការវាយប្រហារមកលើតែពួកឧទ្ទាមប្រឆាំងនឹងរបបក្រុងដាម៉ាសច្រើនជាងពួកជីហាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ