ប្រមុខរដ្ឋ-រដ្ឋាភិបាលលើពិភពលោកអញ្ជើញទៅគោរពវិញ្ញាណក្ខន្ធព្រះចៅអាប់ដាឡា
ប្រមុខដឹកនាំប្រទេសជាច្រើននៅលើពិភពលោក មានជាអាទិ៍ប្រធានាធិបតីអាមេរិក បារាំង នាយករដ្ឋមន្ត្រីអង់គ្លេស បានធ្វើដំណើរទៅគោរពវិញ្ញាណក្ខន្ធព្រះចៅអាប់ដាឡា ដល់ទីក្រុងរីយ៉ាត។ ចូលទីវង្គត់នៅថ្ងៃសុក្រ និងបញ្ចុះសពភ្លាមក្នុងថ្ងៃតែមួយ ព្រះចៅអាប់ដាឡា ត្រូវបានពិភពលោក ខ្លះចាត់ទុកថាជាអ្នកការពារសន្តិភាពឱ្យតំបន់ដើមបូព៌ា និងខ្លះទៀតចាត់ទុកថាជាស្ពានចរចារវាងពិភពអារ៉ាបនិងបស្ចឹមលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
អារ៉ាប៊ីសាអ៊ូឌីត ជាមិត្តពិត និងជាមិត្តដ៏កក់ក្តៅ ហេតុដូច្នេះហើយបានជាលោកប្រធានាធិបតីអាមេរិកបារ៉ាក់ អូបាម៉ា និងភរិយា បានសម្រេចបង្ខើចដំណើរទៅកាន់ប្រទេសឥណ្ឌាមួយថ្ងៃ ដើម្បីមកចូលរួមគោរពវិញ្ញាណក្ខន្ធព្រះចៅអាប់ដាឡាសិន មុននឹងផ្តើមទស្សនកិច្ចផ្លូវរដ្ឋជាលើកទីមួយ នៅឥណ្ឌា។
លោកប្រធានាធិបតីបារាំង ហ្វ្រង់ស័រហូឡង់ ដែលបានលើកសរសើរទស្សនវិស័យរបស់ព្រះចៅអាប់ដាឡា ចំពោះសន្តិភាព ដ៏ត្រឹមត្រូវនិងអមតៈនៅដើមបូព៌ា ព្រមទាំងលោកនាយករដ្ឋមន្ត្រីអង់គ្លេសដេរវីត កាមឺរោន នឹងត្រូវអញ្ជើញទៅដល់ក្រុងរីយ៉ាត នៅថ្ងៃសៅរ៍នេះតែម្តង។ ចំណែកលោកស្រីប្រមុខរដ្ឋាភិបាលអាល្លឺម៉ង់វិញ យល់ថាព្រះចៅអាប់ដាឡា មានព្រលឹងជាអ្នកចងស្ពានមេត្រី ឱ្យពិភពអារ៉ាបនិងបស្ចឹមលោក។
ការឧទ្ទិសនិងគោរពវិញ្ញាណក្ខន្ធមានមិនខ្វះទេ ប្រធានាធិបតីរុស្ស៊ី គ្រាន់តែបានឮដំណឹងមរណទុក្ខភ្លាមបានសម្តែងការគោរព ស្នាដៃផ្នែកនយោបាយ និងការដឹកនាំពោរពេញទៅដោយសេ្នហានិងការគោរពពលរដ្ឋរបស់ព្រះចៅអាប់ដាឡា។
អ៊ីរង់ ប្រទេសអ៊ីស្លាមដែរតែកាន់និកាយឈីអ៊ីត ប្រជែងនឹងនិកាយស៊ុននីតនៅអារ៉ាប៊ីសាអ៊ូឌីត ក៏នឹងត្រូវបញ្ជូនតំណាងថ្នាក់រដ្ឋមន្ត្រីការបរទេសមកគោរពវិញ្ញាណក្ខន្ធព្រះចៅអាប់ដាឡាដែរ។ ប្រមុខដឹកនាំសាសនាអ៊ីស្លាម និងប្រមុខដឹកនាំបរទេសផ្សេងទៀត ជាមិត្តជិតដិត ជាមិត្តជិតឆ្ងាយ ដូចយ៉ាងប៉ាគីស្ថាន តួកគី លីបង់ សុទ្ធតែមានវត្តមានក្បែរព្រះចៅ សាល់ម៉ាន ព្រះមហាក្សត្រថ្មី ដើម្បីជួយរំលែកទុក្ខ។
ប្រកបដោយគតិបណ្ឌិត ជាដៃគូ ជាអ្នកការពារសន្តិភាព ឯកភាពអ៊ីស្លាម មានទស្សនវិស័យបើកទូលាយសម្រាប់ពិភពលោកទាំងមូល សម្រាប់ពិភពអារ៉ាប ប្រទេសខ្លះបានចេញក្រិត្យកាន់ទុក្ខព្រះចៅ អាប់ដាឡាដល់ទៅបីថ្ងៃ ដូចករណីប្រទេសអាល់ហ្សេរី ម៉ារ៉ុក ម៉ូរីតានី ឬដែនដីប៉ាឡេស្ទីន និង៧ថ្ងៃនៅអេហ្ស៊ីប។
ប៉ុន្តែជាមួយនឹងការគោរពសរសើរនេះ គេក៏ឃើញមានការរិះគន់ដ៏កម្រពីសំណាក់ អង្គការសិទ្ធិមនុស្ស Amnesty International ដែលឆ្លៀតបរិហារនាឱកាសកាន់ទុក្ខនេះ ថាអារ៉ាប៊ីសាអ៊ូឌីត មានរបបដឹកនាំ “មិនឈឺឆ្អាលនឹងបញ្ហាសិទ្ធិមនុស្ស”។ មិនតែប៉ុណ្ណោះបស្ចឹមប្រទេសជាច្រើននាំគ្នាការពារ និងមិនដែលថ្កោលទោសសកម្មភាពរំលោភសិទ្ធិមនុស្ស បំពានលទ្ធិប្រជាធិបតេយ្យនៅអារ៉ាប៊ីសាអ៊ូឌីត ដូចករណីនៅប្រទេសស៊ីរី ឬអ៊ីរ៉ង់ជិតខាងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ