ក្រោយភេរវកម្មរបស់អង្គការរដ្ឋអ៊ីស្លាម អាមេរិកជម្លៀសទ័ពសេសសល់ចេញពីយេម៉ែន
សហរដ្ឋអាមេរិកបានធ្វើការជម្លៀសទាហានជាងមួយរយនាក់ ដែលជាកងកម្លាំងទ័ពពិសេសសេសសល់ចុងក្រោយ ចេញពីទឹកដីយេម៉ែន។ មូលហេតុ គឺបណ្តាលមកពីស្ថានភាពសន្តិសុខធ្លាក់ចុះ ដុនដាបខ្លាំង ជាពិសេសក្រោយពីមហាភេរវកម្មរបស់ពួកអង្គការរដ្ឋអ៊ីស្លាម កាលពីថ្ងៃសុក្រដែលបានផ្តាច់ជីវិតមនុស្សអស់ជិត១៥០នាក់។ ប្រឈមមុននឹងស្ថានការណ៍បែបនេះ លោកប្រធានាធិបតីយេម៉ែនបានចេញថ្លែងតាមកញ្ចក់ទូរទស្សន៍ ប្រកាសប្រយុទ្ធប្រឆាំងនឹងក្រុមជ្រុលនិយម "ឈីអ៊ីត" និង"ស៊ុននីត"។
ចុះផ្សាយនៅថ្ងៃ៖
ស្តាប់ - ០១:៥៤
ទាហានអាមេរិក ដែលទូរទស្សន៍CNN បានបង្ហើបព័ត៌មានមុនគេ ទាក់ទងនឹងការជម្លៀសខ្លួនចេញពីទឹកដីយេម៉ែន គឺជាកងចុងក្រោយនៃទ័ពពិសេសអាមេរិក ដែលមានបេសកកម្មប្រយុទ្ធប្រឆាំងនឹង ចលនាភេរវនិយមអាល់កៃដានិងក្រុមសបណ្តាញស្និទ្ធនឹងចលនានេះ នៅប្រទេសយេម៉ែន។ កាលពីខែមុន សហរដ្ឋអាមេរិកទើបប្រកាសបិទទ្វារស្ថានឯកអគ្គរដ្ឋទូតអាមេរិកប្រចាំនៅទីក្រុងសាណា បន្ទាប់ពីការវាយលុកត្រួតត្រារដ្ឋធានីពីសំណាក់ក្រុមប្រដាប់អាវុធឈីអ៊ីតហួតទី។
ប៉ុន្តែកាលពីថ្ងៃសុក្រទី ២០ មីនា ជាលើកទីមួយ យេម៉ែនបានរងគ្រោះភេរវកម្មដែលជាស្នាដៃរបស់ពួកអង្គការរដ្ឋអ៊ីស្លាម (កាន់និកាយស៊ុននីតដូចពួកអាល់កៃដាដែរ)។ ផលវិបាកមានធ្ងន់ធ្ងរខ្លាំងខាងជីវិតមនុស្ស (បើតាមប្រភពខ្លះ) មានស្លាប់យ៉ាងហោច ១៤១នាក់ និងរបួសជាង៣៥០នាក់ ក្នុងភេរវកម្មពីរផ្ទួនៗ ឯភេរវកម្មទីបីត្រូវទប់ស្កាត់បានទាន់។ បើតាមអ្នកវិភាគ ពួកអង្គការរដ្ឋអ៊ីស្លាម កំពុងតែឆ្លៀតយកចំណេញពីបរិបទដ៏អនាធិបតេយ្យនៅក្នុងប្រទេសយេម៉ែន ដែលកំពុងហែកហួរ ប្រយុទ្ធប្រឆាំងរហូតទប់ទល់រហូតនឹងពួកភេរវនិយមអាល់កៃដា ដើម្បីតាំងខ្លួនធ្វើជាមេកើយ វាតអំណាចដល់ប្រទេសនេះ។
យេម៉ែន កំពុងស្ថិតលើមាត់ជ្រោះនៃសង្គ្រាមស៊ីវិល ដោយបែងចែកប្រទេសជាពីរចំណែក ខាងជើងកាន់កាប់ដោយពួកហួតទី និកាយឈីអ៊ីត គាំទ្រដោយអ៊ីរ៉ង់ និងខាងត្បូងគ្រប់គ្រងដោយកងកម្លាំង និកាយស៊ុននីត ជាសម្ព័ន្ធរបស់ប្រធានាធិបតីយេម៉ែន ស្និទ្ធនឹងប្រទេសអារ៉ាប៊ីសាអ៊ូឌីត។ លោកប្រធានាធិបតីយេម៉ែន ដែលបានបង្ខំខ្លួនរត់គេចទៅភាគខាងត្បូង ក្រោយការវាយយកទីក្រុងរបស់ពូកឈីអ៊ីតហួតទី បានចេញមុខតាមកញ្ចក់ទូរទស្សន៍ជាលើកទីមួយ បរិហារអំពើភេរវកម្មរបស់អង្គការរដ្ឋអ៊ីស្លាម និងបានប្រកាសប្រយុទ្ធប្រឆាំងនឹងឥទ្ធិពលអ៊ីរ៉ង់នៅយេម៉ែន។ តែលោកប្រមុខរដ្ឋក៏បានអំពាវនាវ ឱ្យគ្រប់ភាគីពាក់ព័ន្ធនៅយេម៉ែនចូលតុចរចា ដោះស្រាយវិបត្តិតាមផ្លូវនយោបាយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ