លោក Bachar el-Assad៖« សុន្ទរកថារបស់បស្ចិមលោក ជាពាក្យពេចន៍ដែលគ្មានតម្លៃ »
នៅក្នុងបទសម្ភាសន៍មួយតាមទូរទស្សន៍រដ្ឋកាលពីថ្ងៃអាទិត្យ ទី២១ សីហា លោកប្រធានាធិបតីស៊ីរី Bachar el-Assad បានឆ្លើយព្រមានក្រុមប្រទេសលោកខាងលិចដែលកំពុងបន្តទាមទារឲ្យលោកចុះចេញពីតំណែង និងបានគំរាមដាក់ទ័ណ្ឌកម្មសេដ្ឋកិច្ចថ្មីទៀតលើប្រទេសស៊ីរី។ ក្រៅពីចាត់ទុកពាក្យពេចន៍របស់បស្ចិមលោកថាគ្មានតម្លៃ លោកBachar el-Assad បានលើកឡើងពីគម្រោងកំណែទម្រង់លើច្បាប់រដ្ឋធម្មនុញ្ញថ្មី។
ចុះផ្សាយនៅថ្ងៃ៖
ស្តាប់ - ០១:៣៣
គិតតំាងពីមានចលនាងើបបះបោរប្រឆំាងរដ្ឋាភិបាលស៊ីរីមក នេះជាលើកទី៤ហើយដែលលោកប្រធានាធិបតីស៊ីរី Bachar el-Assad បានចេញមុខធ្វើអន្តរាគមន៍តាមកញ្ចក់ទូរទស្សន៍រដ្ឋ។ អ្វីជាការកត់សម្គាល់ដំបូង រូបភាពនៃបទអន្តរាគមន៍របស់លោក Bachar el-Assad លើកនេះហាក់ដូចជាមានលក្ខណៈខុសពីលើកមុនបន្តិច ប៉ុន្តែខ្លឹមសារនៅតែដដែល។ ទោះបីជានៅចំពោះមុខមហាជនស៊ីរីដែលគំាទ្របុព្វហេតុរបស់លោក នៅចំពោះមុខសភា នៅមហាវិទ្យាល័យក្នុងទីក្រុងដាម៉ាស់ ឬមួយក៏ឆ្លើយនឹងសំណួររបស់អ្នកកាសែត ២រូបនៅទូរទស្សន៍រដ្ឋនាថ្ងៃម្សិលមិញក្តី លោក Bachar el-Assad នៅតែបន្តប្រើពាក្យពេចន៍ និងឃ្លាឃ្លោងដដែល។
លោក Bachar el-Assad បានបន្តអះអាងថា ប្រទេសស៊ីរីកំពុងជួបវិបត្តិមួយមែន ប៉ុន្តែគ្មានចលនាងើបបះបោរប្រឆំាងរដ្ឋាភិបាលក្រោមទ្រង់ទ្រាយធំណាមួយទេ។ សម្រាប់លោក Bachar el-Assad អធិបតេយ្យរបស់ប្រទេសស៊ីរីកំពុងទទួលការគំរាមកំហែងពីក្រុមប្រទេសបស្ចិមលោក ដូចដែលពួកគេធ្លាប់បានធ្វើនៅក្នុងអតីតកាលអ៊ីចឹងដែរ។ ទាក់ទងនឹងការទាមទាររបស់ក្រុមប្រទេសលោកខាងលិចឲ្យលោកចុះចេញពីតំណែង និងគំរាមដាក់ទ័ណ្ឌកម្មសេដ្ឋកិច្ចថ្មីទៀតនោះ លោក Bachar el-Assad បានឆ្លើយតបវិញថា ពួកគេមិនគួរនិយាយពាក្យពេចន៍របៀបនេះទៅកាន់ប្រធានាធិបតីម្នាក់ដែលប្រជាជនបោះឆ្នោតឲ្យទេ។
សម្រាប់លោក Bachar el-Assad ពាក្យសំដីរបស់បស្ចិមលោកសុទ្ធតែគ្មានតម្លៃ និងថា លោកចង់ផ្តោតការយកចិត្តទុកដាក់លើគម្រោងកំណែទម្រង់ច្បាប់រដ្ឋធម្មនុញ្ញនៅពេលអនាគត។ តែសម្រាប់ក្រុមអ្នកប្រឆំាងវិញ ពួកបានចាត់ទុកពាក្យសន្យារបស់លោក Bachar el-Assad ថាគ្មានតម្លៃអ្វីទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ