ទំនាក់ទំនងរកាំរកូសរវាងប្រទេសអេហ្ស៊ីបនិងប្រទេសអ៊ីស្រាអែល
នគរបាលនិងភ្នាក់ងាររក្សាសន្តិសុខអេហ្ស៊ីប៥នាក់បានត្រូវបាញ់ ស្លាប់កាលពីថ្ងៃសុក្រទី១៩សីហាឆ្នាំ២០១១នៅព្រំដែន អេហ្ស៊ីប-អ៊ីស្រាអែល។ ក្រោយពីមានកិច្ចប្រជុំជាបន្ទាន់កាលពីយប់មិញ រដ្ឋាភិបាលអេហ្ស៊ីបបានបញ្ចេញប្រតិកម្មនៅព្រឹកថ្ងៃសៅរ៍នេះ ដោយបានទាមទារឲ្យប្រទេសអ៊ីស្រាអែលសុំទោសជាផ្លូវការ ហើយទីក្រុងគែរក៏បានកោះហៅឯកអគ្គរដ្ឋទូតរបស់ខ្លួនឲ្យវិលត្រឡប់មក ប្រទេសអេហ្ស៊ីបវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៧
ចាប់តាំងពីអតីតប្រធានាធិបតីមូបារ៉ាក់បានត្រូវគេទម្លាក់ចេញពីមុខតំណែងរួចមក នគរបាលនិងភ្នាក់ងាររក្សាសន្តិសុខអេហ្ស៊ីបមានការលំបាកច្រើនក្នុងការត្រួតត្រាទៅលើតំបន់ឧបទ្វីបវាលរហោឋានSinaï។ សកម្មភាពពុំស្របច្បា់ជាច្រើនបានកើតមាននៅក្នុងតំបន់នេះ មានដូចជា៖
-ដំណើរឆ្លងកាត់នៃជនអន្តោប្រវេសន៍ខុសច្បាប់មកពីទ្វីបអាហ្វ្រិក។
-ដំណើរឆ្លងកាត់ដោយពួកសកម្មជនប៉ាលេស្ទីន។
-ការវាយប្រហារទៅលើបំពង់បង្ហូរឧស្ម័ននៅតំបន់ស៊ីណៃ។
-ហើយនិងការវាយប្រហារទៅលើប៉ុស្តឹ៍នគរបាលដែលកើតមានជាញឹកញាប់នារយៈពេលប៉ុន្មានខែចុងក្រោនេះ។
ហេតុដូច្នេះហើយបានជាអ៊ីស្រាអែលយល់ព្រមឲ្យទីក្រុងគែរបញ្ជូននគរបាលបន្ថែមទៅកាន់តំបន់ស៊ីណៃ។
គួរបញ្ជាក់ថា បើយោងតាមកិច្ចព្រមព្រៀងនៃ Camp David ដែលបានចុះហត្ថលេខាដោយប្រទេសអេហ្ស៊ីបនិងប្រទេសអ៊ីស្រាអែលនៅឆ្នាំ១៩៧៩ ប្រទេសអេហ្ស៊ីបបានត្រូវគេអនុញ្ញាតឲ្យដាក់ពង្រាយនគរបាលយ៉ាងតិចតួចបំផុតនៅក្នុងតំបន់ឧបទ្វីបស៊ីណៃ។
មូលហេតុចម្បងដែលនាំឲ្យមានការរកាំរកូសដល់ទំនាក់ទំនងអេហ្ស៊ីប-អ៊ីស្រាអែលគឺបណ្តាលមកពីកងកម្លាំងអ៊ីស្រាអែលបានតាមដេញប្រហារសមាជិកនៃកងកុម្ម៉ង់ដូប៉ាលេស្ទីន ហើយបន្ទាប់មកបានបណ្តាលឲ្យមាននគរបាលអេហ្ស៊ីបប្រាំនាក់ស្លាប់។
ទាំងនេះបានបណ្តាលឲ្យរដ្ឋាភិបាលអេហ្ស៊ីបបញ្ចេញប្រតិកម្មនៅព្រឹកថ្ងៃសៅរ៍នេះ ដោយទាមទារឲ្យទីក្រុងតែលអាវីវសុំទោសជាផ្លូវការ ហើយទីក្រុងគែរក៏បានកោះហៅឯកអគ្គរដ្ឋទូតរបស់ខ្លួនឲ្យវិលត្រឡប់មកប្រទេសអេហ្ស៊ីបវិញ។
គួរកត់សម្គាល់ថា សាធារណមតិអេហ្ស៊ីប ដែលតែងប្រឆាំងនឹងអ៊ីស្រាអែល បានដាក់សម្ពាធកាន់តែខ្លាំងឡើងៗ ដោយបាននាំគ្នាទៅធ្វើបាតុកម្មដើម្បីសម្តែងឲ្យឃើញនូវការប្រឆាំងរបស់ពួកគេនៅមុខស្ថានទូតអ៊ីស្រាអែលនៅទីក្រុងគែរ។ ចំណែកឯថ្នាក់នយោបាយអេហ្ស៊ីបក៏ដូចគ្នាអ៊ីចឹងដែរ ពួកគេបាននាំគ្នាទាមទារឲ្យមានវិធានការតឹងរ៉ឹងប្រឆាំងនឹងប្រទេសអ៊ីស្រាអែល។
សន្តិភាពរវាងប្រទេសអេហ្ស៊ីបនិងប្រទេសអ៊ីស្រាអែលពុំមែនជាសន្តិភាព “កក់ក្តៅ”ឡើយ។ តែជាទោះបីជាសន្តិភាពនេះជាសន្តិភាពមានស្ថិរភាពក៏ដោយ ក៏សន្តិភាពអេហ្ស៊ីប-អ៊ីស្រាអែលនៅតែជាសន្តិភាពមានលក្ខណៈ “ត្រជាក់ដូចទឹកកក”!!!
គួររំលឹកថា កាលនៅឆ្នាំ២០០០ ប្រទេសអេហ្ស៊ីបធ្លាប់បានកោះហៅឯកអគ្គរដ្ឋទូតរបស់ខ្លួនដើម្បីធ្វើការសាកសួរអស់រយៈពេលមួយដ៏វែង។ ហើយបច្ចុប្បន្ននេះ រដ្ឋាភិបាលអេហ្ស៊ីបហាក់ដូចជាកំពុងតែធ្វើតាមចំណង់របស់ប្រជាជន។ ប្រជាជនអេហ្ស៊ីបដែលតាមធម្មតាច្រើនតែមានទំនោរទៅរកធ្វើការប្រឆាំងនឹងអ៊ីស្រាអែល ក្នុងខណៈពេលដែលអតីតប្រធានាធិបតីអេហ្ស៊ីបមូបារ៉ាក់ច្រើនមានវិធានការបញ្ច្រាសផ្ទុយពីឆន្ទៈរបស់ប្រជាជនអេហ្ស៊ីប។ ដូច្នេះឃើញថា ទំនាក់ទំនងរវាងប្រទេសអេហ្ស៊ីបនិងប្រទេសអ៊ីស្រាអែលពិតជាឋិតនៅក្នុងស្ថានភាពមួយដែលអាចធ្លាក់ចុះដុនដាបបានយ៉ាងឆាប់រហ័ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ