អង្គការសហប្រជាជាតិគាំទ្រជាឯកច្ឆ័ន្ទយុទ្ធសាស្ត្ររកសន្តិភាពឱ្យស៊ីរី
ជាលើកទីមួយ តាំងពីសង្គ្រាមស៊ីវិលនៅស៊ីរីបានផ្ទុះឡើង សម្លាប់ជីវិតមនុស្សអស់ជាង ២៤០០០០នាក់ ដែលក្រុមប្រឹក្សាសន្តិសុខអង្គការសហប្រជាជាតិ បានព្រមព្រៀងគ្នាគាំទ្រជាឯកច្ឆ័ន្ទផែនការសន្តិភាពនៅស៊ីរី។ អាមេរិក រុស្ស៊ី និងសមាជិកក្រុមប្រឹក្សាទាំង១៣ប្រទេសទៀត បានត្រូវរ៉ូវគ្នា មិនធ្លាប់មាន លើផែនការលម្អិត ស្វែងរកសន្តិភាព នាំស៊ីរីឆ្លងអន្តរកាលនយោបាយ ប៉ុន្តែគេត្រូវការមានសម្បទានច្រើនទៀត ទើបក្តីស្រមៃកា្លយជាការពិតបាន។
ចុះផ្សាយនៅថ្ងៃ៖
ស្តាប់ - ០២:០៣
ជាដណ្តើមថ្មី នៃការស្វែងសន្តិភាពឱ្យស៊ីរី ! ក្រុមប្រឹក្សាសន្តិសុខអង្គការសហប្រជាជាតិ ទើបបានប្រកាសគាំទ្រជាឯកច្ឆ័ន្ទយុទ្ធសាស្ត្រផ្តល់សន្ទុះថ្មីដល់ផែនការសន្តិភាព ដែលគ្រោងបង្កើតស្ថាប័នមួយជាក្បាលម៉ាស៊ីនដឹកនាំស៊ីរីឆ្លងអន្តរកាល និងមានអំណាចពេញលេញ តែគ្មានចារជោគវាសនាអនាគតលោក បាស្ហារ អាល់អាសាដ ជាលក្ខខណ្ឌអ្វីទេ។ គណៈកម្មការនេះត្រូវបង្កើតឡើងដោយការព្រមព្រៀងពីគ្រប់ភាគី ដោយមិនរំខាន តែធានាបាននូវភាពរលូនបន្តរហូតទៅនៃម៉ាស៊ីនរដ្ឋាភិបាលស៊ីរីបច្ចុប្បន្ន។
គំនិតផ្តួចផ្តើមនេះ នឹងចាប់ដំណើរការចាប់ពីកញ្ញាទៅ និងមានបួនមែក ៖ ក្រុមសន្តិសុខនិងការពារ ក្រុមប្រឆាំងនឹងភេរវនិយម ក្រុមនយោបាយនិងច្បាប់ ព្រមទាំងក្រុមការងារស្ថាបនាប្រទេស។ បើតាមអន្តរការីអង្គការសហប្រជាជាតិទទួលបន្ទុកកិច្ចការស៊ីរី ក្រុមការងារបានផ្តើមជ្រើសរើសឥស្សរជនមានសមត្ថភាពសម្រាប់បំពេញបេសកកម្មនេះហើយ។
សូមបញ្ជាក់ថា ការគាំទ្រជាឯកច្ឆ័ន្ទលើផែនការសន្តិភាពនេះ សម្រេចចេញជារូបរាងបាន តែមួយថ្ងៃក្រោយពីរបបលោកបាស្ហារ អាល់អាសាដបានបើកប្រតិបត្តិការវាយប្រហារយ៉ាងឃោរឃៅ ស្លាប់មនុស្សជាងមួយរយនាក់ នៅក្បែរក្រុងដាម៉ាស និងដែលអង្គការសហប្រជាជាតិចោទរបបក្រុងដាម៉ាសថាលម្អៀង។ បើតាមអ្នកជំនាញ ការព្រមព្រៀងថ្ងៃនេះ ក៏ជាលទ្ធផលនៃការចុះទន់ខ្សោយរបស់ភាគីបក្សដិបក្សនៅលើសមរភូមិ ដោយម្នាក់ៗមានភាពបន្ទាន់ត្រូវប្រឈមនឹងសត្រូវរួមតែមួយ គឺអង្គការរដ្ឋអ៊ីស្លាម និងភាពទន់ភ្លន់ដាក់គ្នារវាងសហរដ្ឋអាមេរិកនិងអ៊ីរ៉ង់ក្នុងសំណុំរឿងនុយក្លេអ៊ែរ។
ប៉ុន្តែការព្រមព្រៀងនេះគ្រាន់តែដំណាក់កាលដំបូងដែលមិនធ្លាប់កើតមានពីមុនប៉ុណ្ណោះ និងគ្មានអ្វីអាចធានាបានពីជោគជ័យចុងក្រោយទេ ព្រោះមូលដ្ឋានគ្រឹះនៃបញ្ហា តាំងពីឆ្នាំ២០១១មក “អនាគតនយោបាយរបស់លោក បាស្ហារអាល់អាសាដ” នៅតែបន្តជាឧសបគ្គដដែល។ រាល់ផែនការសន្តិភាពពីមុនៗ ស្នើដោយមហាអំណាច ឬអង្គការសហប្រជាជាតិ តែងជួបបរាជ័យ គាំងត្រឹមឈ្មោះ បាស្ហារ អាល់អាសាដ ! នៅលើកនេះ ឈ្មោះបាស្ហារអាល់អាសាដនឹងលើកទៅនិយាយក្រោយគេ ដើម្បីកុំផែនការស្លាប់មុនកើតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ